NATULANDE pa fyacitike ku numa sana ilyo Esra talaya ku Yerusalemu. Mordekai na Estere e bena Israele abacindeme sana mu bufumu bwa bena Persia. Estere ali mukashi wa mfumu, e lyo Mordekai, umufyala wakwe e wali uwa cibili ku mfumu. Natumone ifyo cali.

Abafyashi ba kwa Estere bafwile ninshi ali umwaice sana, kanshi Mordekai e wamukushishe. Ahasuerusi, imfumu ya bena Persia, aleikala kwi sano ilyali mu musumba wa Shushani kabili Mordekai ali mubomfi wakwe. Lelo bushiku bumo Vashti, umukashi wa mfumu taumfwilile imfumu, e ico imfumu yalimukeene no kuupa umwanakashi umbi. Bushe naumwishiba umwanakashi yaupile? Ni Estere, uwali umukashana uwayemba.

Bushe naumumona uyu umwaume wa cilumba uo abantu balekontamina? Ni Hamani. Ali uwacindama sana mu Persia. Hamani alefwaya ukuti na Mordekai, uyu uwikele alemukontamina. Lelo Mordekai alikeene. Talefwaya ukukontamina Hamani pantu Hamani ali umubi sana. Ici calengele Hamani afulwe sana.

E ico Hamani abepeshe abena Israele ku mfumu. Alandile ati: ‘Bantu ababi sana kabili tabakonka amafunde yenu. Bafwile ukwipaiwa.’ Ahasuerusi taishibe ukuti umukashi wakwe Estere, na o ali mwina Israele. E ico alyumfwilile ifyo Hamani alandile kabili abikileko ne funde lya kuti abena Israele bonse bakepaiwe pa bushiku ubo asalile.

Ilyo Mordekai aumfwile ukuti kuli ili ifunde, alifulilwe sana. Atumine uwa kuyaeba Estere ukuti: ‘Ufwile ukweba imfumu ificitike no kulomba ukuti betwipaya.’ Ifunde lya bena Persia lyalikeenye umuntu ukuya ku mfumu nga taimwitile. Lelo Estere aliile ku mfumu nangu ca kuti tayamwitile. Imfumu yapeele Estere inindaminwe ya golde, pa kuti eshibe ukuti tabamwipaye. Estere apekenye ifya kulya ifingi no kwita imfumu na Hamani ku kulya. Ilyo balelya, imfumu yaipwishe Estere ico alefwaya imucitile. Estere atile, akeba imfumu nga ca kuti yena na Hamani baya mu kulya ifya kulya akapekanya ubushiku bukakonkapo.

Ilyo balelya, ubushiku bwakonkelepo, Estere aebele imfumu ati: ‘Ine na bantu bandi balatwipaya.’ Imfumu yalifulilwe sana. Yamwipwishe ati: ‘Ni nani alefwaya ukucita ica musango yu?’

Estere atile: ‘Umulwani wesu uulefwaya ukucita ici cintu icibi, ni Hamani, uyu!’

Imfumu yalifulilwe sana. Yaebele abantu ukuti bepaye Hamani. Pa numa imfumu yasalile na Mordekai ukuba uwa cibili kuli ena mu bufumu. Mordekai abikileko ifunde ilipya ilyasuminishe abena Israele ukulwisha abalwani babo pa kuti bebepaya pali bulya ubushiku balingile ukwipaiwa. Apo Mordekai nomba ali muntu uwacindama sana, abantu abengi balyafwile abena Israele, kabili abalwani babo tababepeye.