TA SMILAL xa noʼox krixchanoetik lokʼik batel ta Babilonia, batik kʼalal to ta Jerusalén. Kʼalaluk kʼotik tee solel jinem kʼot staik. Muʼyuk buchʼu te nakal. Li j-israeletike skʼan spasik ta achʼ skotol.

Jaʼ baʼyel la spasik li skajleb smoton Diose. Liʼe jaʼ ti bu chchikʼik chonetik sventa smoton li Jeovae. Echʼ jayibuk u, li j-israeletike lik spasik li chʼulnae. Pe oy jkontrainvanejetik ti te nopol nakalike ta sibtas yaʼiik li j-israeletik sventa tspajesbe li yabtelike. Li jkontrainvanejetike la skʼanbeik jun mantal li achʼ ajvalil ta Persia sventa chkechan yabtel li j-israeletike, li mantal la skʼanike la jyichʼ pasel.

Ch-echʼ kʼakʼal. Tana liʼ ne lokʼ xa vuklajuneb jabil slokʼelik tal ta Babilonia li j-israeletike. Li Diose la stak tal yajchʼul alkʼoptak, Hageo xchiʼuk Zacarías, sventa akʼo xalbeik j-israeletik ti akʼo xlik xchaʼvaʼanik li chʼulna xchiʼuk ta xchʼunik mantal. La xchaʼvaʼanik li chʼulnae, manchuk mi oy jun mantal ta xal ti mu xuʼ xichʼ vaʼanele.

Jech oxal, jun bankilal soltaro ti jaʼ sbi Tatnaie, la sjakʼbe j-israeletik ti buchʼu la jyal mantal ti xuʼ svaʼanik li chʼulnae. Li j-israeletike la jyalik ti te ta Babiloniae xi albatik yuʼun li ajvalil Ciroe: Batanik ta Jerusalén, ba vaʼanik li xchʼulna Jeova li aDiosike, xi, xi la stakʼik.

Manchuk mi chamem xa li Ciroe, li Tatnaie la stak batel jlik karta ta Babilonia sventa tsjakʼ mi melel onoʼox jech la jyal komel li Ciroe. Ta anil noʼox la stak sutel jlik karta li achʼ ajvalil ta Persiae. Jech la jyal komel, xi. Jech oxal xi la stsʼiba li ajvalile: Akʼo spasbe xchʼulna sDiosik li j-israeletike. Xchiʼuk noxtok cha kalboxuk ti xa koltaik ta svaʼanele, xi. Ta xchanibal jabil tsuts li chʼulnae, xmuyubajik tajek li j-israeletike.

Echʼ to ep jabiletik. Tana liʼ ne lokʼ xa van 48 jabil stsutsel li chʼulnae. Toj abol sba li krixchanoetik ta Jerusalene, li slumalik xchiʼuk li xchʼulna Diose muʼyuk bu toj alakʼ sba ta kʼelel. Esdras li j-israelal vinik ti te oy ta Babiloniae la jyaʼi ti sventa alakʼuk sba ta kʼelel li xchʼulna Diose oy to kʼusi skʼan. Jaʼ yuʼun, ¿mi xa naʼ kʼusi la spas?

Li Esdrase bat skʼel Artajerjes, li ajvalil ta Persiae, li lekil ajvalil taje ep la jyakʼbe smoton Esdras sventa chichʼ batel ta Jerusalén. Li Esdrase la jyalbe j-israeletik ti te oyik ta Babilonia ti akʼo koltavanikuke, vaʼun te nan vakmil krixchanoetik la jyalik ti chbatike. La jyichʼik batel sakil takʼin, kʼanal takʼin xchiʼuk yan kʼusitik ti alakʼik sbae.

Tsvul yoʼonton li Esdrase, yuʼun oy chopol viniketik ta be. Xibal sba mi xpojbatik li sakil takʼin xchiʼuk kʼanal takʼin xchiʼuk mi te xmilatik komel yuʼun li viniketik taje. Jaʼ yuʼun li Esdrase la stsob j-israeletik jech kʼuchaʼal cha vil ta lokʼole. Vaʼun la skʼoponik Jeova sventa xkʼelatik sutel kʼalal to ta Jerusalén.

Kʼelatik onoʼox yuʼun li Jeovae. Yuʼun lek kʼotik ta Jerusalén, chanib u xanavik batel. ¿Mi mu jechuk ti chakʼ kiltik ti chkʼelat yuʼun Jeova li buchʼu spatoj yoʼonton ta stojolale?