KA OKI ana tatou ki te au mataiti i mua ake ka aere ei a Ezera ki Ierusalema. Ko Moredekai e Esetera te nga tangata Iseraela puapinga roa atu i roto i te patireia o Peresia. Ko Esetera te ariki vaine, e ko Moredekai te rua o te tangata mana mei te ariki mai, okotai tona papa e te papa o Esetera. Ka akara ana tatou e akapeea teia i tupu ei.

Kua mate te nga metua o Esetera iaia e meangiti ua ra, e na Moredekai aia i utuutu. Ko Ahasueru te ariki o Peresia, e are ariki tona i roto i te oire o Susana, e ko Moredekai tetai ona tavini. I na, i tetai ra kare te vaine a te ariki ko Vaseti i akarongo ana iaia, no reira kua iki te ariki i tetai vaine ou ei ariki vaine nona. Kua kite koe i te vaine tana i iki? Ae, ko te mapu manea ko Esetera.

Te kite ra koe i teia tangata ngakau parau ta te tangata e tupou ra ki raro? Ko Hamana teia. E tangata puapinga tikai aia i Peresia. Inangaro a Hamana ia Moredekai, taau e kite ra e noo ra ki raro, kia tupou katoa ki raro iaia. Inara kare a Moredekai e rave i te reira. Kare aia e manako ana e e mea tau i te tupou ki raro i taua tangata kino ra. Kua maani teia ia Hamana kia riri maata. No reira ko teia tana i rave.

Kua pikikaa a Hamana ki te ariki no runga i te ngati Iseraela. ‘E iti tangata kino ratou, kare e akarongo ana i taau au ture,’ i karanga ai aia. ‘Ka tau kia tamateia ratou.’ Kare a Ahasueru i kite e e vaine Iseraela tana ko Esetera. No reira kua akarongo aia kia Hamana, e kua maani aia i tetai ture kia tamate i te ngati Iseraela pouroa a tetai ra.

I te akarongo anga a Moredekai i teia ture, kua taitaia tikai aia. Kua tono aia i tetai karere kia Esetera: ‘E akakite koe ki te ariki, e e pati pakari kiaia kia akaora ia tatou.’ E ture oki i roto ia Peresia te aere kia aravei i te ariki, kia pati roa ia mai koe. Inara kua aere a Esetera, kare i patiia mai ana. Kua oronga mai te ariki i tana rakau auro kiaia, te aiteanga koia oki kare aia i tamateia. Kua pati a Esetera i te ariki raua ko Hamana kia tae mai ki tetai umukai maata. I reira kua ui te ariki kia Esetera e eaa tana e anoano maira iaia. Kua karanga a Esetera e ka akakite aia ki te ariki e me ka aere mai raua ko Hamana ki tetai umukai a te ra e aru maira.

I taua umukai ra kua akakite a Esetera ki te ariki e: ‘Ka tamateia au e toku iti tangata.’ Kua riri te ariki. ‘Koai te reira tangata i rave i tena angaanga?’ i ui ei aia.

‘Ko te tangata, te enemi, ko teia tangata kino ko Hamana!’ i karanga ai a Esetera.

Kua riri tikai te ariki i teianei. Kua akaue aia kia tamateia a Hamana. Muri mai, kua maani te ariki ia Moredekai e ko te rua o te tangata mana mei iaia uaorai. Kua rave i reira a Moredekai kia maaniia tetai ture ou te ka akatika i to Iseraela kia kimi i te ora no ratou i te ra tei akatakaia no te tamate ia ratou. No te mea e tangata puapinga a Moredekai i teianei, kua tauturu te maataanga o te tangata i to Iseraela e kua akaora ia ratou mei to ratou au enemi.