Tantara 82

Mordekay Ndreky Estera

TY RAHA nandalo taon̈o maromaro talohan’Ezra nimpody ta Jerosalema. Mordekay ndreky Estera olo najain̈a tamy fanjakan̈a persianin̈y. Israelita irô io. Estera io ampanjakavavy, zanaka rahalahin’i Mordekay. Fa Mordekay ndreky, olo fan̈araka ampanjaka tamy fitondrasan̈a. Alô atsika hizaha ino nahavy zen̈y.

Estera mbala hely, mamany ndreky babany naty, ke Mordekay nitarimy izy. Ahasoerosy ampanjakan’i Persia nipetraka ta Sosana, ke Mordekay an̈isan’ampiasanany. Andra araiky, Vasty vadin’ampanjaka tsy nan̈araka volan̈a ampanjaka, ke ampanjaka nifidy man̈angy hafa ataony vady. Hainao amy zay azôvy man̈angy nifidiny? Estera, tsaiky man̈angy tsara sady zatôvo.

Hitanao olo mankôhoko amy lelahy miavonkavon̈o io? Hainao azôvy lelahy io? Hamàna an̈arany. Izio manam-pahifan̈a ta Persia. Mordekay araiky hitanao mipetraka io. Tadiavin’i Hamàna izy hankôhoko aminany koa, fa izy tsy nety. Mordekay nieritreritry fa tsy mety mankôhoko tamy lelahy ratsy fan̈ahy karaha io. Hamàna neloko mare. Ty amy zay raha nataony.

Hamàna namôron̈o vandy mikasiky Israelita aby io. Volan̈iny tamin’ampanjaka: ‘Irô io olo tsy manjary, tsy man̈araka lalàn̈anao. Irô io man̈eva vonen̈a foeky.’ Ahasoerosy tamin’io tsy nahay fa Estera vadiny koa mba Israelita. Izy nitandren̈y volan̈a Hamàna, ke izy nan̈ano lalàn̈a fa Israelita jiaby mila vonen̈a.

Mordekay koa fa naharen̈y lalàn̈a io, niasa loha mare. Nandefa hafatra tamin’Estera izy: ‘Anao mivolàn̈a amin’ampanjaka, beky atsika tsy maty.’ Tamy zen̈y, fady tamy lalàn̈a persianin̈y mandeha mikoran̈a amin’ampanjaka izikoa tsy ampanjaka mikaiky. Estera tsy nikahian̈a fa nandeha tan̈y fo. Natôndron’ampanjaka tamin’Estera tongozonany volamena, ke dikan’izen̈y izy tsy vonen̈a. Estera nan̈ano fihinanan̈a be, ke nikahiany ampanjaka ndreky Hamàna. Ampanjaka tamin’io nan̈ontany Estera raha tiany amian̈a izy. Estera nivolan̈a fa tiany izikoa izy ndreky Hamàna avy amy fihinanan̈a hataony amarain’izin̈y.

Izikoa irô fa navy tamy fihinanan̈a io, Estera nivolan̈a tamin’ampanjaka: ‘Zaho ndreky olonakahy kony hivonen̈a zen̈y!’ Ampanjaka neloko mare. Izy nan̈ontany: ‘Azôvy nivolan̈a zen̈y?’

Volan̈in’Estera: ‘Hamàna, lelahy tsy manjary io!’

Nahay neloko fo ampanjaka. Izy nan̈iraka olo hamono Hamàna. Tafaran’izin̈y, Mordekay nataon’ampanjaka solony. Mordekay amy zay nan̈ano lalàn̈a handifasan̈a Israelita aby io miady mifanandrify amin’andra tôkony hamonoan̈a irô. Mordekay iziô baka fa olo an̈abo, ke naro olo nan̈ampy Israelita aby io niady, ke irô tsy naty.

Bokin’Estera an̈aty Baiboly.