ມາເຣໂດເກແລະເອເຊເທເຣ
ບົດ 82
ມາເຣໂດເກແລະເອເຊເທເຣ
ໃຫ້ເຮົາເບິ່ງຍ້ອນຫຼັງສອງສາມປີ ກ່ອນເອເຊດຣາເຊໄປເຢຣຶຊາເລມ. ມາເຣໂດເກແລະເອເຊເທເຣເປັນຊົນຍິດສະລາເອນສຳຄັນທີ່ສຸດໃນອານາຈັກແຫ່ງເປເຣເຊ. ເອເຊເທເຣເປັນມະເຫສີ ແລະມາເຣໂດເກຊຶ່ງເປັນລູກອ້າຍລູກນ້ອງກັບນາງເປັນຜູ້ມີອຳນາດສູງຮອງກະສັດ. ໃຫ້ເຮົາເບິ່ງວ່າເຫດການເປັນມາຢ່າງໃດ.
ພໍ່ແມ່ຂອງເອເຊເທເຣຕາຍໄປເມື່ອນາງຍັງເປັນນ້ອຍຫຼາຍຢູ່ ແລະມາເຣໂດເກໄດ້ລ້ຽງນາງ. ອາຊຶເອຣຶເຊເປັນກະສັດແຫ່ງເປເຣເຊ ມີລາຊະວັງຢູ່ໃນເມືອງຊຶເຊມະຫານະຄອນ ແລະມາເຣໂດເກເປັນມະຫາດເລັກຄົນນຶ່ງ. ເອົາລະ ມື້ນຶ່ງນາງວາເຊຕີມະເຫສີຂັດຂືນຄຳສັ່ງຂອງກະສັດ ດັ່ງນັ້ນກະສັດຈຶ່ງເລືອກເອົາມະເຫສີຄົນໃໝ່ເພື່ອຕັ້ງໃຫ້ເປັນລາຊີນີ. ເຈົ້າຮູ້ຈັກສະຕີຜູ້ທີ່ກະສັດເລືອກນັ້ນບໍ? ແມ່ນແລ້ວ ຄືເອເຊເທເຣຍິງສາວຮູບງາມຜູ້ນັ້ນເອງ.
ເຈົ້າເຫັນຊາຍຜູ້ຫົວສູງຄົນນີ້ບໍທີ່ຜູ້ຄົນກົ້ມຕົວລົງຄຳນັບ? ຜູ້ນີ້ຄືຫາມານ. ເຂົາເປັນຄົນສຳຄັນຫຼາຍຜູ້ນຶ່ງໃນເປເຣເຊ. ຫາມານຕ້ອງການໃຫ້ມາເຣໂດເກຜູ້ທີ່ເຈົ້າເຫັນນັ່ງຢູ່ທີ່ນີ້ກົ້ມຕົວຄຳນັບດ້ວຍ ແຕ່ມາເຣໂດເກບໍ່ເຮັດ. ເພິ່ນເຫັນວ່າບໍ່ສົມຄວນທີ່ຈະກົ້ມຕົວລົງຄຳນັບຄົນບໍ່ດີເຊັ່ນນີ້. ນີ້ເປັນເຫດເຮັດໃຫ້ຫາມານຮູ້ສຶກໂກດແຄ້ນຫຼາຍແລະເຂົາຈຶ່ງເຮັດດັ່ງຕໍ່ໄປນີ້.
ຫາມານຕົວະໃຫ້ກະສັດຟັງກ່ຽວກັບຊົນຍິດສະລາເອນວ່າ: ‘ພວກເຂົາເປັນຄົນຊົ່ວຊ້າບໍ່ປະຕິບັດຕາມກົດໝາຍຂອງທ່ານ. ພວກເຂົາຄວນຈະຕາຍ.’ ອາຊຶເອຣຶເຊບໍ່ຊາບວ່າມະເຫສີຂອງທ່ານເປັນຊົນຍິດສະລາເອນ. ດັ່ງນັ້ນກະສັດຈຶ່ງຟັງຄວາມຫາມານ ແລະໄດ້ໃຫ້ອອກກົດໝາຍວ່າ ເມື່ອເຖິງມື້ກຳນົດແລ້ວຊົນຍິດສະລາເອນຈະຕ້ອງຖືກຂ້າຕາຍທັງໝົດ.
ເມື່ອມາເຣໂດເກຊາບຂ່າວກ່ຽວກັບກົດໝາຍນັ້ນ ເພິ່ນກໍ່ມີຄວາມທຸກໃຈຍິ່ງ. ເພິ່ນສົ່ງຂ່າວໄປເຖິງເອເຊເທເຣວ່າ: ‘ເອເຊເທເຣຕ້ອງທູນກະສັດ ແລະຂໍທ່ານຊ່ວຍຊີວິດພວກເຮົາໄວ້.’ ໃນປະເທດເປເຣເຊການເຂົ້າເຝົ້າກະສັດໂດຍບໍ່ໄດ້ຮັບຄຳເຊີນກໍ່ເປັນການຜິດກົດໝາຍ. ແຕ່ເອເຊເທເຣເຂົ້າໄປເຝົ້າໂດຍບໍ່ໄດ້ຮັບຄຳເຊີນ. ກະສັດຍື່ນໄມ້ເທົ້າຄຳຂອງທ່ານໃຫ້ເອເຊເທເຣ ຊຶ່ງໝາຍຄວາມວ່າພະນາງຈະບໍ່ຖືກຂ້າ. ເອເຊເທເຣເຊີນກະສັດແລະຫາມານໄປໃນການລ້ຽງ. ໃນການລ້ຽງນັ້ນກະສັດຕັດຖາມເຖິງສິ່ງໃດທີ່ພະນາງປະສົງຈາກທ່ານ. ເອເຊເທເຣທູນວ່າຫາກກະສັດແລະຫາມານຈະກັບມາການລ້ຽງອີກເທື່ອນຶ່ງໃນມື້ອື່ນຈຶ່ງຈະທູນໃຫ້ຊາບ.
ນະ ການລ້ຽງນັ້ນເອເຊເທເຣທູນກະສັດວ່າ: ‘ຜູ້ຄົນຂອງຂ້າພະເຈົ້າແລະຂ້າພະເຈົ້າຈະຕ້ອງຖືກຂ້າ.’ ກະສັດຂຸ່ນເຄືອງ. ທ່ານຈຶ່ງຖາມວ່າ: ‘ຜູ້ໃດກ້າທີ່ຈະເຮັດຢ່າງນັ້ນ?’
ເອເຊເທເຣທູນວ່າ: ‘ຊາຍທີ່ເປັນສັດຕູກໍ່ຄືຫາມານຄົນຊົ່ວຮ້າຍຜູ້ນີ້.’
ຂະນະນີ້ກະສັດຄຽດແຄ້ນແທ້ໆ. ທ່ານສັ່ງໃຫ້ເອົາຫາມານໄປຂ້າ. ຫຼັງຈາກນັ້ນ ກະສັດຕັ້ງມາເຣໂດເກຂຶ້ນໃຫ້ມີອຳນາດສູງເປັນຜູ້ທີສອງຮອງຈາກທ່ານ. ຄັນແລ້ວມາເຣໂດເກຈຶ່ງຄອຍດູແລໃຫ້ອອກກົດໝາຍໃໝ່ເພື່ອອະນຸຍາດໃຫ້ຊົນຍິດສະລາເອນຕໍ່ສູ້ເອົາຊີວິດລອດໃນມື້ຊຶ່ງກຳນົດໄວ້ວ່າເຂົາຈະຕ້ອງຖືກຂ້າ. ເພາະຂະນະນີ້ມາເຣໂດເກເປັນຄົນສຳຄັນ ຜູ້ຄົນຈຳນວນຫຼາຍຕ່າງກໍ່ຊ່ວຍຊົນຍິດສະລາເອນ ແລະພວກເຂົາກໍ່ໄດ້ພົ້ນຈາກສັດຕູ.
ປະຫວັດເອເຊເທເຣໃນຄຳພີໄບເບິນ.
