BETO vutuka fyoti mwa bamvula na ntwala nde Esdras kwenda na Yerusaleme, na ntangu Esther vandaka mfumu-nkento ya kintinu ya Baperse mpi mpangi na yandi Mardochée muntu ya kuluta nene na nima ya ntotila. Beto tala nki mpila bantu ya Israele yina kumaka bantu ya nene.

Ntangu yandi vandaka mwana ya fyoti, Ester kumaka nsyona, mpi muntu sansaka yandi vandaka Mardochée. Ntotila Assuerus vandaka na nzo ya kitoko na Suse mpi Mardochée vandaka mosi ya bansadi na yandi. Kilumbu mosi, mfumu-nkento Vasti buyaka na kulemfukila ntotila. Assuerus solaka sambu na yau, mfumu-nkento yankaka. Beno zaba nani yandi solaka? Esther, sambu yandi vandaka kitoko.

Beno kemona muntu yai ya lulendo ya bantu yankaka kefukimina? Yau kele Haman, muntu mosi ya nene na kintinu ya Baperse. Haman kekinga nde Mardochée kutelama mpi kufukimina yandi dyaka. Kansi yandi bikalaka ya kuvanda: yandi kebuya na kupesa lukumu na muntu ya mbi bonso Haman. Haman mewa makasi. Yandi kebaka lukanu ya mbi ya kufwa bantu.

Haman kwendaka kusila bantu ya Israele mambu ya luvunu na Assuerus. Yandi tubaka nde: ‘Kele na kikanda mosi kezitisa bansiku na nge ve. Beto fwete fwa bau.’ Assuerus vandaka kuzaba ve nde nkento na yandi Esther vandaka muntu ya Israele. Ntotila widikilaka Haman mpi basisaka nsiku ya kufwa bana ya Israele yonso na kilumbu mosi.

Ntangu Mardochée kuwaka nsiku yina, yandi waka mpasi mingi. Ebuna Yandi tindaka ndinga na Esther nde: ‘Kwenda na ntotila mpi bondila yandi na kugulusa beto.’ Kansi, na bansiku ya Baperse, muntu fwanaka ve kukota na nzo ya ntotila kana yandi mebingisa yandi ve. Muntu yina vandaka kukwenda kana bo mebinga yandi ve, vandaka kufwa. Kansi, Esther kwendaka. Ntangu ntotila monaka Esther yandi songaka yandi nkawa na yandi; kidimbu yina monisaka nde yandi tafwa ve Esther. Esther bingaka ntotila ti Haman na nkinsi. Na nkinsi yina, ntotila yulaka yandi mambu yina yandi vandaka na yau na ntima. Esther tubaka nde yandi tasonga ntotila dyambu yango kana yandi ti Haman kukwisa dyaka na nkinsi yankaka na kilumbu yina kulandaka.

Na nkinsi ya zole, Esther tubaka na ntotila nde: ‘Kikanda na mono mosi kezola kumana.’ Ntotila kuwaka makasi mpi yandi yulaka nde: ‘Nani kezola kusala mambu yina?’

Esther vutulaka nde: ‘Yau kele muntu ya mbi yai Haman, mbeni na beto!’

Ntangu yai ntotila kuwaka mpenza makasi. Yandi pesaka nswa na kufwa Haman. Na nima yandi kumisaka Mardoché muntu ya nene ya kulanda yandi. Mardochée basisaka nsiku ya mpa yina vandaka kupesa nswa na bana ya Israele na kunwana na kilumbu yina bau takwisa sambu na kufwa bau. Sambu Mardochée kumaka muntu ya nene, bantu mingi sadisaka bana ya Israele, mpi bau gulukaka na maboko ya bambeni na bau.