Chihande 82

Molotekai naEseta

TUCHIHILUKEKO kunyima chindende shimbu apwile Ezela kanda akinduluke kuYelusalema. Molotekai naEseta vakivo vaIsalele vavalemu chikuma muwangana waPeleja. Eseta ikiye lisano, kaha yayenyi Molotekai, mwanandumbwaise, ikiye muhato wamwangana anakuyula. Tutalenu omwo chapwile.

Visemi jaEseta vafwile shimbu apwile kanyike, kaha Molotekai ikiye namulele. Nganda yamwangana waPeleja, Ahaswelu, yatwama muShushane, kaha Molotekai ali hakachi kavangamba jenyi. Chamwaza, likumbi limwe Vashachi, pwevo lyamwangana, nakane kumwivwilila, kaha mwangana hikusakula pwevo wamuhya apwenga lisano. Unejiva pwevo nasakula tahi? Eyo, litanana wamwaza, Eseta.

Wamumono ou lunga wamituto vali nakufukamina vatu ngwetu? Ikiye Hamane. Himutu wamulemu chikuma muPeleja. Hamane nasake Molotekai, ou uli nakumona natwame aha, amufukamine. Oloze Molotekai keshi kufukamako. Kachimwene nge chakutamo kufukama kulyou mutu wamupiko. Hamane hikusulakana. Kaha omu mukiko mwalinga.

Hamane hikwambulula makuli kuli mwangana hali vaIsalele. Ngwenyi: ‘Ava vatu vavapi vazeneka kwononoka jishimbi jove, vatela kufwa.’ Ahaswelu katachikijile nge puwenyi Eseta naikiye apwa kaIsaleleko. Ngocho nevwilila mukanwa kaHamane, nakutunga lushimbi nge halikumbi linganji vaIsalele vosena vatela kuvajiha.

Molotekai hakwivwa lushimbi kana, himwanyengetela chikuma. Hikutuma mazu kuli Eseta ngwenyi: ‘Mulweze mwangana kaha umulembelele atulwile.’ Chapwa chijila muPeleja kuya nakumona mwangana kuvanga vanakusanyika. Oloze Eseta mwengila chakuhona kumusanyika. Kaha mwangana mwamwolwela mukombo wenyi waulu, kulumbununa nge kanda navamujihako. Eseta mwasanyika mwangana naHamane kukulya chachinene. Kuze mwangana hikuhulisa Eseta ocho mwatonda amuhane. Eseta ngwenyi mwamulweza nge ikiye naHamane naveza kukulya chikwavo hamene.

Hakulya kana Eseta himwalweza mwangana ngwenyi: ‘Etu navana vakwetu vanakutujiha.’ Mwangana napihilila. Ngwenyi: ‘Iyaze nasake kulinga chuma changocho?’

Eseta ngwenyi: ‘Lunga muka-kole, you vene Hamane wamupi!’

Mwangana jino hikutenuka chikuma. Himwavalweza vamujihe Hamane. Kufumaho, mwangana mwalingisa Molotekai kupwa muhato wenyi. Molotekai hikuhakisako lushimbi lwaluhya lwakulingisa vaIsalele valikinge halikumbi vanambe kukavajiha. Molotekai hakupwa mutu wamulemu chikuma, vatu vavavulu hinavakafwa vaIsalele, nakuvayovola kuli vaka-kole javo.

Mukanda wamuMbimbiliya waEseta.