MAA yɛzia yɛ nzi yɛhɔ ɛvolɛ ekyi mɔɔ zenle kolaa na Ɛzela ahɔ Gyɛlusalɛm la. Ɛnee Mɔdekae nee Ɛseta a le Yizilayɛma titile mɔɔ wɔ Pɛhyea belemgbunlililɛ ne anu a. Ɛnee Ɛseta le belemgbunli raalɛ, yɛɛ saa belemgbunli ne mɔɔ ɛnee di ebia la ɛnle ɛkɛ a, ɔ ze adiema nrenya ara Mɔdekae a wɔ ɛkɛ a. Maa yɛnlea kɛ ɛhye zile rale la.

Ɛseta awovolɛ wule mekɛ mɔɔ ɔle ekyi la, ɔti Mɔdekae a tetele ye a. Ɛnee Pɛhyea belemgbunli, Zɛzɛse (Ahazelɔse), lɛ belemgbunli sua wɔ suakpole Susa azo, na ɛnee Mɔdekae le ye sonvolɛma ne anu ko. Kenle ko, Vahyetae, belemgbunli ne aye ne, dule belemgbunli ne anloa dole, ɔti belemgbunli ne yele yelɛ fofolɛ yɛle ye belemgbunli raalɛ. Ɛze raalɛ mɔɔ ɔyele ye la ɔ? Ɛhɛe, bɛlɛra kakula kɛnlɛma Ɛseta ɔ.

Asoo ɛnwu nrenya ɛhye mɔɔ memaa ɔ nwo zo mɔɔ menli ɛlɛkoto ye la ɔ? Heeman ɛne. Ɔle sonla kpole wɔ Pɛhyea. Heeman kpondɛ kɛ Mɔdekae, mɔɔ ɛnwu kɛ ɔde ɛkɛ ne la, noko koto ye. Noko Mɔdekae anyɛ zɔ ɛlɛ. Ɛnee ɔze ye kɛ ɔnle kpalɛ kɛ ɔkɛhoto sonla ɛtane zɛhae. Ɛhye manle Heeman vale ɛya kpole. Ɛhye ati mɔɔ ɔyɛle la ɛne.

Heeman hanle Yizilayɛma ne anwo adalɛ edwɛkɛ hilele belemgbunli ne. Ɔhanle kɛ: ‘Bɛnle menli mgbalɛ na bɛnli wɔ mɛla ɛdeɛ ne azo. Ɔwɔ kɛ bɛku bɛ.’ Ɛnee Zɛzɛse ɛnze kɛ ɔ ye Ɛseta le Yizilayɛnli. Yemɔti ɔdiele Heeman ane, na ɔmanle bɛyɛle mɛla bɛhilele kenle mɔɔ ɔwɔ kɛ bɛku Yizilayɛma amuala a.

Mɔɔ Mɔdekae dele mɛla ne anwo bie la, ɔgyegyele ye kpole kpalɛ. Ɔdole Ɛseta nrɛlaleɛ kɛ: ‘Ɔwɔ kɛ ɛka ɛkile belemgbunli ne, na ɛsɛlɛ ye ɛmaa ɔdie yɛ.’ Ɔtia Pɛhyeama mɛla kɛ awie kɛhɔnwu belemgbunli ne, kyesɛ bɛfɛlɛ ye. Noko Ɛseta hɔle mɔɔ ɛnee bɛtɛfɛlɛle ye. Belemgbunli ne kpogyale ye ezukoa nvutuke kpɔma ne zo hilele ye, mɔɔ ɛnee ɔkile kɛ ɔnle kɛ bɛku ye. Ɛseta dole ɛsalɛ vɛlɛle belemgbunli ne nee Heeman hɔle ɛkponledolɛ kpole bie abo. Wɔ ɛkponledolɛ ne abo belemgbunli ne bizale Ɛseta mɔɔ ɔkpondɛ kɛ ɔyɛ ɔmaa ye la. Ɛseta buale kɛ saa ɛhyema ɔ nee Heeman kɛra ye ɛkponledolɛ ne abo bieko a anrɛɛ ɔkɛha ɔkɛhile ye.

Wɔ ɛkponledolɛ zɔhane abo, Ɛseta hanle hilele belemgbunli ne kɛ: ‘Bɛku me nee me menli ne.’ Belemgbunli ne vale ɛya. Ɔbizale kɛ: ‘Ɛnee nwane a ɔdaye ɔyɛ debie zɛhae a?’

Ɛseta buale kɛ: ‘Nrenya ne, kpɔvolɛ ne, a le Heeman amumuyɛ ɛhye!’

Belemgbunli ne akee vale ɛya kpole. Ɔzile ɔ gyakɛ aze kɛ bɛhu Heeman. Amozii, belemgbunli ne yɛle Mɔdekae tumivolɛ mɔɔ ɔnle ɛkɛ a ɔdaye a ɔwɔ ɛkɛ a. Akee Mɔdekae nleanle manle bɛyɛle mɛla fofolɛ mɔɔ maa Yizilayɛma ne adenle bɛko bɛdie bɛ nwo wɔ kenle ne mɔɔ anrɛɛ ɔwɔ kɛ bɛku bɛ la azo. Kɛmɔ ɛnee akee Mɔdekae ɛrayɛ sonla kpole zɛhae la ati, menli dɔɔnwo boale Yizilayɛma ne, na bɛnyianle bɛ ti wɔ bɛ agbɔvolɛ asa nu.