XIDALGUIXO buñ rareʼ gudx Babilonia né rieyibu gudx Jerusalén ni rian nigolú sit. Per órni radxiinyibu, gudx Jerusalén nacní toib lagary ni nigolú binitló. Diti noʼ chú rabés lagarycu. Israelitas nap xi de guisaʼyibu láani stoib.

Ni nirdiguié rasaʼyibu ngú toib lagary ro rasaʼijyibu nimal par guiscadyibu láamu Jehová. Diti radudy xidal beʼo israelitas rasaló rasaʼyibu yoʼ xiroʼ ro rac adorar Jehová. Per xi enemigyibu ni rabés lainy gudxrop ni noʼ gahx, rayopy mod guitzuiby né guicaa ló xchiinyibu. Xi enemigyibu rony que buñguieeu ni rasaló rony mandary Persia cué toib ley par guicaa dxiin ni cayonyibu.

Radudy xidal íz. Ma godudy diecisiete íz de goló israelitas bireʼyibu gudx Babilonia. Dios bixel chop buñguieeu ni raniʼ xí gac dzú ni sietra ni laa Ageo né Zacarías par gaiby a israelitas que saló guisaʼyibu stoib yoʼ xiroʼ ro rac adorar Jehová. Buñ rasob portín rapyibu confianz que Dios gacné layibu. Rasaló rasaʼyibu láani stoib, ná noʼ toib ley ni ná que diti gonyibu láani.

Por ngú, toib buñxirop ni laa Tatenai de gudx Persia rieed ronoʼyibu né ranabdiitz chú láabu biduidy lagary guisaʼyibu yoʼ xiroʼ ro rac adorar Jehová. Israelitas racapy láabu que órni noʼsayibu Babilonia buñguieeu ni buny mandary gudxcú ni laa Ciro góoch layibu: Coltzé Jerusalén né colguisaʼ yoʼ xiroʼ ro rac adorar Jehová, Dios xtunyto.

Tatenai raxel toib guiich gudx Babilonia né ranabdiitzbu pal Ciro nigolú goní ndeʼ, par ló naareʼ Ciro ma goity. Ni maca buñguieeu ni cayony mandary xalagary Ciro, radxiguet stoib guiich ro racapybu que scú láani. Por ngú buñguieeu reʼ racaʼbu: Colguiduidy lagary que israelitas guisaʼ yoʼ xiroʼ ro rac adorar Jehová. Né raxela lóoto gacnéto layibu. Ló tap íz yoʼ xiroʼ ro rac adorar Jehová raloxtzaayni, né israelitas nigolú rabaladxyibu.

Radudy xidal íz. Nigoreʼ ma godudy casi 48 íz de goló bilox goyaʼ yoʼ xiroʼ ro rac adorar Jehová. Buñ ni rabés lainy gudx Jerusalén buñ pobre layibu, gudxcú né yoʼ xiroʼ ro rac adorar Jehová diti sacró rienni. Ruc lainy gudx Babilonia noʼ toib buñ israelita ni laa Esdras, né radxiin guidiagbu que yoʼ xiroʼ ro rac adorar Jehová raquiin gactzaayni. Por ngú, ¿nanlo xí ronybu la?

Esdras riée ronoʼ Artajerjes, né buñguieeu reʼ buñtzay góc portín biscatbu xidal cós a Esdras par tzanébu gudx Jerusalén. Esdras ranab a israelitas ni noʼ gudx Babilonia gacné láabu, gahxca 6,000 buñ rasaguel riée né láabu par tzanéyibu xiroʼ plata né or né stipnés cós ni rasac.

Esdras rioʼbu ló galrasaʼ, portín noʼ gobáan ló néz. Guirá buñ mal reʼ cuann plata né or ni néyibu, né labúu guigaity layibu. Por ngú Esdras ratop guirá buñ, xomod rabilo ló dibuj. Ór cú raninéyibu Jehová par gann layibu ló néz, portín nigolú sit saayibu par guidxinyibu Jerusalén.

Jehová nigolú ran layibu. Né ló tap beʼo ni casaayibu ló néz, radxiinyibu Jerusalén. ¿Diti raduidy ndeʼ diitz que Jehová labúu ran buñ ni nap confianz láabu la?