MEDA lesu tale mada ena vica na yabaki ni bera ni lako i Jerusalemi o Esera. E rau kilai levu o Moatekai kei Esiteri ena matanitu o Perisia, ia erau Isireli. E ranadi o Esiteri, rau qai veitatacini kei Moatekai, e tarava ga na tui ena veiliutaki. Meda raica se a yaco vakacava oqo.

Erau a mate na itubutubu i Esiteri ni se gone qai susugi koya o Moatekai. O Easuerosi na tui Perisia e dua tiko nona vale vakatui ena koro o Susani, qai veiqaravi kina o Moatekai. Dua na siga a talaidredre vua na tui o Vasitai na watina, mani digia e dua na watina vou me ranadi. O kila beka se a digitaki cei? Io, na gone yalewa totoka o Esiteri.

Raica mada na tamata dokadoka oqo era cuva tiko vua na lewenivanua. Oqo o Emani, e dua na tamata kilai e Perisia. E vinakata o koya me cuva tale ga vua o Moatekai. Ia e sega ni via cuva o Moatekai, baleta ni kila ni sega ni dodonu me cuva vua na tamata ca oqo. E vakacudrui Emani sara ga vakalevu oya qai cakava kina na veika oqo.

E tukuna o Emani vua na tui na itukutuku lasu me baleti ira na Isireli. E kaya: ‘Era tamata ca ra qai sega ni dau muria na nomuni lewa, mera vakamatei.’ Sega tiko ni kila na tui ni o Esiteri e dua na Isireli. Ia e vakarorogo ga vei Emani qai bulia na lawa mera vakamatei na Isireli.

E rarawa sara vakalevu o Moatekai ni rogoca na veika me baleta na lawa. Sa qai tukuna e dua na itukutuku vei Esiteri: ‘Mo kerea vua na tui me vakabulai keda.’ Ena lawa i Perisia, e rawa ga ni dua e lai raica na tui kevaka e sureti. E bole mate kina o Esiteri qai lai raica na tui, dina ga ni sega ni sureti. E dodoka yani na tui na nona ititoko koula me kua ni vakamatei o Esiteri. Sa qai sureti rau na tui kei Emani o Esiteri me ratou kana vata. Oti, sa qai tarogi Esiteri na tui se cava e vinakata. Sa qai kaya vua o Esiteri ni na qai tukuna ke rau lako yani ena siga e tarava me ratou kana vata tale.

Ni caka tiko na kana, sa qai kaya o Esiteri vua na tui: ‘Au sa vakarau vakamatei kei ira na kai noqu.’ E cudru mai na tui, qai taroga: ‘O cei e via cakava na ka oqo?’

A sauma yani o Esiteri, ‘Na tamata ca, na meca, o Emani.’

E cudru dina na tui qai tukuna me vakamatei o Emani. A qai digitaki o Moatekai me taravi koya na tui ena veiliutaki. E bulia tale ga o koya e dua na lawa e tara kina vei ira na Isireli mera vala lesu ena siga sa lokuci mera vakamatei kina. Ni turaga rogo gona o Moatekai, e levu sara na lewenivanua era vukei ira na Isireli. Era vakabulai kina mai vei ira na kedra meca.