SAAN damanin sanni Ɛsidirasi ka taga Zeruzalɛmu, an k’a filɛ koo minw kɛra. Pɛrɛsi masaya kɔnɔ, Maridose ni Ɛsitɛri be ni lɔyɔrɔba ye ka tɛmɛ Israɛlden tɔɔw bɛɛ kan. Ɛsitɛri ye masamuso ye, ani a belencɛ ka deen Maridose lo ye masaya mɔgɔba filanan ye. An k’a filɛ o kɛra cogo min na.

Kabi Ɛsitɛri fitininman, a wolobagaw sara. O la, Maridose lo y’a lamɔ. Masacɛ Asuyerus (Sɛrisɛsi)ka masaso dɔ tun be Suzi dugu kɔnɔ ani Maridose tun y’a ka baaraden dɔ ye. Ayiwa loon dɔ, masamuso Vasiti ma masacɛ kaan minɛ, o kama masacɛ ye muso wɛrɛ sugandi k’a kɛ masamuso ye. I b’a lɔn a ye muso min sugandi wa? A ye sunguru cɛɲumanba Ɛsitɛri lo sugandi.

I ɲɛɛ be cɛɛ nin na jaa kan wa? Kuncɛbaya b’a la dɛ, mɔgɔw be biri a ɲɛɛ kɔrɔ! Aman lo. A lɔyɔrɔ ka bon kosɔbɛ Pɛrɛsi masaya kɔnɔ. I ɲɛɛ be cɛɛ min siginin na, Maridose lo, Aman b’a fɛ ale fana ka wuli ka biri. Nka, Maridose t’a fɛ k’o kɛ. Ale fɛ, a bɛnnin tɛ ka biri o mɔgɔ jugu nin ɲɔgɔn ɲɛɛ kɔrɔ. O ye Aman dimi kosɔbɛ. O kama, a filɛ a ye min kɛ.

A ye ngalon tigɛ ka la Israɛldenw kan masacɛ fɛ. A ko: ‘Mɔgɔ juguw lo. U tɛ ele masacɛ ka sariyaw bato. U ka kan ka faga.’ Masacɛ Asuyerus tun m’a lɔn ko ale yɛrɛ ka muso Ɛsitɛri ye Israɛlden dɔ ye. O kama, a sɔnna Aman ka kuma ma, ani a y’a to u ye sariya sɛbɛ ka loon dɔ sigi ko u ka Israɛldenw bɛɛ faga.

Maridose y’o sariya koo mɛn tuma min na, a hakili ɲagamina kosɔbɛ. A ye cii bila k’a fɔ Ɛsitɛri ye ko: ‘I ka kan ka kuma masacɛ fɛ, ani k’a deli ko a k’an kisi.’ Pɛrɛsi jamana kɔnɔ, a daganin tɛ sariya la mɔgɔ ka don masacɛ fɛ n’a m’a tigi weele. Nka, Ɛsitɛri donna masacɛ fɛ k’a to a m’a weele. Masacɛ ye a ka sanu bere kɔrɔta k’a sin Ɛsitɛri ma, o min kɔrɔ ko a man kan ka faga. Ɛsitɛri ye masacɛ ni Aman weele ka na dumuniba dɔ la. O yɔrɔ la, masacɛ ye Ɛsitɛri ɲininga ko a b’a fɛ ale ka mun lo kɛ a ye. Ɛsitɛri ko a bena o fɔ masacɛ ye ni a sɔnna ka na dumuni wɛrɛ kɛ ni Aman ye o dugusagwɛ.

O dugusagwɛ, k’u to dumuni na, Ɛsitɛri y’a fɔ masacɛ ye ko: ‘Ne ni n ka mɔgɔw bena faga.’ Masacɛ dimina. A ko: ‘Jɔn lo y’a jaa gwɛlɛya k’o kɛ?’

Ɛsitɛri ko: ‘O tiɲɛnikɛbaga nin n’o mɔgɔ jugu nin ye Aman lo ye!’

Sisan, masacɛ dimina sɔbɛ la. A ye cii di ko Aman ka faga. O kɔ, masacɛ ye Maridose kɛ masaya mɔgɔba filanan ye. Maridose ye sariya kura dɔ sigi min b’a to loon min latigɛra Israɛldenw fagari kama, u ka se ka kɛlɛ kɛ walisa k’u niin kisi. Komi Maridose be lɔyɔrɔba la, mɔgɔ caaman ye Israɛldenw dɛmɛ, ani u kisira u juguw bolo.