GUTANGÁANʼ nguátha tsiguʼ kidíiʼ nákha Esdras xóó tséjkha̱ náa Jerusalén. Mardoqueo ga̱jma̱a̱ Ester ñajúnʼ israelitas bi̱ itháan guáʼdáá numún náa reino ndrígóo Persia. Ester ñajunʼ reina ga̱jma̱a̱ Mardoqueo ñajunʼ a̱ʼdióo amuu, Mardoqueo bugi̱ ñajunʼ ragajmi̱i̱n bi̱ gíʼdoo itháan numuu náa inuu rey. Guʼyáá xú káʼnii ni̱jkha̱nú nirígá rígi̱.

Índo̱ Ester kaʼnii xóó lájuíin nikháñu anu̱u̱ ga̱jma̱a̱ ru̱dúu̱, ikha jngó Mardoqueo niʼnimba̱ja̱a̱. Asuero, rey ndrígóo Persia, gíʼdoo mbá palacio náa xuajen Susa, ga̱jma̱a̱ Mardoqueo ni̱ndxu̱u̱ mbáa bi̱ nañajunʼ náa rey. Mbóo mbiʼi a̱ʼgiu̱u̱ rey bi̱ nagumbiʼyuu Vasti táʼnimbo̱o̱ náa ikhaa, ikhú rey nda̱yáaʼ imba̱a̱ nuxi̱ʼ a̱ʼgiu̱u̱ bi̱ maʼni xóo reina. Lá natayáá tsáa eyáaʼ bi̱ maʼni a̱ʼgiu̱u̱ ráʼ. Xúʼko̱, ikhaa ñajunʼ dxáʼgú Ester bi̱ mitsiʼyáa.

Lá natayáá xa̱biya̱ bugi̱ bi̱ naʼnimbamínáʼ bi̱ náa kuwa rusmbati̱gu̱u̱n xa̱bu̱ ráʼ. Ikhaa ñajunʼ Hamán, mbáa xa̱biya̱ bi̱ ra̱ʼkhá tháán gíʼdoo wéñuʼ numuu náa xuajen Persia. Hamán nandoo rí ma̱ngaa Mardoqueo bi̱ natayáá gíiʼ gi̱i̱ masmbáti̱go̱o̱ náa ikhaa. Mú Mardoqueo na̱nguá eʼni rúʼko̱. Ikhaa ndaʼyoo dí ra̱májánʼ masmbáti̱go̱o̱ náa inuu mbáa xa̱bu̱ bi̱ naʼni dí ra̱májánʼ kayuʼ. Hamán nakiʼnáa wéñuʼ. Rí xúgi̱ mataya̱a̱ rí eʼni.

Hamán naʼthúu̱n rí minduwaʼ rey ga̱jma̱a̱ numún israelitas. Hamán naʼthí: ‹Ra̱ʼkhá tháán ra̱míjínʼ ga̱jma̱a̱ tsénimbu̱ún xtángoo ndrígáʼ. Gíʼmaa dí muradíin›. Asuero tseʼyoo rí a̱ʼgiu̱u̱ ñajunʼ israelita. Ikha jngó Asuero naʼdxaun Hamán, ga̱jma̱a̱ naʼni mbá xtángoo náa naʼthí rí mbóo mbiʼi muradíin xúgínʼ israelitas.

Índo̱ Mardoqueo naʼdxaun ga̱jma̱a̱ numuu xtángoo, naxmiéjunʼ wéñuʼ. Nakuʼma mbá ajngáa náa Ester: ‹Aratháán rey, ga̱jma̱a̱ atanda̱ʼa̱a̱ rí maʼni káwáanʼxu›. Xtángoo dí rígá náa Persia naʼthí dí raʼkhí ñajunʼ rí mi̱dxu̱ʼ gáta̱ya̱a̱ rey a mu na̱nguá nithanʼ mi̱dxu̱ʼ. Mú Ester na̱jkha̱ maski ajndu na̱nguá nitháán maʼga̱. Rey natsriyaʼ xkuiyóo rí niguma ga̱jma̱a̱ oro, dí nandoo gáʼthi dí ragíʼmaa muxiyáa. Ester naʼthúu̱n maʼga̱ rey ga̱jma̱a̱ Hamán náa marigá mbá ganitsu mba̱a̱. Ikhí rey naraxu̱u̱ Ester ndiéjunʼ rí péñu eyo maʼniu. Ester naʼthí rí maʼthúu̱n á mu rí ikhaa ga̱jma̱a̱ Hamán naguwáʼ náa ganitsu rí gáʼni imbo̱o̱ mbiʼi.

Náa ganitsu rúʼko̱ Ester naʼthúu̱n rey: ‹Muradíin xa̱bu̱ xuajñunʼ ga̱jma̱a̱ ikhúúnʼ›. Rey nakiʼnáa. Ga̱jma̱a̱ naraxi̱: ‹Tsáa gáʼni rúʼko̱ rá.›

Ester naʼthí: ‹¡Xa̱biya̱ Hamán bi̱ gíʼdoo sia̱nʼ, ikhaa bi̱ ra̱májánʼ!›.

Xúgi̱ rí phú rey nakiʼnáa wéñuʼ. Nakuʼma rí muxiyáa Hamán. Rí xúgi̱ rey naʼni rí Mardoqueo maʼni ragajmi̱i̱n bi̱ magiʼdoo numuu náa inuu ikhaa. Ikhú Mardoqueo naʼkuma rí maguma mbá xtángoo nuxi̱ʼ náa naniñúnʼ israelitas muxnamijná ga̱jma̱a̱ numún mbiʼi rí gáguwáʼ muradíin. Numuu rí xúgi̱ Mardoqueo gíʼdoo wéñuʼ numuu, mbaʼin xa̱bu̱ numbañún israelitas, ga̱jma̱a̱ ikhiin nakáwíin náa xa̱bu̱ bi̱ guáʼdáá gajmiún sia̱nʼ.