J’OMA rehọ imikpe jọ zoma kpemu tao re Ẹzra o te zi kpobọ Jerusalem. Mọdekae avọ Ẹsta họ Ahwo-Izrẹl nọ a mae rro evaọ isuẹsu Pasia. Ẹsta họ ovie aye, ọmọ oniọvo Mọdekae, nọ u no ovie no u te evaọ isuẹsu na. J’oma ruẹ epanọ onana orọ ze.

Enọ iyẹ Ẹsta i whu okenọ ọ gbẹ kao gaga, fikiere kọ Mọdekae ọ yọre riẹ. Ahasuerọs, ovie Pasia, o wo ọgwa uvie evaọ okpẹwho Susan na, Mọdekae yọ omọvo idibo riẹ jọ. Koyehọ, ẹdẹjọ Vashiti aye ovie o gbe yo ẹme kẹe he, fikiere ovie na ọ tẹ salọ aye ọkpokpọ re ọ jọ ovie aye riẹ. Kọ whọ riẹ aye nọ ọ salọ? E, Ẹsta nọ o wo erru na.

Kọ whọ ruẹ ọzae omovia ọnana nọ ahwo a bi kigwẹ kẹ na? Ọnana họ Heman. Ọ rọ ohwo nọ o wo uzou gaga evaọ Pasia. Heman ọ gwọlọ nnọ Mọdekae, ọ nọ whọ be ruẹ nọ ọ keria etenẹ na, re okigwẹ kẹe re. Rekọ Mọdekae ọ rẹ sai rue’i hi. Ororo ere he inọ uwoma re a kigwẹ kẹ ohwo oyoma otiọye. Onana u te ru Heman muofu gaga. Fikiere kọ onana họ oware nọ o ru.

Heman ọ tẹ ta ọrue kẹ ovie kpahe Ahwo-Izrẹl. ‘Ekpehre ahwo a rọ enọ i re yo ẹme kẹ izi ra ha,’ ere ọ tae. ‘A re kpai no.’ Ahasuerọs ọ riẹ hẹ inọ Ẹsta aye riẹ ohwo Izrẹl. Fikiere o te yo ẹme Heman, o te ru uzi nnọ evaọ ẹdẹ jọ a re ti kpe Ahwo-Izrẹl kpobi no.

Okenọ Mọdekae o yo kpahe uzi na, ọ tẹ rova gaga. Ọ tẹ vuẹ uwou se Ẹsta: ‘Whọ rẹ ta kẹ ovie na hrọ, jẹ lẹe re osiwi omai.’ Umukpahe uzi e Pasia re a nyae ruẹ ovie ajokpa nọ a zi zie owhẹ. Rekọ Ẹsta ọ nya ruọ eva ababọ ezizie. Ovie ọ tẹ riẹ ọkpọ oro riẹ kẹe, otọ oyena họ a re gbe kpei hi. Ẹsta o te zizie ovie na gbe Heman kpohọ emuore ologbo. Etẹe ovie na ọ jẹ ta kẹ Ẹsta oghẹrẹ ọghọ nọ ọ gwọlọ miei. Ẹsta ọ tẹ ta nọ ọ rẹ te ta kẹe otẹrọnọ ọye avọ Heman a rẹ nyaze emuore ọfa okiokiọ riẹ.

Evaọ emuore ọyena Ẹsta ọ jẹ ta kẹ ovie na: ‘A bi ti kpe omẹ gbe ahwo mẹ no.’ Eva e tẹ dha ovie na. ‘Ono o re yiwi ru oware utioye?’ ere ọnọe.

‘Ọzae na, ọwegrẹ na họ, ekpehre Heman ọnana!’ ere Ẹsta ọ tae.

Enẹna eva etẹ ghinẹ dha ovie na. Ọ tẹ kẹ uzi nọ a kpe Heman no. Uwhremu riẹ, ovie na o te ru Mọdekae họ ohwo avivẹ evaọ isuẹsu na, oma riẹ ọvo ọjokpa. Mọdekae ọ tẹ dao ma ruẹ nọ a ru uzi okpokpọ nọ orẹ kẹ Ahwo-Izrẹl uvẹ họre kẹ izuazọ rai evaọ ẹdẹ nọ a jẹ te rehọ kpai na. Fiki nọ Mọdekae ọ rọ ohwo nọ o wo uzou tere no enẹna, ahwo buobu a te fiobọhọ kẹ Ahwo-Izrẹl, a te siwai no obọ ewegrẹ rai.