NATU shuneni manga konima omido donhumba fimbo Esra a li ina ya kuJerusalem. Mouhamba waPersia omwa li Ovaisrael vavali va tumbala neenghono. Omadina avo oMordekai naEster. Ester okwa li omumbada wohamba, ofimbo mhedi yaye, Mordekai, a li omutivali wohamba mouhamba waPersia. Natu ka taleni kutya osho osha li sha enda ngahelipi.

Ovadali vaEster ova li va fya fimbo a li munini. Onghee hano, okwa kala ta filwa oshisho kuMordekai. Pefimbo olo, Ahasveros oye a li ohamba yaPersia. Ombala yaye oya li moshilando shedina Susan. Mordekai okwa li umwe womovapiya vohamba. Efiku limwe, omukulukadi wohamba wedina Vasti ka li a dulika kohamba. Okudja opo, ohamba oya li ya konga omukulukadi umwe. Mbela ou shi shii kutya olyelye a li a kongwa kohamba? Heeno, oya li ya konga omukainhu muwa, omunyasha Ester.

Ndele mbela ou wete mefano olo omulumenhu oo e na ounhwa nokwa hala ovanhu ve linyongamene kuye? Edina laye oHaman. Haman okwa li omulumenhu a fimana neenghono muPersia. Mbela ou wete Mordekai ta tale kuHaman mefano olo? Haman okwa li yo a hala Mordekai e linyongamene kuye. Ndele Mordekai ka li e shi ninga, molwaashi okwa li e wete kutya osha puka okulinyongamena omukolokoshi a tya ngaho. Onghee hano, Haman okwa li a handuka neenghono eshi Mordekai ine linyongamena kuye. Natu ka taleni kutya Haman okwa ka ninga po shike.

Haman okwa ka lombwela ohamba oipupulu ta lundile Ovaisrael, ta ti: ‘Ovaisrael kave shi ovanhu vawa, molwaashi ihava dulika keemhango doye. Ove na ashike okudipawa.’ Ahasveros ka li e shi shii kutya omukulukadi waye, Ester, okwa li Omuisrael. Onghee hano, okwa pwilikina kuHaman nokwa tota po omhango oyo tai ufa kutya Ovaisrael aveshe ove na oku ka dipawa mefiku lonhumba.

Mordekai okwa li a handuka neenghono eshi a uda kombinga yomhango oyo ipe. Onghee hano, okwa tumina Ester etumwalaka a ti: ‘Ou na okulombwela ohamba, ndele to i indile i tu xupife.’ Omhango yOvapersia kaya li tai pitike nande omunhu keshe a ka talele po ohamba, shapo okuninga a shivwa. Ndele nande ongaho, Ester okwa li a ya koshipala shohamba nonande ka li a shivwa. Eshi Ester e uya kohamba, ohamba oya yelula odibo yayo yoshingoli pombada, osho sha li sha hala okutya Ester ita ka dipawa. Ester okwa li a shiva ohamba naHaman koitendele inene. Eshi efiku loitendele la fika, ohamba oya li ya lombwela Ester fimbo tava li kutya na pule keshe osho a hala i mu ningile. Ester okwa nyamukula kutya ota ka lombwela ohamba eshi a hala i mu ningile ngeenge ohamba oye uya vali koitelekela naHaman mefiku tali landula.

Mefiku la landula ko fimbo Haman ve li poshililo nohamba, Ester okwa lombwela ohamba a ti: ‘Ame noshiwana shange ohatu ka dipawa.’ Ohamba oya handuka neenghono, ndele tai mu pula tai ti: ‘Olyelye a hala okuninga oshinima sha tya ngaho?’

Ester okwa nyamukula a ti: ‘Omutondi wetu, omukolokoshi ou Haman!’

Ohamba oya li ya handuka neenghono noya yandja elombwelo kutya Haman na ka dipawe. Okudja opo, ohamba oya lenga Mordekai a ninge omutivali wayo mouhamba. Mordekai okwa li a fya oshisho opo pa totwe diva omhango ipe oyo tai popile Ovaisrael vaha dipawe mefiku olo ngeno va li ve na okudipawa. Ndele molwaashi Mordekai okwa li omunenenhu muPersia, ovanhu vahapu ova li va kwafela Ovaisrael nova xupifwa momake ovatondi vavo.