TA REKE tũcoke mĩaka mĩnyinyi na thutha, mbere ya Ezara gũthiĩ Jerusalemu. Moridekai na Esiteri maarĩ Aisiraeli me igweta mũno thĩinĩ wa Ũthamaki wa Perisia. Esiteri nĩwe mũtumia wa mũthamaki, na mũihwa wake Moridekai nĩwe wa kerĩ ũthamaki-inĩ. Reke tuone ũrĩa kwahanire.

Aciari a Esiteri maakuire arĩ kaana kanini mũno, na kwoguo Moridekai nĩwe wamũrerire. Ahasuerusu mũthamaki wa Perisia, aarĩ nyũmba ya ũthamaki itũũra-inĩ rĩa Shushani, nake Moridekai aarĩ ũmwe wa ndungata ciake. Mũthenya ũmwe Vashiti mũtumia wa mũthamaki ndaigana kũmwathĩkĩra, na nĩũndũ ũcio mũthamaki agĩthura mũirĩtu ũngĩ mwerũ atuĩke mũtumia wake. Nĩ ũũĩ mũtumia ũrĩa aathurire? Ĩĩni, na githĩ ti Esiteri ũrĩa waarĩ mũthaka mũno.

Nĩ ũrona ndũrĩka ĩno andũ marainamĩrĩra haha? Nĩ Hamani. Aarĩ mũndũ wĩ igweta mũno thĩinĩ wa Perisia. Hamani arenda Moridekai, ũyũ ũrona aikaire thĩ haha o nake amũinamĩrĩre. No ĩndĩ Moridekai ndangĩtĩkĩra. Ndarona arĩ wega kũinamĩrĩra mũndũ mũũru ũguo. Ũndũ ũcio ũgĩtuuria Hamani mũno. Na ũũ nĩguo eekire.

Hamani aaheire mũthamaki ũhoro wa maheni wĩgiĩ Aisiraeli. Oigire atĩ, ‘Nĩ andũ oru matathĩkagĩra watho waku. Maagĩrĩirũo nĩ kũragwo.’ Magegania nĩ atĩ Ahasuerusu ndoĩ atĩ mũtumia wake Esiteri aarĩ Mũisiraeli. Kwoguo agĩthikĩrĩria Hamani, akĩhĩtũkithia watho mwerũ wa atĩ mũthenya mũna Aisiraeli othe moragwo.

Rĩrĩa Moridekai aaiguire ũhoro wa watho ũcio-rĩ, nĩ aagegire mũno. Agĩtũmana ndũmĩrĩri kwĩ Esiteri ũũ: ‘No mũhaka wĩre mũthamaki, na ũmũthaithe atũhonokie.’ Watho wa Perisia ndwetĩkĩrĩtie mũndũ o na ũ atonye kwĩ mũthamaki atetĩtwo. No ĩndĩ Esiteri nĩ aatonyire o na atarĩ mwĩte. Mũthamaki nĩ aarũgamirie thimbũ yake na igũrũ, na ũguo nĩ ta kuuga Esiteri ndakũragwo. Esiteri agĩgĩta mũthamaki na Hamani iruga-inĩ inene mũno. Hĩndĩ ĩyo mũthamaki akĩũria Esiteri amũhoe kĩrĩa gĩothe kĩa mũbatiĩ. Esiteri akĩmũcokeria atĩ nĩakamwĩra kĩrĩa kĩmũbatiĩ angĩkorũo we na Hamani nĩmagoka iruga-inĩ rĩa mũthenya ũcio ũngĩ.

Esiteri agĩkĩĩra mũthamaki marĩ iruga-inĩ atĩrĩ: ‘Niĩ na andũ akwa nĩ tũkũragwo.’ Mũthamaki akĩrakara akĩũria atĩrĩ, ‘Nũũ ũngĩrota gwĩka ũguo?’

Esiteri agĩcokia atĩrĩ, ‘Mũndũ ũcio, thũ ti ĩngĩ, nĩ mũndũ ũyũ mũũru Hamani!’

Rĩu mũthamaki akĩng’ũrĩka mũno makĩria. Agĩathana atĩ Hamani oragwo. Thutha ũcio, mũthamaki agĩtua Moridekai wa gĩtĩ gĩa kerĩ kuuma kũrĩ we. Rĩu Moridekai akĩbanga atĩ watho mwerũ ũgĩe, ũrĩa wahotithirie Aisiraeli marũĩrĩre mĩoyo yao mũthenya ũrĩa matuĩkĩte nĩ mekũragwo. Tondũ rĩu Moridekai nĩ mũndũ wĩ igweta mũno, andũ aingĩ nĩ maateithĩrĩirie Aisiraeli, na makĩmagitĩra kuuma kũrĩ thũ ciao.