EMISGI anmar wis birgamar nasad siggi nabaloe, Esdras Jerusalén sega naed iduale. Persia neggweburgi Mardoqueo, Esterbo bur Israel dorgan nug nigmaladi. Ester dina reina geb e mesad Mardoqueo dina rey yarba dummadga simoga. Anmar daggoena igi weyob ibmar gunoniggi.

Ester anba bunolo bibbigwa gue unni e sergan burgwisa, geb Mardoqueo na aggwenoniggi. Aunni Persiag, Asuero negdagmai, geb Susa neggweburgi e neg sii, degine Mardoqueo we rey e mai gala gumoga. Degiidgi, ibagwengi Vasti, rey ome, rey sogedba ibmar imassuli, geb rey baid ome amissunna reinag imaggega. ¿Be wisi doa sulesa? Ester, we ome yeerdagleged.

¿Be dagsa we massered na dummarba imaggwissidi, geb dule bamalad we abinni dulludullu gunanaidi? We dule nuga Hamán, Persia neggweburgi dule nug niggad gue. We dule abiddoge Mardoqueo, bia sii be dagge, e asabinni dullu gumogadi bamalad yobi. Auggi Mardoqueo dina dullu imassuli. Mardoqueo dina nued dagsuli dule isgana gued asabin dullu guedi. Hamán saeiddoali. Emisgi be daggoena ibu imasa.

Hamán gaggan sanade reyg Israel dorgangi. Soge: ‘Wemar dule isgana gumala geb igarmar mamaidba dasurmarbali. Oburgwelemalar gebe’. Asuero dina wissuli e ome Israel dule gumogadi. Degsoggu, Hamán ega ibmar soged iddosa, geb igar mesisa, ibagwengi bela Israel dorgan oburgwelemaloye.

Mardoqueo we igar megisad wisgunonigua, suriddoali. Esterse gagga barmisa geb wegi soge: ‘Reybo be sunmaggo, geb anmar bendagleged ese be egiso’. Persia e igargi soglemai, dule geg reys naye, ese gollessulile. Auggi Esterdi nade ese gollessuli inigwale. Rey or suwar suui oyosa, sogega mer we ome oburgwemaloye. Ester reyg sogsa geb Hamánga, mas gullegoedgi na abingumaloye. Agine rey, Esterse egissa, ibu e gala imagged abeye. Ester soge, banegi baid mas gullegoedse naele geb Hamán namogale, ega sogoye.

Aa mas gullegedgi, Ester reyg soge: ‘An neggwebur oburgwelegoe geb an oburgwelemogoe’. Rey saeiddoali. Geb egissali: ‘¿Doa dule we ibmar imaggedgi binsanai?’.

Ester abin soge: ‘¡Anmar isdaradi, we dule isgana siidi, Hamán!’.

Emisgi rey bur nue saeiddossunna. Geb igar ugsa Hamán oburgwemalaga. Sorbali rey imasa, Mardoqueo e yarba dummadga sigmogadi. Degiidgi, Mardoqueo igar gwabbid mesissunna, we igar soge, Israel dorgan nabir urwemaloye, iba megisadgi oburgwelege soglearmalale. Ar emisgi Mardoqueo dule dummad gumo soggua, buggidar dule bamalad Israel dorgan bendasmala, geb Israel dorgan e isdarmaladse aggar gussurmala.