Tantara 81

Matokisa Zan̈ahary

NARO olo nan̈ano diabe boaka ta Babylona andeha Jerosalema. Irô koa fa navy tan̈y, Jerosalema mbala ravan̈a. Tsisy olo nipetraka tan̈y. Israelita aby io nila nan̈amboatra raha jiaby antsendriky.

Talatala raha voanalohany namboarin-drô. Amy talatala io irô man̈ano sôron̈o biby na raha amian̈a Jehovah. Fanjava maromaro tafaran’izen̈y, Israelita aby io nanampôno nan̈amboatra tempoly. Fahavalo nipetraka nan̈odidin̈y irô tsy tia tempoly io amboarin̈y. Israelita aby io amy zay nampitahôrin-drô. Farany, irô olo aby io nan̈iraka ampanjakan’i Persia vaovao, han̈ano lalàn̈a hampijanon̈o asa io.

Taon̈o maro zay lôso. Efa 17 taon̈o zay nialan’Israelita aby io ta Babylona. Jehovah nan̈iraka mpaminan̈inany Hagay ndreky Zakaria, han̈iraka olo hanohy fan̈amboaran̈a tempoly io. Olo aby io natoky fa Zan̈ahary han̈ampy irô, ke naraihan-drô volan̈a mpaminan̈y aby in̈y. Nitohizan-drô fo asan-drô, nata lalàn̈a tsy nan̈aomba irô han̈ano izio.

Nisy manam-pahifan̈a persianin̈y araiky, Tatenay an̈arany, navy nan̈ontany Israelita aby io boaka aia nazahoan-drô lalan̈a han̈amboatra tempoly io. Israelita aby io nivolan̈a fa tamin’irô ta Babylona tan̈y, Ampanjaka Kyrosy nivolan̈a tamin-drô: ‘Anarô iziô mandihana Jerosalema, amboara tempolin’i Jehovah, Zan̈aharinarô.’

Tatenay nandefa taratasy ta Babylona han̈ontany koa Kyrosy nivolan̈a zen̈y ankitin̈y, kanefa Kyrosy tamin’io efa naty. Tsy elan’izin̈y, ampanjakan’i Persia nandefa taratasy. Nambarany tao fa Kyrosy nivolan̈a zen̈y ankitin̈y. Nisoratan’ampanjaka io tao koa: ‘Ambilà Israelita aby io man̈amboatra tempolin’ny Zan̈aharin-drô. Tatahianarô irô.’ Koa fa afaka efatra taon̈o, vita tempoly, ke Israelita aby io ravoravo.

Taon̈o maro koa lôso zay. Efa ho 48 taon̈o zay nivitan’ny tempoly in̈y. Olo nipetraka ta Jerosalema tao tamy zen̈y nasikiny, tanàna ndreky tempolin’ny Zan̈ahary koa efa ratsy. Ta Babylona, Ezra Israelita naharen̈y fa nila hatsarain̈a tempolin’ny Zan̈ahary. Ke hainao raha nataony?

Ezra nandeha tamy Artaksersesy ampanjakan’i Persia. Izio ampanjaka tsara fan̈ahy. Izy nan̈amia Ezra raha maro indesiny mimpody ta Jerosalema. Ezra nangataka Israelita aby ta Babylona tan̈y hitatahy izy hitaondra raha aby zen̈y ta Jerosalema. Kadiriny 6 000 olo nivolan̈a handeha. Irô nitaondra volafotsy ndreky volamena maro.

Ezra niasa loha, fôtony nisy lelahy maro ratsy fan̈ahy tamy lalan̈a nimboan-drô. Olo aby io baka mety hangalatra volafotsy ndreky volamena in̈y, baka iô hamono irô. Ke Ezra namory olo jiaby, karaha hitanao amy sary io. Irô amy zay nivavaka tamy Jehovah, beky hiaro irô amy diabe impodianan-drô ta Jerosalema io.

Jehovah niaro irô. Koa fa nafaka efatra fanjava, irô tody ta Jerosalema, tsisy raha navoa irô. Hitatsika boaka amy zen̈y fa Jehovah mahavita miaro zay olo matoky izy, tsy zen̈y?

Ezra toko faha-2 ziska toko faha-8.