JERUSALENMAN Esdrasqa manaraq richkaptinmi pasaq watakunallapi pasasqanmanta yachasunchik. Persia nacionpiqa Mardoqueowan Estermi Israel casta runakunamanta ancha reqsisqa karqaku. Chay nacionpim Esterqa reina karqa chaynataq primon Mardoqueopas iskay kaq gobiernaqmi karqa. Qawasunchikyá imaynataq chayqa karqa.

Ester warmachallaraq kachkaptinmi tayta-mamanqa wañukurqaku, hinaptinmi Mardoqueoqa churichakuspa uywarqa. Persia nacionpi Asuero sutiyoq reypa palacionqa Susa llaqtapim karqa, chaypim Mardoqueoqa huknin serviqnin karqa. Hinaptinmi huk punchaw Vasti sutiyoq reinaqa qosanta mana kasukurqachu, chaymi reyqa huk sipasta akllarqa paypa rantinpi reina kananpaq. ¿Yachankichu pitataq akllarurqa? Buenamoza Estertamá.

¿Qawachkankichu chay orgulloso runaman runakunapa kumuykusqanta? Payqa Persia nacionpi ancha reqsisqa Aman sutiyoq runam. Payqa munanmi rikusqayki tiyakuq Mardoqueopas paypa ñawpaqninpi kumuykunanta. Mardoqueom ichaqa manam qonqorakuqchu nitaq kumuykuqchu. Paypaqqa manam allinchu mana allin ruraq runaman kumuykuyqa. Chaymi Amanqa anchallataña rabiarurqa. Qawasunchikyá imatam rurarqa.

Amanqa Israel runakunamantam rey Asueroman llullakuspa kaynata willarqa: ‘Mana allin runakunam hinaspa manam leynikitapas kasukunkuchu. Chaynaqa chinkachisqa kanankupaqyá decretaykuy’ nispa. Rey Asuerom ichaqa mana yachanchu Israel castamanta warmin kasqanta. Hinaptinmi Amanpa nisqanta creeruspan, decretota qellqarurqa llapallan Israel casta runakunata señalasqa punchawpi wañuchinankupaq.

Reypa decretasqanmanta Mardoqueo yacharuspanmi sinchita llakikurqa. Hinaspanmi Esterman willachimurqa kaynata: ‘Reyman rispayá rimapayay salvawananchikpaq’ nispa. Persia nacionpi leyman hinaqa reypa kasqanmanqa manam yaykunachu mana qayasqan kaspaqa. Estermi ichaqa mana qayachkaptillan rirqa. Hinaptinmi reyqa makinpi kaq qorimanta tawnanta haywariykuptin wañunan kaptinpas Estertaqa manam wañuchirqakuchu. Chaymanta Esterqa convidoman invitarqa rey Asuerota chaynataq Amantapas. Chaypim reyqa Esterta tapurqa imata mañakusqanta. Esterñataqmi reyta nirqa paqarinnintin convido rurasqanman Amanwan kuska hamuptinku chayraq mañakunanta.

Hinaptinmi chay convidopi Esterqa reyman willarqa kaynata: ‘Ñoqata castaykunatawan kuskatam wañuchiwanqaku’ nispa. Chaymi reyqa piñakuruspan nirqa: ‘¿Pitaq chayna ruray munaq runaqa?’ nispa.

Esterñataqmi nirqa: ‘Chay enemigoyku hinaspa mana allin ruraq runaqa kay Amanmi’ nispa.

Chaymi reyqa llumpayllataña piñakururqa. Hinaspanmi Amanta wañuchinankupaq kamachirqa. Chaymantañam, reyqa Mardoqueota iskay kaq gobiernaq kananpaq churarurqa. Hinaptinmi Mardoqueoqa huk decretota rurarachimurqa Israel casta runakuna señalasqa punchawpi mana wañunankurayku peleanankupaq. Mardoqueoqa reqsisqa runa kaptinmi, achka runakunam Israel casta runakunata yanaparqaku chaymi paykunaqa enemigonkunamanta librakurqaku.