АМ Е́здраның Иерусали́мче аян-чоруунга чедир каш чылче бурунгаар эглип кээлем. Мардохе́й биле Есфи́рь — пе́рси күрүнеде эң-не билдингир изра́ильчилер. Кады төрээннер уруглары: Есфи́рь — кадын, а Мардохе́й — хаанның соонда ийиги чагырыкчы. Ол канчап ындыг болу бергенил, билип алыылам.

Есфи́рь көңгүс бичии турда-ла, ооң ада-иези өлген, ынчангаш ону Мардохе́й өстүрген. Пе́рси хаан Артаксе́ркстиң ордузу Сузы хоорайда турар, а Мардохе́й ооң чалчаларының бирээзи бооп бараалгап турар. Бир-ле катап хаанның кадайы Астинь хаанга чагыртпаска, ол бодунга чаа кадайны шилээн. Кымны деп, билир сен бе? Ийе — аныяк чараш Есфи́рьни.

Улуургак кижини көрүп тур сен бе, шупту улус аңаа мөгейип турар? Ол дээрге Аман-дыр. Ол Пе́рсияда дыка билдингир кижи. Мардохе́й база аңаа мөгейзин деп, Аман күзеп турар, чурукта ам ооң олурарын көрүп тур сен. Ынчалзажок Мардохе́й ону кылырын күзевейн турар. Ындыг багай кижиге мөгеери шын эвес деп, ол санап турар. Бо чүүл Аманны хөлчок хорадаткан. Ынчангаш ол мынчалган.

Аман изра́ильчилерни хаанга: ‘Олар сээң хоойлуларың дыңнавас, багай улус-тур. Оларны өлүрер болза эки’,— деп хоптаан. Кадайы Есфи́рь — изра́ильчи деп, Артаксе́ркс билбес. Ынчангаш ол Аманны дыңнап, доктааткан хүнде бүгү изра́ильчилерни өлүрер кылдыр хоойлу үндүрген.

Ол дугайын билип кааш, Мардохе́й дыка муңгараан. Ол Есфи́рьге дамчыткан: ‘Сен ону хаанга дыңнаткаш, бисти камгалаарын дилеп алыр ужурлуг сен’. Чалалга чок хаанны көөрү дээрге — пе́рси хоойлуну хажыдары-дыр. Ынчалза-даа Есфи́рь чалалга чок барган. Хаан ону шаажылавас кылдыр, алдын даянгыыжын олче айыткан. Есфи́рь хаанны болгаш Аманны улуг дойже чалаан. Дой үезинде хаан Есфи́рьден ооң чүнү күзеп турарын айтырган. Ынчан Есфи́рь ону Аман-биле дараазында хүнде ам бир дойже чалаан.

Есфи́рь ийиги дой үезинде хаанга ажыткан: ‘Мен база мээң чонум өлүртүр ужурлуг’. Хаан килеңней берген. ‘Кым ону кылырын диттип тур?’— деп, ол хорадаан.

— Ол каржы кижи — Аман дайзын-дыр!— деп, Есфи́рь чарлаан.

Ам-на хаан шыңгыы килеңней берген. Ол Аманны өлүрүп шаажылаарын дужааган. Ооң соонда Мардохе́йни бодунуң соонда ийиги чагырыкчы кылдыр тургускан. Ынчан Мардохе́й сагыш човап, изра́ильчилерни узуткаар хүнде бодунуң чуртталгазын камгалаар эргени оларга берип турар, чаа хоойлу үндүрткен. Ам Мардохе́й билдингир кижи боорга, изра́ильчилерге хөй улус дузалажып турар, ынчангаш дайзыннарындан изра́ильчилер камгалаттынган.