HANNI Izira Yerusaalame haˈrara shiimu diri albaanni ikkitinota mitte xagge laˈno. Merdokiyosinna Asteeri Faarsi gashshooti giddo mookkino Isiraeelete mannaati. Asteeri mootittete; wosiilise beetti Merdokiyosi kayinni nugusunni aane layinki mootichchaati. Hanni lamunku hiitto ikke mootoolle ikkinoro laˈno.

Asteeri amanna anni ise qaaqqo heedheenna reyino daafira, Merdokiyosi lossinose. Ahaashiweroshi yinannihu Faarsi nugusi Suusa yinanni katamira gashshootu mini noosi; soqqamaanosi giddo mittu Merdokiyosiiti. Mitto barra, nugusu galte Asxiini nugusaho hajajama gibbu; konni daafira mootitte ikkitara nugusu wole galte doodhi. Isi aye doodhinoro afootto? Eewa, xuma beetto Asteeri doodhino.

Konne mannu sagadanni nooha naaxxaleessa mancho laitto? Isi Haamaati. Kuni manchi Faarsi gobbara roorrichchaho. Isi koye ofolle noohu Merdokiyosino sagadasira hasiˈrino. Merdokiyosi kayinni disagadino. Konni bushu manchira sagada Merdokiyosira dancha labbe dileeltinosi. Tini Haama lowo geeshsha hanqissusi. Konni daafira maa assiro afitto?

Haama nugusaho mare Isiraeele assitinokkire assitino yee kaphphi. Togo yii: ‘Insa seerakki diayirrissannoreeti; busha mannaati. Konne manna guda hasiissanno.’ Ahaashiweroshi galtesi Asteeri Isiraeelete manni wido ikkitinota diafino. Konni daafira isi Haama yiinota macciishshe, Isiraeelete manna shine gundanni gede seera fushshi.

Merdokiyosi fushshinoonni seera afiti, lowo geeshsha dadilli. Isi Asteerira togo yee sokka soyi: ‘Tenne nugusaho kulte, gatisannonke gede iso huucci.’ Faarsi gobbara mittu manchi fajjinisikkinni nugusa coyishiishara mariro, seera diayirrisino yaate. Asteeri kayinni fajjinisekkinni nugusa coyishiishshara martu. Nugusuno shinannisekki gede worqete siqqosi isera albaanni kari. Asteeri minese sagale worte nugusanna Haama woshshitu. Sagalenniwa heedheenna nugusu Asteeri maa aasera hasidhannoro xaˈmise. Asteerino qolte, ‘Gaˈa wole sagale woreemmana, atinna Haama dagginanniha ikkiro kuleemmahe’ yitu.

Layinki barri sagalewa Asteeri nugusaho togo yite kultu: ‘Anenna mannaˈya shinankeraati.’ Nugusuno hanqe, ‘Tenne assara kaihu ayeeti?’ yee xaˈmi.

Asteerino, ‘Hakku diini, konne busha mancho Haamaati!’ yite qoltu.

Hakkiinnino nugusu lowo geeshsha hanqe, Haama shinanni gede hajaji. Gedensaannino nugusu, Merdokiyosi isinni aanche moohisi. Hakkunni gedensaanni Merdokiyosi wole seera fushshi. Hakku seeri Isiraeelete gosa, insa shinanni yinoonni barra lubbonsa gargadhitanno gede kaaˈlannonsaho. Xaa wote Merdokiyosi ayirrado mancho ikkino daafira, lowo mannooti Isiraeelete gosa kaaˈlitu; insano diinnansawiinni gattu.