Relato 82: Mardokeo i Ester
LAGA nos bai bèk un par di aña promé ku Esdras a bai Yerusalèm. Mardokeo i Ester ta e dos israelitanan mas importante den e reino di Persia. Ester ta e reina i su primu Mardokeo ta e persona mas poderoso despues di e rei. Laga nos mira kon esei a sosodé.
E mayornan di Ester a muri tempu ku e tabata hopi chikitu, i p’esei Mardokeo a kri’é. Asuero rei di Persia tin un palasio den e stat Susa, i Mardokeo ta un kriá di dje. Wèl, un dia Vasti, esposa di e rei, no a obedes’é, i p’esei e rei a skohe un esposa nobo pa ser reina. Bo sa ken el a skohe? Sí, el a skohe e bunita hóben Ester.
![Haman rabiá ku Mardokeo](https://assetsnffrgf-a.akamaihd.net/assets/l/my/my_PA/82.jpg)
Bo ta mira e hòmber orguyoso ku e pueblo ta bùig p’e? Esei ta Haman. E tabata un hòmber masha importante na Persia. Haman ke pa Mardokeo ku bo ta mira sintá ei tambe bùig p’e. Pero Mardokeo no kier a bùig. E no a haña ku ta bon pa bùig pa un hòmber asina malu. Esei a pone Haman rabia mashá. I esaki ta loke el a hasi.
Haman a konta e rei mentira tokante e israelitanan. Segun Haman: ‘Nan ta mal hende ku no ta obedesé lei. Nan mester ta matá.’ Asuero no tabata sa ku su esposa Ester ta israelita. P’esei, el a skucha Haman i a saka un lei ku a bisa ku mester a mata tur israelita riba un sierto dia.
Ora Mardokeo a tende di e lei, el a bira hopi preokupá. El a manda un mensahe pa Ester: ‘Bo tin ku papia ku e rei i rog’é p’e salba nos.’ Tabata kontra lei na Persia pa bishitá e rei sin invitashon. Pero Ester a bishit’é sin invitashon. E rei a saka su bara di oro p’e, ku ke men ku Ester lo no ser matá. Ester a invitá e rei i Haman pa un bankete. N’e bankete e rei a puntra Ester ki fabor e ke. Ester a bis’é ku lo e pidi su fabor si e rei i Haman bin kome serka dje mañan.
Durante e komementu Ester a bisa e rei: ‘Nan ta bai mata ami i mi pueblo.’ E rei a rabia. El a puntra: ‘Ken tin tantu tribilidat?’
‘Haman, nos enemigu, e mal hende ei! Ester a bisa.
![Reina Ester ta akusá Haman](https://assetsnffrgf-a.akamaihd.net/assets/l/my/my_PA/82a.jpg)
Awor sí e rei a rabia mes. El a manda pa Haman ser matá. Anto e rei a hasi Mardokeo e persona mas poderoso despues di dje. Mardokeo a perkurá pa un lei nobo ser saká pa permití e israelitanan defendé nan bida dia ku lo mester a mata nan. Dor ku Mardokeo a bira un hòmber asina importante, hopi hende a yuda e israelitanan, i nan a skapa for di nan enemigunan.
E buki bíbliko di Ester.
Pregunta
- Ken Mardokeo i Ester tabata?
- Pakiko Rei Asuero tabata ke un esposa nobo, i ken el a skohe?
- Ken ta Haman, i kiko a pon’é rabia hopi?
- Ki lei nan a traha, i kiko Ester a hasi ora el a haña un mensahe di Mardokeo?
- Kiko a sosodé ku Haman, i kiko a sosodé ku Mardokeo?
- Kon e israelitanan a ser salbá for di nan enemigunan?
Preguntanan adishonal
- Lesa Ester 2:12-18.
Kon Ester a demostrá e balor di desaroyá un “spiritu suave i ketu”? (Est. 2:15; 1 Ped. 3:1-5)
- Lesa Ester 4:1-17.
Meskos ku Ester a haña oportunidat pa aktua na fabor di adorashon berdadero, ki oportunidat nos tin awe pa ekspresá nos deboshon i lealtat na Yehova? (Est. 4:13, 14; Mat. 5:14-16; 24:14)
- Lesa Ester 7:1-6.
Kon hopi hende den Yehova su pueblo awe tambe a enfrentá e peliger di ser persiguí, meskos ku Ester? (Est. 7:4; Mat. 10:16-22; 1 Ped. 2:12)