A HI tlheleni nzhako ka malembana matsongwani na Ezra a nga seya Jerusalema. Mordekai na Estere hi vona vo chaveka nguvu ku hunza vontlhe xikari ka vaIsraeli va nga mufunweni wa Persia. Estere hi yena muzinza, niku Mordekai a nakulobye wo belekwa hi makabye wa raru wakwe, hi yena a gamelako hosi hi xikhundla. A hi woneni ku ngalo zi ngava zi mahekisile kuyini lezo.

A vapswali va Estere va file na ha hi nwanana nguvu, hikwalaho Mordekai i lo mu wundla. Ahasuerusi, a hosi ya Persia, i na ni yindlu ya wuhosi le doropeni ga Xuxani, niku Mordekai munwe wa malanza yakwe. Zonake, ka siku go kari Vaxti a sati wa hosi i tsika ku mu ingisa, hizalezo a hosi yi hlawula a sati wa muswa lezaku a maha muzinza wakwe. Wa mu tiva a wasati loyi a mu hlawulako? Ina, hi nhwana wa mbhuri Estere.

Wa mu wona wanuna loyi wo ti kukumukisa laha a vanhu va ti koramisako ka yena? Loyi hi Hamani. Yena wanuna wo chaveka nguvu lomu Persia. Hamani i lava lezaku Mordekai, loyi u zi kotako ku mu wona na a tshamile kwalaha, a ti koramisawu ka yena. Kanilezi Mordekai a nga ta maha lezo. Yena a nga zi woni na zi fanela akuva a ti koramisa ka wanuna wo biha wo khwatsi hi loyi. Lezo zi zangarisa nguvu Hamani. Zonake yena i maha lezi.

Hamani i hlawutela mawunwa ka hosi xungetano hi vaIsraeli. Yena i ngalo: ‘Vona vanhu vo biha va nga ingisiko milayo ya wena. Va wa fanele ku dawa.’ Ahasuerusi a nga zi tivi ku ngalo sati wakwe Estere muIsraeli. Hikwalaho yena i ingisa Hamani, zonake a veka nayo wa lezaku ka siku go kari a vaIsraeli vontlhe va fanele ku dawa va ku bhi.

Laha Mordekai a zwako lezaku wu kona a nayo lowo, i zangara nguvu. Yena i rumela gezu ka Estere aku ngalo: ‘U fanele ku byela hosi, u tlhela u yi khongotela lezaku yi hi ponisa.’ Zi le handle ka nayo le Persia akuva u famba ku ya wonana ni hosi na yi nga ku vitanangi. Kanilezi Estere i enghena na a nga vitaniwangi. A hosi yi mu tlakusela a nhonga ya yona ya nzalama, lezi zi wulako ku ngalo a nga faneli ku dawa. Estere i ramba a hosi na Hamani a kuya kugeni ka hombe. Kwaseyo a hosi yi wutisa Estere ku ngalo zilo muni a zi lavako ka yona. Estere i yi byela ku ngalo i ta yi byela loku yona na Hamani vata kugeni kunwani ka siku gi nga lanzela.

Kugeni kaloko Estere i byela a hosi aku: ‘Mina ni va ka hina hi lava ku dawa.’ A hosi yi zangara. Yi wutisa yiku: ‘Himani a zako a lavako ku maha nchumu wo khwatsi hi lowo?’

Estere aku ngalo: ‘A wanuna loye, a nala, hi yena Hamani loyi wo biha!’

A hosi yi vindluka hi zanga makunu. Yona yi laya lezaku Hamani a dawa. Anzhako ka lezo, a hosi yi maha lezaku Mordekai ava wo mu gamela hi xikhundla. Makunu Mordekai i maha lezaku ku mahiwa nayo wuswa lowu wu vumelisako vaIsraeli akuva va ti lwela wutomi ga vona ka siku lego va nga fanele ku dawa. Kota lezi Mordekai a nga wanuna wo chaveka makunu, a vanhu vo tala va vuna vaIsraeli, zonake va ponisiwa mandleni ya valala vabye.