TUKONDOKEI nkhele ko-manima ana, puetyi ankho Esdra eheneende ko Jelusalei. Mordekai na Ester ankho ova Isilayeli vakolela unene mouhamba wo Persia. Ester ankho omukai wohamba, iya Mordekai ankho ulandula mohamba kokutumina. Tutalei oñgeni otyo tyaenda.

Ovo tate ya Ester ankho vankhia puetyi omututu, iya Mordekai emutekula. Asueru ohamba yo Persia ankho una ombala mepundaumbo lio Susã. Iya Mordekai ankho omuundapi wohamba. Onthiki imue Vasti omukai wohamba, ketavelele komulume wae. Moluotyo, ohamba aholovona omukai omukuavo, opo alinge omukai wae. Ove utyii olie omukai aholovona? O Ester, omuhikuena umue omuwa.

Uluete omulume ou, ovanthu vekahi nokunyonga-​mena? Utiwa o Hamã. Hamã omulume umue ankho wakolela unene mo Persia. Hamã ankho uhanda Mordekai omulume ou weete waumphama polutalatu olu, nae anyongame. Mahi, Mordekai ankho kahande. Mokonda ankho utyii okuti katyaviukile okunyongamena omunthu wondingavivi. Otyo tyanumanesa unene Hamã.

Moluotyo, Hamã akapopila ohamba ounkhembi kombinga yova Isilayeli okuti: ‘Ovaisilayeli ovanthu vonondingavivi, kavetavela ovitumino viove. Vena yokuipawa.’ Asueru ankho ketyii okuti omukai wae Ester, omu Isilayeli. Ngotyo, watavela onondaka mba Hamã. Atumu okuhoneka otyitumino tyilekesa onthiki ova Isilayeli aveho vena yokuipawa.

Etyi Mordekai etyiiva, anumana unene. Atumu ondaka ku Ester, ati: ‘Una yokupopia nohamba, okumuita opo etuyovole. ‘Movitumino vio Persia ankho tyapenga unene okukapopia nohamba putyina wahaihanenue. Mahi, Ester aende okukapopia nohamba tyahaihanenwe. Ohamba ayulika Ester notyimuti tyae tyo olu, okulekesa okuti kamaipawa. Iya Ester akongo ohamba, na Hamã opo vakalie kondyuo yae. Puetyi ankho vekahi nokulia, ohamba apulu Ester oityi mahande okuita. Ester emukumbulula okuti, mandyikupopila vala inkha muya vali okulia muhuka.

Monthiki onkhuavo puetyi vekahi nokulia, Ester atolela ohamba okuti: ‘Elongo liange na ame matuipawa.’ Ohamba anumana unene, apulu okuti: ‘Olie wasoka okulinga otyipuka ngotyo?’

Ester ati: Ondyale yetu yetyihinda, omulume ou ondingavivi Hamã.’

Ohamba anumana vali unene. Atumu okuipaa Hamã. Konyima yotyo, ohamba apake Mordekai potyipundi tyavali koutumini. Iya Mordekai atumu okuhoneka otyitumino otyikuavo, okupopila ova Isilayeli opo veliamene putyina veya okuipawa. Mokonda ankho pahe Mordekai omulume wakolela, ovanthu ovanyingi vakuatesako ova Isilayeli. Iya ova Isilayeli avayovoka konondyale mbavo.