NAQ laj Esdras maajiʼ nawulak saʼ li tenamit Jerusalen, laj Mardoqueo ut li xʼEster wankebʼ xwankil saʼ li tenamit Persia. Li xʼEster wank choʼq rixaqil li awabʼej ut laj Mardoqueo yook chi jolomink rikʼin li awabʼej. Chanru kikʼulmank aʼin?

Toj kachʼin li xʼEster naq kikamk li xnaʼ xyuwaʼ, joʼkan laj Mardoqueo, jun rehebʼ li xkomon, kikʼirisink re. Laj Asuero aʼan li awabʼej re Persia ut wank jun li rochoch saʼ li tenamit Susa. Laj Mardoqueo wank choʼq moos rikʼin li awabʼej. Saʼ jun kutan li xVasti inkʼaʼ kiʼabʼink chiru laj Asuero, li xbʼeelom, joʼkan naq li awabʼej aʼin kixsikʼ jun chik rixaqil. Ma nakaanaw ani kixsikʼ? Kixsikʼ jun li chʼinaʼusil ixqaʼal, xʼEster xkʼabʼaʼ.

Ani li qʼetqʼet aj winq, li yookebʼ xkʼeebʼal xloqʼal? Li winq aʼin, aj Haman ut wank xwankil saʼ li tenamit Persia. Laj Haman traj naq laj Mardoqueo tixwiqʼibʼ ribʼ chiru. Laj Mardoqueo kixkʼoxla naq moko xkʼulubʼ ta laj Haman xkʼeebʼal xloqʼal xbʼaan naq maaʼus xnaʼlebʼ. Laj Haman kichalk xjosqʼil naq laj Mardoqueo inkʼaʼ kixwiqʼibʼ ribʼ chiru. Joʼkan naq, ma nakaanaw kʼaru kixbʼaanu?

Laj Haman kixyoobʼ aatin chiru li awabʼej ut kixye re: ‹Ebʼ laj Israel maaʼusebʼ xnaʼlebʼ ut inkʼaʼ nekeʼabʼink chiru li chaqʼrabʼ xaakʼe. Joʼkan naq tento teʼkamq›. Abʼan laj Asuero, li awabʼej, inkʼaʼ naxnaw naq li xʼEster, li rixaqil, kiyoʼlaak saʼ li tenamit Israel. Li awabʼej kixpaabʼ re laj Haman, joʼkan naq kixtaqla xyeebʼal naq teʼkamq chixjunilebʼ laj Israel.

Laj Mardoqueo kiʼok xkʼaʼuxl naq kirabʼi chirix li chaqʼrabʼ li kixtzʼiibʼa li awabʼej. Joʼkan naq kixtaqla xyeebʼal re li xʼEster: ‹Aatinan chirix li qatenamit, re naq tookoleʼq›. Saʼ li chaqʼrabʼ re Persia tzʼiibʼanbʼil naq wi jun li winq malaj ixq traj aatinaq rikʼin li awabʼej, abʼan inkʼaʼ bʼoqbʼil xbʼaan, chʼolchʼo naq tkamq. Abʼan li xʼEster kiʼok rikʼin li awabʼej, usta inkʼaʼ bʼoqbʼil. Naq li awabʼej kiril ru xʼEster kixyeʼ li xxuqʼ re oor re naq inkʼaʼ tkamsiiq li rixaqil. Chirix chik aʼan, li xʼEster kixbʼoq chi waʼak li awabʼej ut laj Haman, tojaʼ naq li awabʼej kixye re li xʼEster naq tixye re kʼaru traj rikʼin. Li xʼEster kixye re, naq tixchʼolobʼ chiru, wi teʼchalq wiʼ chik wulaj chi waʼak rikʼin.

Saʼ li waʼak aʼan li xʼEster kixye re li awabʼej: ‹Teʼxsach lintenamit ut tineʼxkamsi›. Li awabʼej kichalk xjosqʼil naq kirabʼi aʼin, joʼkan naq kixye: ‹Ani tbʼaanunq aawe aʼan?›

Li xʼEster kixye: ‹Laj Haman, li xikʼ naʼilok qe ut maaʼus xnaʼlebʼ›.

Kʼajoʼ naq kichalk xjosqʼil li awabʼej, joʼkan naq kixtaqla xkamsinkil laj Haman. Chirix chik aʼan, li awabʼej kixkʼe laj Mardoqueo chi jolomink rikʼin saʼ li xʼawabejilal. Laj Mardoqueo kixbʼaanu jun li chaqʼrabʼ, re naq ebʼ laj Israel teʼruuq chi yalok re xkolbʼalebʼ xyuʼam. Naq wank chik xwankil laj Mardoqueo yalaq ani kitenqʼank rehebʼ laj Israel, joʼkan naq keʼkoleʼk chiruhebʼ li xikʼ nekeʼilok rehebʼ.