PLANTI tausen manmeri i lusim Babilon na bihainim longpela rot i go bek long Jerusalem. Taim ol i kamap pinis long Jerusalem, ol i lukim ples i bagarap. I no gat wanpela man i stap. Ol Israel i mas wokim gen Jerusalem.

Pastaim ol i wokim wanpela alta. Em bilong putim ol animal samting na mekim ofa long Jehova. Sampela mun bihain ol Israel i kirap long wokim haus lotu. Tasol ol birua em ol i sindaun klostu long ol, ol i no laik bai ol Israel i wokim gen haus lotu. Olsem na ol i pretim ol bilong pasim wok bilong ol. Bihain ol i tokim king bilong Persia long putim lo na tambuim ol Israel long wokim dispela haus lotu.

Planti yia i lus. Kirap long taim ol Israel i lusim Babilon na i kam i stap long ples bilong ol, inap 17 yia i lus pinis. Jehova i salim profet Hagai na Sekaraia long tokim ol manmeri long kirapim gen wok bilong sanapim haus lotu. Ol manmeri i bilip long God bai helpim ol, na ol i bihainim tok bilong ol profet. Ol i kirapim gen dispela wok, maski lo i tambuim ol long mekim.

Olsem na wanpela namba wan gavman bilong dispela provins bilong Persia i kam na askim ol Israel long husat i tok orait long ol i mekim dispela wok. Ol Israel i tokim em olsem taim ol i bin stap long Babilon, King Sairus i bin tokim ol olsem: ‘Yupela i mas go bek long Jerusalem na wokim haus lotu bilong Jehova, em God bilong yupela.’

Tatenai i salim pas i go long Babilon na askim olsem tru tru Sairus i bin mekim dispela tok o nogat. Sairus i dai pinis, tasol nupela king bilong Persia i bekim pas. Long pas em i kamapim olsem tru tru Sairus i bin mekim dispela tok. King i tok: ‘Larim ol Israel i wokim haus lotu bilong God bilong ol. Na yupela i mas helpim ol.’ Inap 4-pela yia bihain ol i pinisim dispela wok na ol Israel i amamas tru.

Planti yia moa i lus. Kirap long taim ol i bin pinisim wok bilong sanapim haus lotu na i kam inap nau, klostu 48 yia i lus pinis. Ol manmeri long Jerusalem i stap rabis, na taun na haus lotu i bagarap liklik. Long Babilon, Esra i harim tok long dispela samting. Olsem na yu save em i mekim wanem?

Em i go lukim Artaserksis, em king bilong Persia, na dispela gutpela king i givim planti presen long Esra bilong karim i go bek long Jerusalem. Esra i askim ol Israel i stap long Babilon long helpim em long karim ol dispela samting i go long Jerusalem. Inap olsem 6,000 manmeri i laik i go. I gat planti silva, gol, na ol arapela gutpela samting em ol bai karim i go long Jerusalem.

Esra i tingting planti, long wanem, i gat planti man nogut long rot. Em i pret, nogut ol dispela man nogut i kisim silva na gol bilong ol, na kilim ol i dai. Olsem na Esra i singautim ol manmeri i kam bung, olsem yu ken lukim long dispela piksa. Ol i beten askim Jehova long lukautim ol taim ol i bihainim longpela rot i go bek long Jerusalem.

Jehova i lukautim ol. Ol i wokabaut i go inap 4-pela mun na bihain ol i kamap long Jerusalem. Dispela i soim olsem Jehova i save lukautim ol man i bilip long Em bai helpim ol.