TUKULPAYAYIÑ kuyfi mew petu ñi amunon Esdra ta Jerusalen. Mardokeo Ester engu, doy falin che ngey Israel che mu mülelu ti reyno Persia mu. Ester reyna ngey, ka Mardokeo tañi müna (primo) wünen longkolelu inan ngey chi rey mu. Peafiyiñ chumngechi rupay tüfa.

Petu pichikalu Ester ñi chaw ka ñi ñuke layngu, ka feymu Mardokeo tremümeyew. Asuero, tati rey Persia, niey kiñe ülmen ruka mülelu Susa pingechi waria, ka ti rey konayekefuy Mardokeo. Welu may, kiñe antü chi rey tañi domo Vasti pingelu, feyentulaeyew, fey ti rey dullintuy (ngümintuy) we domo reyna ngealu. ¿Kimimi iney tañi dullin (ngümin)? May, küme adngechi Ester.

¿Pefimi tüfachi pu che pochongnagküleyngün feychi mallmangechi wentru mu? Tüfa Aman pingey, kiñe doy falin wentru Persia mu. Feychi wentru pefimi ñi anülen üye mew feyti ta Mardokeo, Aman ka ayüy ñi pochongnagal. Welu Mardokeo pilay. ‘Kümelay ñi pochongnakümüwal kiñe weda wentru mu’, pi ñi rakiduam mu. Aman rume illkuy (echa lladküy). Fewla peaymi tañi chumün.

Aman koylatulelfi tati rey pu Israel che mu. ‘Wedake che feyentukelay tami ley dungu,’ pi. ‘Müley ñi langümngeal engün.’ Asuero kimlay tañi domo Israel che ngen. Fey mu allkütufi ta Aman, ka dewmay kiñe ley dungu feypilu kiñe antü mu ñi langümngeal kom pu Israel che.

Allkülu Mardokeo feychi ley dungu, niewelay tüngün. Werkülfi kiñe werkün dungu ta Ester: ‘Dungufinge tati rey, ka llellipufinge taiñ montulaetew.’ Kümelay ñi chaftunien ti ley Persia mu ñi pemeafiel ti rey fey ñi mangelngenon. Welu Ester kidu ñi duam mu amuy. Ti rey maychikünulfi ñi milla retrü, tüfa chempiel müley tañi langümngenoal. Ester mangelfi ti rey ka Aman kiñe fütra ilelkawün mu. Fey mew tati rey ramtufi Ester ‘chem am füreneafeyu iñche’. Ester feypi: ‘Ka küpalmi Aman emu ka kiñe fütra ilelkawün tañi nieal wüle, fey mu feypiayu.’

Feychi ilelkawün mu Ester feypifi ti rey: ‘Langümngean iñche ka tañi pu che.’ Tati rey illkuy (lladküy). ‘¿Iney am femalu tüfa?’ ramtuy.

‘¡Tüfachi weda wentru, taiñ kayñe Aman pingelu!’, pi Ester.

Fewla tati rey rüf illkuy. Werküy ñi langümafiel Aman. Fey wüla, ti rey elkünufi ta Mardokeo doy falin-ngechi wentru inan kidu mu. Fey mew Mardokeo elfalkünuy ñi dewmanieal kiñe we ley dungu, ñi eluñmafiel tati pu Israel che ñi ngüfeñpeal (weychatual) tañi mongen, kiñe antü mu tañi trokifiel ñi langümngeal. Fewla Mardokeo doy falin-ngechi wentru am, ka fentren che kellufingün tati pu Israel che, fey tüfa montuyngün tañi pu kayñe mu.