TUFUNENU ku yimwe miaka ya kunyima muze te Ezera kanda achiya ku Yerusaleme. Mordekai ni Estere ayo te kapwile A-Izalele alemu chinji mu wanangana wa Persia. Estere te mwazovu wa Ahashueru, nawa musonyeni Mordekai te kapwile mutu wamuchiali mu wanangana. Tutalenu kuchi yino yapwile.

Yisemi ja Estere kanakafwa muze iye te uchili kanuke, kashika yamulela kuli Mordekai. Ahashueru, mwanangana wa Persia, te kakwete limwe zuwo mu mbonge ya Shushane, nawa Mordekai te umwe wa kuli tuvumbi twenyi. Limwe tangwa, Vashti, pwo lia mwanangana, yehuka kuli iye, hi mwanangana yasakula pwo mweka hanga apwe mwazovu wenyi. Yena unanyingika pwo muka iye anakasakula? Ewa, chileza Estere.

Yena unamono lunga au walizata anafulamanyina kuli atu? Jina lienyi Hamane. Iye kali lunga mulemu chinji mu Persia. Hamane te kanazange ngwo Mordekai neye afulamane, mwenauze yena unamono ha chizulie unatwama. Alioze, Mordekai kakachilingile. Iye yanyonga ngwo chiso kulita kufulamana kuli lunga yono mupi. Hamane yevwa uli unji. Nawa iye yalinga chino.

Hamane yamba yuma yasaki kuli mwanangana hakutwala kuli A-Izalele. Iye yamba ngwenyi: ‘Ayo kali atu api, keshi kwononokena shimbi je. Ayo chatamba kwashaha.’ Ahashueru te kaso kunyinyika ngwo mukwo-pwo Estere kali Ka-Izalele. Kashika iye yapanjika Hamane, nawa iye yahana yimwe shimbi hanga akashehe A-Izalele eswe ha limwe tangwa.

Muze Mordekai hevwa shimbi yacho, iye yapwa ni yipikalo yinji. Iye yatuma amwe maliji kuli Estere ngwenyi: ‘Yena chakutamba kuhanjika ni mwanangana hanga wite kuli iye atulamwine.’ Mu Persia kuya kuli mwanangana nyi kakusanyikine te chishi kulita ni shimbi. Alioze, Estere yaya ko, chipwe ngwe te kakamusanyikine. Mwanangana yolola mukombo wenyi wa oru kuli iye, hanga asolole ngwo iye kechi kumushaha. Estere yalakenya mwanangana ni Hamane hanga eze ha chimwe chiteleka chinene. Kuzekwene mwanangana yahula Estere yize te iye anazange hanga amwehe. Estere yamba ngwo mungukakulweza nyi yena ni Hamane nweza ku chiteleka chikwo, hamene.

Mba ha chiteleka chacho, Estere yalweza mwanangana ngwenyi: ‘Yami ni atu jami matushaha.’ Mwanangana yevwa uli. Iye yahula ngwenyi: ‘Iya unambe kulinga chocho?

Estere yamba ngwenyi: ‘Lunga au mupi. Mukwa kole, Hamane!’

Hohene mwanangana yevwa uli unji. Iye yatuma kusha Hamane. Hi mwanangana yasa Mordekai mutu wamuchiali mu wanangana wenyi. Mordekai yeta kusoneka shimbi yaha hanga A-izalele akalile mwono wo ha tangwa lize te anambe kwaashaha. Mumu Mordekai te hapwa lunga mulemu, kashika atu anji yakwasa A-Izalele, mba ayo yaalilamwina kuli akwa kole jo.