ESERA be Ierusalema dekenai ia do lao lasi negana mani ita laloa. Parasa basileiana lalonai, Morodekai bona Eseta be ladana bada Israela taudia. Eseta be kwini, bona ena kasin Morodekai be lohia iharuana king henunai. Unai ia vara dalana mani ita itaia.

Eseta be ia do maragi neganai ena tama sina idia mase, bona unai dainai Morodekai ese ia naria. Parasa ena king, Ahasuero, be mai ena ruma Susa dekenai, bona Morodekai be ena hesiai tauna ta. Dina ta king ena adavana Vasati ese ena hereva ia kamonai lasi, unai dainai king ese hahine ma ta ia abia hidi ena kwini ai ia lao totona. Ia abia hidi hahinena oi diba, a? Oibe, kekeni hairaina Eseta.

Inai hekokoroku tauna mani oi itaia, taunimanima be ia vairanai idia tui diho noho. Unai tauna be Hamana. Parasa ai ia be tau badana ta. Hamana ia ura Morodekai, ia helai noho tauna, be ia vairanai ia tui diho. To Morodekai ia karaia lasi. Ia laloa unai bamona kara dika tauna vairanai ia tui diho be maoro lasi. Unai dainai Hamana ia badu momokani. Bona inai bamona ia karaia.

Hamana ese king vairanai Israela taudia ia herevalaia koikoi. Ia gwau: ‘Idia be taunimanima dikadia. Emu taravatu idia badinaia lasi. Namona be idia mase.’ Ahasuero ia diba lasi ena adavana Eseta be Israela hahinena ta. Unai dainai Hamana ia kamonai henia, bona taravatu ta ia torea, dina ta dekenai Israela taudia ibounai do idia hamasedia.

Morodekai ese unai taravatu ia kamonaia neganai, ia lalohisihisi bada. Eseta dekenai revareva ta ia siaia: ‘King oi hamaoroa. Oi noia ita ia hamauria totona.’ Parasa edia taravatu henunai king oi itaia diba lasi bema oi ia boiria lasi. Eseta ia boiria lasi, to ia vareai. King ese ena golo itotohi ia abia isi Eseta vairanai, anina be do idia hamasea lasi. Eseta ese aniani badana ta dekenai king bona Hamana ia boiria. Unuseniai king ese Eseta be ena ura gauna totona ia nanadaia. Eseta ese ia hamaoroa bema unai dina murinai ia bona Hamana be aniani ma ta dekenai idia mai, ia do ia hamaoroa.

Unai aniani negana ai, Eseta ese king ia hamaoroa: ‘Lau bona egu taunimanima be idia alaia gwauraia.’ King ia badu. Ia henanadai: ‘Unai bamona ia karaia gwauraia tauna be daika?’

Eseta ia haere: ‘Ai ia inai henia tauna dikana be Hamana!’

Vadaeni, king ia badu dikadika. Oda ia henia Hamana do idia hamasea totona. Gabeai, king ese Morodekai be ena lohia iharuana ai ia halaoa. Morodekai ese ia noia dainai taravatu matamatana ta ia karaia. Ia gwau, Israela taudia idia alaia gwauraia dinana ai, sibodia hamauria totona do idia tuari. Morodekai be hari tau badana dainai, taunimanima momo ese Israela taudia idia durua, bona edia inai taudia idia halusidia.