TAQSIṬ TIS 82

Murdaxay d Istir

A NUƔAL tura ɣer kra iseggasen uqbel ṛṛwaḥ n Ɛazra ɣer Yarucalim. Murdaxay akk-​d Istir, yellan seg wat Isṛayil, sɛan ccan nnig akk wiyaḍ di tgelda n Faras. Istir tella ţ-​ţameṭṭut n ugellid, ma d Murdaxay yeṭṭef amkan wis sin mbeɛd agellid. A nwali amek i d-​yeḍra wannect-​a.

Imawlan n Istir mmuten asmi i tella ţ-​ţamecṭuḥt. D mmi-​s n ɛemmi-​s yeţţusemman Murdaxay i ţ-​id-​issekren. Aḥacwiruc, yellan d agellid n Faras, yesɛa lbeṛǧ di temdint n Cucan. Murdaxay yella d yiwen ger iqeddacen-​is. Yiwen wass, Wacti yellan ţ-​ţameṭṭut n ugellid, tugi aţ-​ţaɣ awal i wergaz-​is. Aḥacwiruc yextaṛ ihi tameṭṭut nniḍen ara yeṭṭfen amkan-​is. Teẓriḍ anta i gextaṛ? D Istir yellan ţ-​ţilemẓit icebḥen aṭas.

Twalaḍ lɣaci-​yagi i kennun zdat n wergaz-​a yeččuṛen d zzux? Argaz-​agi d Haman yellan d yiwen ger imeqranen di lḥukuma n Faras. Haman yeţṛaǧu ad yekker Murdaxay, i teţwaliḍ yeqqim dagi, akken ad yeknu zdat-​es ula d neţţa. Lameɛna, Murdaxay yeggumma ad ixdem lḥaǧa yecban tagi. Ɣur-​es d lmuḥal ad yeknu zdat n yir lɛebd am wagi. Dɣa Haman yezɛef aṭas. Atah ihi wayen yexdem.

Haman yeskaddeb i ugellid Aḥacwiruc ɣef wat Isṛayil. Yenna-​yas: ‘Yella yiwen wegdud ur nettabaɛ ara leqwanen-​ik. Ilaq a t-​tessengreḍ.’ Aḥacwiruc ur yeɛlim ara belli tameṭṭut-​is Istir tekka-​d seg wat Isṛayil. Dɣa yuɣ awal i Haman. Yessufeɣ-​ed lqanun ara yessengren At Isṛayil akken ma llan deg yiwen wass.

Mi gesla Murdaxay s lqanun-​agi yetqelleq aṭas. Iceggeɛ ihi ɣer Istir, yenna-​yas: ‘Ṛuḥ s agellid, ḥellel-​it akken a ɣ-​isellek.’ Yuɣ lḥal di lqanun n Faras, win ara ibedden zdat n ugellid mebla ma yeţwaɛreḍ ad immet. Ɣas akken, Istir tṛuḥ ɣer ugellid Aḥacwiruc. Mi ţ-​iwala ugellid, yeẓẓel aɛekkaz-​is n ddheb ɣur-​es akken a d-​ibeggen belli ur teţmeţţat ara. Imiren Istir teɛreḍ agellid akk-​d Haman ɣer yiwen imensi ameqran. Mi llan teţţen, yesteqsa-​ţ ugellid d acu i tebɣa. Istir tenna-​yas belli a s-​d-​terr lǧawab ma iṛuḥ-​ed azekka-​nni neţţa d Haman s imensi nniḍen.

Deg imensi-​yagi wis sin, Istir tenna i ugellid: ‘Atan qesden a ɣ-​mḥun nekk d wegdud-​iw.’ Mi gesla i wannect-​agi, agellid yerfa aṭas, dɣa yesteqsa: ‘Anwa akka ara ixedmen lḥaǧa yecban tagi?’

Istir terra-​yas: ‘D amcum-​agi Haman, aɛdaw-​nneɣ!’

Tura agellid Aḥacwiruc yerfa akteṛ. Dɣa yumeṛ ad nɣen Haman. Mbeɛd, agellid yefka i Murdaxay amkan wis sin di tgelda-​s. Ḥaca neţţa i gellan nnig-​es. Murdaxay yessufeɣ-​ed yiwen lqanun i gserrḥen i wat Isṛayil ad dafɛen ɣef yiman-​nsen, ass-​nni ideg ara bɣun a ten-​nɣen yeɛdawen-​nsen. Mi walan belli Murdaxay yuɣal tura d ameqran, aṭas i gɛawnen At Isṛayil, dɣa menɛen seg ifassen n yeɛdawen-​nsen.

Adlis n Istir.