Maana 82nan

Mardose ni Esiteri

AN KA segin an kɔ ni san damadɔ ye, sani Esdrasi ka taa Jerusalɛm. O waati la, Israɛlka minnu tun ye mɔgɔbaw ye Perse jamana na, olu tun ye Mardose ni Esiteri ye. Esiteri tun ye masamuso ye. Mardose min tun ye a balimakɛ dɔ ye, a tun bɛ na masakɛ kɔfɛ. An k’a lajɛ o kɛra cogo min na.

Esiteri bangebagaw sara k’a fitinin to. Mardose de y’a lamɔ. Perse masakɛ Asuerus ka palɛ dɔ tun bɛ Suse dugu kɔnɔ. Mardose tun ye Asuerus ka baarakɛla ye. Don dɔ la, masamuso Vasti y’i ban ka masakɛ ka kuma mɛn. O kosɔn, Masakɛ ye muso kura sugandi ka o kɛ a muso ye. I b’a dɔn a ye muso min ta wa? A ye Esiteri de ta. Npogotigi tun don, a tun cɛ ka ɲi kosɛbɛ.

I ɲɛ bɛ cɛ in na, mɔgɔw bɛ ka u biri min ɲɛkɔrɔ wa? Perse jamana mɔgɔba dɔ don. A tɔgɔ ko Haman. A kuncɛ ka bon kosɛbɛ. Cɛ min sigilen bɛ, o ye Mardose ye. Haman b’a fɛ Mardose fana ka a biri ale ɲɛkɔrɔ. Nka, Mardose ma sɔn k’o kɛ. Ale bolo, a bɛnnen tɛ ka i biri mɔgɔ ɲɛkɔrɔ min ka jugu nin cogo la. O ye Haman dusu bɔ kosɛbɛ. Haman ye min kɛ, o filɛ.

Haman taara masakɛ fɛ ka nkalon tigɛ ka da Israɛlkaw kan. A ko: ‘Mɔgɔjuguw don minnu tɛ i ka sariyaw labato. U ka kan ka faga.’ Asuerus tun t’a dɔn ko a muso Esiteri ye Israɛlka ye. O kosɔn, a ye  Haman lamɛn, ka sariya sigi ko Israɛlkaw bɛɛ ka faga don sigilen dɔ la.

Mardose y’a mɛn tuma min na ko sariya dɔ sigira u fagali kama, a dusu tiɲɛna kosɛbɛ. A ye ci bila Esiteri ma ko: ‘I ka kan ka kuma masakɛ fɛ, k’a deli a ka an kisi.’ Persekaw dun ka sariya la, ni i donna masakɛ kan k’a sɔrɔ a ma i wele, i ye sariya sɔsɔ. O bɛɛ n’a ta, Esiteri sɔnna ka don masakɛ kan k’a sɔrɔ masakɛ tun ma a wele. Esiteri donnen, masakɛ ye a ka sanubere ɲɛsin a ma. O kɔrɔ ye ko Esiteri tun tɛna faga. Esiteri ye masakɛ ni Haman wele ka na dumuniba dɔ la ale fɛ. O yɔrɔ la yen, masakɛ ye Esiteri ɲininka a b’a fɛ ale ka mun kɛ a ye. Esiteri y’a fɔ ko ale bɛna o fɔ masakɛ ye, ni masakɛ ni Haman seginna ka na dumuni wɛrɛ kɛ a fɛ o dugujɛ.

O dumuni filanan senfɛ, Esiteri y’a fɔ masakɛ ye ko: ‘Ne ni ne ka mɔgɔw bɛna faga ka ban.’ Masakɛ ye o mɛn tuma min na, a diminna. A ko: ‘A bɛ kun jɔni na k’o kɛ?’

Esiteri ko: ‘Haman mɔgɔjugu in don ani an jugu.’

O ye ta mɛnɛ masakɛ dusukun na. A ko Haman ka faga. O kɔfɛ, masakɛ ye setigiya di Mardose ma walisa a ka kɛ a ka jamana mɔgɔba filanan ye. Mardose tilala ka sariya kura sigi min b’a to Israɛlkaw bɛ se ka kɛlɛ kɛ, walisa ka u niw kisi, u tun ka kan ka faga don kofɔlen min na. Ikomi Mardose kɛra mɔgɔba ye sisan, mɔgɔ caman ye Israɛlkaw dɛmɛ. U kisira o cogo la ka bɔ u juguw bolo.

Esiteri ka kitabu.