TWAYA tubweleko pacheche ku myaka ya kunyuma Ezela saka akyangye kuya ku Yelusalema. Modekai ne Eshita bajinga bena Isalela banemene bingi mu bufumu bwa mu Pelisha. Eshita wajinga muka mfumu, ne kolojanji aye Modekai wajinga wa kibiji kwi mfumu. Twaya tumone byo kyaikele.

Bansemi ba kwa Eshita bafwile saka akijitu mwanyike, bino Modekai ye wamukomeshe. Ahaselusa mfumu wa mu Pelisha, wajinga na kipango mu muzhi wa Shushani, ne Modekai wajinga umo wa mwingilo wanji. Juba jimo muka mfumu aye Vashiti walekele kumukokela, onkao mambo mfumu wasajile wa mukazhi ungi kwikala mukazhanji. Nanchi wamuyuka wa mukazhi ye asajile nyi? Ee, kamwale walamba Eshita.

Nanchi wamumona uno wamulume ubena kwitota kabiji ne bantu ye babena kufukamina nyi? Awe ke Hamane. Awe wamulume wajinga wanema bingi mu Pelisha. Hamane wakebelenga Modekai, awe ye wamona waikala pape, amba naye amufukamine. Bino Modekai kechi waswile ne. Walangulukile’mba kechi kyawama kufukamina muntu watama ne. Akino kyalengejile Hamane kuzhingila bingi. Onkao mambo abino byo byo aubile.

Hamane wabujile mfumu bya bubela pa bena Isalela. Waambile’mba: ‘Abe bantu batama bingi kechi bakokela mizhilo yenu ne. Bafwainwa kufwa.’ Ahaselusa kechi wayukile amba Eshita wajinga mwina Isalela ne. Onkao mambo waumvwijile Hamane, kabiji walengele muzhilo wa kuba’mba bena Isalela juba jimo bakepaiwe.

Modekai byo aumvwine uno muzhilo, wazhingijile bingi. Watumine muluwe kwi Eshita amba: ‘Wafwainwa kwambila mfumu, ne kumulomba’mba etupulushe.’ Mu Pelisha muzhilo wakainye kuya na kumona mfumu kwa kubula lūsa. Bino Eshita waileko kwakubula kumwita. Mfumu watambikile ndondo ya ngolode kwi Eshita, ko kuba’mba kechi wafwainwe kwipaiwa ne. Eshita waichile mfumu ne Hamane ku kijiilo kikatampe. Akwa ku kijiilo mfumu wamwipwizhe Eshita amba amubule bukwasho bo akebelenga kwi aye. Eshita waambile’mba nkemubula inge anweba ne Hamane mukeye ku kijiilo kikwabo kesha.

Ku kyokya kijiilo Eshita waambijile mfumu amba: ‘Amiwa ne bantu bami basaka kwitwipaya.’ Mfumu wazhingijile. Waipwizhe’mba: ‘Ñanyi ukeba kuba kintu kyabula kufwainwa?’

Eshita waambile’mba: ‘Awe yenka wamulume, mulwanyi, watama Hamane.’

Pano mfumu wazhingijile bingi. Wakambizhizhe’mba Hamane bamwipaye. Pakupita kwa kimye, mfumu wabikile Modekai ke wa bubiji mu bukalama bwanji aye mwine. Modekai wabikileko muzhilo wafwainwe kulengela bena Isalela kulwilako bumi bwabo pa juba jo bafwainwe kwibepaya. Pano Modekai byo aikele kinemanga, bantu bavula bakwashishe bena Isalela, ne kwibazhikijila ku balwanyi babo.