TUUPA mi Ɛsɛla kua Chulusalɛm, nyɛ yɔŋnuŋndo wa hoo ni. Mɔdikaya nda Ɛsta Isɔluɛitiiyaa nda wa ni. Wanaa sɔwɛa pila nda wa o masaleŋ Paatiaa niŋ ni. Ɛsta, lanɔɔ masaa o wa ni. Mɔdikaya bom ndɔ yɛ, masa diiŋndɔɔ o wa masaa ikɛi ni. Ŋ tofaŋndɔ mɛɛ hei looku yɔŋnɔŋ yɛ.

Ɛsta wa o pɔmbɔ mi finya ndɔ a kala ndɔ wu. Mɔdikaya bom ndɔ lo ndu niŋ mandaa ni tei mbo sul kaasoŋnɔ. Ahasaliɔɔ, masa Paatiaŋnda ndoo nɔ chiɛi bɛndoo Sushaŋ chiee. Nduyɛ, Mɔdikaya wa wanaa nduaa walla o pilɛ teleŋ koŋ ni. Mɛɛ paale pilɛ mi Vasitai kɛɛ veelu Ahasaliɔɔ pɔnɔ ndɔɔ. Le hei, mi masaa kɛɛ ndu. Mi masaa yeema lanɔ cheleŋ chuaa. A sina pa wana ndoo chua wo? Ɛsta ndoo chua ni. Ɛsta yɛ chua laandu kɛndɔɔ pila o wa ni.

Nuawɔ po heelaŋ bɛndu sim hoo wo. Waŋnda haa cho tuŋndɔŋndo naa ndu cha. Hemaŋ cho hoo ni. Wana sɔwɛɔ pila o cho o lɛŋnde Paatiandeŋ niŋ ni. Mɔdikaya cho hoo ichali ni. Hemaŋ yeema mi Mɔdikaya bɛɛ tuŋnduŋ maa a tuaa. Kɛ o tosa le. Mi Mɔdikaya cha ndi maa i cho suɛi wɔɔŋ le tuŋndɔŋndo po heelaŋ waa naa lachi. Mi hei tɛɛmbuu Hemaŋ kɔllo tau. Le hei, mbo tosa suɛi pum.

Mi Hemaŋ kɔ dimul masaa choolaŋ a Isɔluɛitiiya okɔɔ aa: ‘Wanaa wɔɔŋnda pila Isɔluɛitiiya cho ni. A bii sawa le. A nɔ ma sɔla piɔmndo.’ Ahasaliɔɔ ndoo sina maa Isɔluɛinɔ le Ɛsta wɛɛŋ ndɔ wa le. Le hei, mbo yaŋ Hemaŋ nilaŋ. Mɛɛ mi masaa poonyiaa paale Isɔluɛitiiya kpou nɔ ma sɔla piɔmndo leŋ.

Mɛɛ Mɔdikaya tuei a sawaa hoo okɔɔ, mbo tambu kɔl. Le saboo hoo, mbo yɔŋ yooŋgoo o Ɛstalo aa: ‘Dimul masaa a hei okɔɔ, nduyɛ ma nyɔɔlu ndu mbo kiindiaa naa.’ O naamu Paatiaŋnda niŋ yɛ, mɛɛ mi masaa veelu num o ndulo chiɛiyo malaŋ ŋ kua. Te waŋndo kuɛ lende pɛ mbo veelu ndu le, a dii ndu. Kɛ Ɛsta ndu, masaa veelu ndu le mbo luɛi o ndulo chiɛiniŋ. Mɛɛ o luɛi, mi masaa yulul ndu tinda ndɔɔ, koŋ chɔm ni maa a cho ndu diyɔɔ le. Mɛɛ mi Ɛsta veelu masaa a Hemaŋ le nyɛdiaa dio. Mi masaa nyuna Ɛsta le mbo dimul ndu nyɛ o yeema wo. Mi Ɛsta mulul ndu maa o cho nyɛdiaa toosiaa paale cheleŋ mbo veelu ndu a Hemaŋ kpe, okoŋ, mbo dimul ndu nyɛ o yeema wo.

O nyɛdiaa koŋ dio niŋ, mi Ɛsta dimul masaa aa: ‘Waŋndo tuu le ya diyɔɔ a wanaa niaa latulu kpede.’ Mɛɛ masaa tuei hei, mbo tambu kɔl tau. Mɛɛ mbo nyuna ndu aa: ‘O nɛɛnɛ kɛɛsiaa yɛ le keŋ tosaa?’

Mi Ɛsta mulul ndu aa: ‘Hemaŋ chal hoo wo kpeekpei kɛɛsiaa keŋ ni.’

Mi masaa duaunuŋ tumbe tau. Le hei, mi masaa dimul waŋnda le ma dii Hemaŋ. Mɛɛ nda dii Hemaŋ, mi masaa miŋgi Mɔdikaya o fondaŋ ndɔɔ. Mɔdikaya wa niŋ masa diiŋndɔɔ o masale ndɔleŋ niŋ ni. Mɛɛ Mɔdikaya kandu wallo nda masaa, mbo tosa mi sawa sɛnɛiyo poonyiaŋ. Mi sawa sɛnɛi koŋ dimi maa Isɔluɛitiiya nɔ ma chɔulaba le di ndaa o paale ndaa dimi le nda diyɔɔ leŋ choo. Le sabu Mɔdikaya cho niŋ masa diiŋndɔɔ masaa ikɛiyo, mi wanaa bɔɔ bɔɔ mala Isɔluɛitiiya chɔulabaa, okoŋ, ma piŋi nda yaamɔwaa ndaa o ba.