Icisimicisyo 82: Modekai na Esita
NGATUBWELELEKO kunuma imyaka inini ili Esila tangabwelelamo ku Jelusalemi. Modekai na Esita baIsilaeli abacindamisye mu bufumu bwa Pasai. Esita ni mukolo, na Modekai umufyala wakwe enka lukoso ewa bubili mu makosa ku mfumu. Ngatubone ifi ici cacitikile.
Abafyasi bakwe Esita baalifwile ili aali umwanice makosa, namulifyefyo Modekai e wamulele. Ekasyuilusi, imfumu ya Pasai, ilikwete icipango mu musi wa Syusyani, kabili Modekai ni umo uwa bapyungisi baiko. Pano, kambi kasuba Fasiti umukasi wa mfumu tayumfwilile, popele imfumu yasalulula umukasi wa bukumo ukuba mukolo waiko. Kani wamwisiba umwanakasi yasalulula? Inya, mulombe umwanice Esita.
Kani wamubona uyu mwalalume wakulitota woyo abantu balukwinamisyako? Uyu ni Amani. Mwalalume umucindeme makosa mu Pasai. Amani alukufwaya Modekai, woyo ulukubona uwikele apa, naye ukwinamisya kuli ye. Pano Modekai tacicitepo. Talukucilanguluka ukube’cilungeme ukwinamisya ku mwalalume imbifi koti ni uyu. Ici calenga Amani ukukalipa ukwakuti. Kabili ifi efi acita.
Amani alabila ifya bufi ku mfumu pa baIsilaeli. Alabila ati: ‘Bantu ababipile abatabalamapo amafunde enu. Balyelelwe ukufwa.’ Ekasyuilusi tesibile ati Esita umukasi wakwe muIsilaeli. Popele akutika kuli Amani, kabili apange’funde ati pa kasuba kamo bonse abaIsilaeli bakepaiwa.
Ili Modekai aumfwa ili ifunde, akalipa ukwakuti. Atuma amasiwi kuli Esita ati: ‘Ulyelelwe ukubula imfumu, ne kuikombetela ati itupulusye.’ Kupulaisya ifunde mu Pasai ukuya mu kubona imfumu kani tawitilwe. Pano Esita aya ukwakubulo’kwitwa. Imfumu yatambika inkoli ye golide kuli ye, icilukkwalula ati tabamwipaye. Esita aita imfumu na Amani ku kusefya ukukulu. Kulya imfumu yaipusya Esita uluse ulu alukufwaya ukufuma kuli yo. Esita alabila ati akaibula kani yo na Amani bakaye ku cakulya nacimbi ubusiku bwakonkapo.
Pali kuko ukusefya Esita abula imfumu ati: ‘Nebo ne bantu banji tukepaiwa.’ Imfumu yakalipa. Yaipusya ati: ‘Mba ninani uulukufwaya ukucite’cintu icakube’fyo?’
Esita alabila ati: ‘Umwalalume, umupate, ewuyu imbifi Amani!’
Pano imfumu mucinenene yakalipa. Yafunda ati Amani epaiwe. Panuma, imfumu yaikalika Modekai enka lukoso ukuba uwa bubili mu makosa kuli yo. Modekai eli asininkisya ati ifunde lya bukumo lipangwe ilya kusuminisya abaIsilaeli ukulwila imyeo yabo pa kasuba ako bali ne kwipaiwa. Pakuti Modekai pano mwalalume umucindeme, abantu abengi baofwa abaIsilaeli, kabili babapulusya ku balwani babo.
Ibuku lya mu Baibolo ilyakwe Esita.
Ifyakwipusya
- Kani Modekai na Esita nibani?
- Mba nindo Imfumu Ekasyuilusi ilukufwaila umukasi wa bukumo, kabili ninani yasalulula?
- Kani Amani ninani, kabili nindo akalipila makosa?
- Mba nilisa ifunde ilyapangwa, kabili nifindo Esita acita panuma yakupokelela amasiwi ukufuma kuli Modekai?
- Mba nifindo fyacitika kuli Amani, kabili nifindo fyacitika kuli Modekai?
- AbaIsilaeli bapuluka syani ku bapate babo?
Ifyakwipusya na fimbi
- Pendeni Esita 2:12-18.
Kani Esita alilangisye syani ifi cicindeme ukuba ne “ifyamupasi utekenye uwabutende”? (Esita 2:15; 1 Pet. 3:1-5)
- Pendeni Esita 4:1-17.
Koti nififilya Esita apelwe’mpindi yakulangisya ifya kupempela kwa cine, kani fwebo muli bulelo tulikwete syani impindi yakulangisya ukulipela kwesu na bucine kuli baYehoba? (Esita 4:13, 14; Mat. 5:14-16; 24:14)
- Pendeni Esita 7:1-6.
Kani abantu ba baLesa abengi muli bulelo nabo balabika syani imyeo yabo mulupi ili balukubakululusya, koti nififilya cali kuli Esita? (Esita 7:4; Mat. 10:16-22; 1 Pet. 2:12)
