81-нҗи хекая

Худайың көмегине бил багладылар

МҮҢЛЕРЧЕ адам Бабылдан Иерусалиме ченли узак ёл гечйәр. Олар Иерусалиме геленде, онуң харабачылыга өврүленини гөрйәрлер. Бу ерде хич ким яшанокды. Әхли зады тәзеден гурмалыды.

Илки билен, олар гурбанлык эдилйән ер гуряр. Бу ерде йөрите Ехова совгат хөкмүнде хайванлары гурбан эдйәрлер. Бирнәче айдан ысрайыллылар ыбадатхана гурмага башлаяр. Йөне төверегинде яшаян душманлары ысрайыллыларың ыбадатхана гурмагыны ислемейәр. Шонуң үчин олар ысрайыллылары горкузҗак боляр. Ахырсоңы, олар Парс дөвлетиниң тәзе патышасының көмеги билен гурлушыгы дурузярлар.

Арадан көп йыллар гечйәр. Ысрайыллыларың Бабылдан геленине 17 йыл болды. Ехова Хаггай ве Зекеря пыгамберлери аркалы халка гурлушыгы довам этмеги айдяр. Халк пыгамберлере гулак асып, Худайың көмегине бил баглаяр. Кануна гаршы болса-да, гурлушык довам эдйәр.

Шонда Таттенай атлы Парс ёлбашчысы гелип, ысрайыллылардан ыбадатхана гурмага кимиң ругсат берендигини сораяр. Ысрайыллылар Бабылдакалар Кир патышаның: «Иерусалиме хаял этмән гидиң-де, Худайыңыз Ехова ыбадатхана гуруң» диендигини айдярлар.

Йөне Кир арадан чыкыпды. Шонуң үчин Таттенай Кириң берен ругсады хакда билмек үчин Бабыла хат иберйәр. Басым ол Парсың тәзе патышасындан җогап аляр. Ол хатында Кир патышаның, догрудан-да, ругсат берендигини айдяр. Шейле-де: «Ысрайыллылар өз Худайына ыбадатхана гурсунлар. Сизиң болса олара көмек этмегиңизи буюрярын» диййәр. Ысрайыллылар дөрт йылың ичинде ыбадатхананы гуруп гутарярлар. Олар муңа бегенйәр.

Ыбадатхананың гурланына 48 йыл болупды. Иерусалимде халк гарып яшаярды, шәхердир ыбадатхананың гөрнүши болса говы дәлди. Шол вагт Бабылда Эзра атлы ысрайыллы, Худайың ыбадатханасының ягдайының говы дәлдигини эшидйәр. Соңра онуң нәме эдйәнини билйәңми?

Эзра Парс патышасы Артахшаштаның янына баряр. Артахшашта говы патышады. Ол Эзра Иерусалиме әкидер ялы көп совгат берйәр. Эзра шол совгатлары Иерусалиме әкитмәге Бабылдакы ысрайыллылардан көмек сораяр. Шонда алты мүңе голай ысрайыллылар күмүшдир гызылы ве бейлеки гымматбаха затлары Иерусалиме әкидйәрлер.

Ёлда эрбет адамлар көп боланы үчин Эзра алада эдйәр. Себәби оларың гызылдыр күмүшлерини алып, өзлерини болса өлдүрмеклери мүмкинди. Суратда гөршүмиз ялы, ол әхли халкы йыгнаяр. Ехова дога эдип, Иерусалиме барян узак ёлда горамагы хайыш эдйәр.

Ёлда Ехова олары гораяр. Дөрт айдан олар Иерусалиме саг-аман барып етйәрлер. Бу вакадан Ехованың бил баглаян адамлары гораяндыгыны гөрйәңми?

Эзра китабының 2—8-нҗи баплары.