ŴANDU masausande gamajinji akwenda paulendo wakutyoka ku Babelo kwawula ku Yelusalemu. Nambo pakwika ku Yelusalemu, akukusimana kuli masamesamepe. Pangali jwakutamako. Ayisalayeli akusosekwa kutaŵasoni cilicose.

Cindu candanda cakutaŵa cili masabawo. Masabawo gali malo gacapeleceleje mbopesi sya nyama, kapena mituka kwa Yehofa. Jili jipite miyesi jakuŵalanjika, Ayisalayeli akutanda kutaŵa nyumba jakulambilila Mlungu. Nambo acimmagongo ŵakutama ciŵandika jemanjajo ngakusaka kuti Ayisalayeli ataŵe nyumbajo. M’yoyo akulingalinga kwajogoya kuti alece kutaŵako. Kaneko, acimmagongoŵa akumtendekasya mwenye jwasambano jwa ku Pelesiya kuti atamilikasye lilamusi lyakulekasya masengo gakutaŵago.

Yaka yikumala. Sambano pamasile yaka 17 Ayisalayeli ciwujile ku Babelo. Yehofa akutumisya ŵakulocesya ŵakwe Hagayi ni Sekaliya kukwasalila ŵandu kuti atandilesoni kutaŵa. Ŵanduwo akukulupilila cikamucisyo ca Mlungu, m’yoyo akwapikanila ŵakulocesyawo. Akutandilasoni kutaŵa, atamose kuti pana lilamusi lyakuti ngakusosekwa kutenda masengogo.

Sambano mundu jwine jwa ulamusi wakwe jwa ku Pelesiya jwakolanjikwa kuti Tatenayi ŵayice kukwawusya Ayisalayeli kwapatile macili gakutaŵa nyumba jakulambilila. Ayisalayeli akumsalila kuti paŵaliji ku Babelo, Mwenye Kolesi ŵasalile kuti: ‘Sambano, ajawule ku Yelusalemu kuti akataŵe nyumba jakulambilila ja Yehofa, Mlungu jwawo.’

Tatenayi akutumisya cikalata ku Babelo cakuwusya naga yaliji yisyene kuti Kolesi juŵawile ŵasasile yeleyo. Mwacangakaŵa cikalata cakwanga cikwika kutyocela kwa mwenye jwasambano jwa ku Pelesiya. Cikalataco cikusala kuti yili yisyene kuti Kolesi ŵasasile yeleyo. Sambano mwenye akulemba kuti: ‘Ŵakunde Ayisalayeli kutaŵa nyumba jakulambilila ja Mlungu jwawo. Soni ngwalamula jemanja kuti mwakamucisye.’ Yili yipite yaka mcece nyumba jakulambilila jikumala kutaŵa, Ayisalayeli ali ŵakusangalala mnope.

Yaka yejinji yikupita. Sambano yaka 48 yipite cimalicisye kutaŵa nyumba jakulambilila. Ŵandu ŵa mu Yelusalemu ali ŵakulaga, soni msinda ni nyumba ja Mlungu ngayikuwoneka cenene. Ku Babelo, mundu jwine jwa Ciyisalayeli lina lyakwe Esala akupikana kuti nyumba ja Mlungu jikusosekwa kujilinganya. Ana akumanyilila yakutenda Esala?

Esala akwawula kukuwonegana ni Alitasasita, mwenye jwa Pelesiya, soni mwenye jwamboneju akumpa Esala mituka jejinji kuti ajigale pakwawula ku Yelusalemu. Esala akwaŵenda Ayisalayeli ŵaŵatamaga ku Babelo kuti amkamucisye kunyakula mitukaji kwawula najo ku Yelusalemu. Ciŵandika ŵandu ŵakwana 6,000 akukunda kwawula. Ŵapaulendoŵa akwete silifa ni golidi jwamjinji, soni yindu yine yakusosekwa mnope yakuti ajigale.

Esala akulagasika ni nganisyo, ligongo mwitala mwana ŵandu ŵakusakala. Ŵandu ŵeleŵa komboleka kwasumula silifa ni golidi jwawo, kaneko nikwawulaga. Sambano Esala akwaŵilanga pampepe ŵandu wosope, mpela mwakwawonela paciwililipa. Kaneko akupopela kwa Yehofa kuti ŵateteye paulendo wawo wakuwujila ku Yelusalemu.

Yehofa akwateteya. Sambano pali papite miyesi mcece ali mkwenda, akuyika ku Yelusalemu ali ŵangawulala palipose. Ana yeleyi ngayikulosya kuti Yehofa komboleka kuteteya ŵandu ŵakusamkulupilila?