KWENDE tuwujile panandi mu yaka yamunyuma, Esala mkanajawule ku Yelusalemu. Moledekayi ni Esitele ali Ayisalayeli ŵakumanyika mu ucimwene wa ku Pelesiya. Esitele ali ŵamkwakwe mwenye, soni Moledekayi jwali mcimwenegwe jwakupagwa kwa babagwe ŵane ali jwaŵili kwa mwenye. Kwende tulole muyatendecele.

Acinangolo ŵa Esitele ŵawile jwalakwe paŵaliji jwacinandipile, sambano Moledekayi ni juŵamlelaga. Ahasiwelo mwenye jwa ku Pelesiya akwete nyumba jakwe ja ucimwene mu msinda wa Susani, soni Moledekayi ali jumo jwa ŵamasengo ŵakwe. Lisiku line, ŵamkwawo mwenye ŵakolanjikwa Fasiti ngakupikanila mwenye. Nisambano mwenyejo akusagula jwamkongwe jwine kuŵa ŵamkwakwe. Ana akumanyilila jwamkongwe jwakumsagula? Ali mwali jwakusalala Esitele.

Ana akum’wona jwamlume jwakulikwesya jwakumtindiŵalila ŵanduju? Jweleju ali Hamani. Jwalakwe ali mundu jwakusosekwa mnope mu Pelesiya. Hamani akusaka kuti Moledekayi jwakum’wona ali atemijo, amtindiŵalileje. Nambo Moledekayi ngaŵa mkutenda yeleyi. Jwalakwe akuyiwona kuti kuli kwangasosekwa kumtindiŵalila mundu jwakusakalaju. Yeleyi yikumtumbilikasya mnope Hamani. Ni sambano jwalakwe akutenda ayi.

Hamani akwasalila mwenye yaunami yakwamba Ayisalayeli. Jwalakwe akuti: ‘Jemanjaji ali ŵandu ŵakusakala ŵangakusapikanila malamusi gawo. Akusosekwa kwawulaga.’ Ahasiwelo ngakumanyilila kuti Esitele ŵamkwakwe ali jwa Ciyisalayeli. Sambano mwenyejo akumpikanila Hamani, m’yoyo akutamilikasya lilamusi lyakuti lisiku line Ayisalayeli wosope ciŵawulaje.

Moledekayi papikene lilamusi lila, ali jwacanasa mnope. Jwalakwe akutumisya utenga kwa Esitele wakuti: ‘Mwasalile mwenye, soni mwaŵende kuti atukulupusye.’ Pandaŵiji ku Pelesiya kwaliji kasa malamusi naga mundu akuja kuwonegana ni mwenye mkanakuŵilanje. Nambo Esitele akwawula atamose kuti nganam’ŵilanga. Mwenye akumlanjila Esitele ni simbo jakwe ja golidi, kulosya kuti jwalakwe ngawulajikwa. Esitele akuŵilanjila mwenye, soni Hamani ku cakulya capajika. Ali kweleko mwenye akum’wusya Esitele yakusaka kuti amtendele. Esitele akuŵeceta kuti cacimsalila naga mwenyejo ni Hamani caciyikasoni kukulya lisiku lyakuyicisya.

Pa cakulya celeci Esitele akumsalila mwenyejo kuti: ‘Ŵandu ŵangu ni une jwakwe cituwulajikwe.’ Mwenyejo atumbile. Akuwusya kuti: ‘Nduni jwakusaka kutenda yeleyi?’

Esitele akwanga kuti: ‘Mundu jwali mmagongojo ali Hamani jwakusakalaju!

Sambano mwenye jula atumbile yisyesyene. Akulamula kuti Hamani am’wulaje. Kaneko mwenyejo akum’ŵika Moledekayi kuŵa jwaŵili kwa jwalakwe. Moledekayi akulolecesya kuti papagwe lilamusi lyasambano lyakwakunda Ayisalayeli kuteteya umi wawo palisiku lyaŵasosekwaga kuwulajikwa. Sambano ligongo lyakuti Moledekayi ali mundu jwakusosekwa mnope, ŵandu ŵajinji akwakamucisya Ayisalayeli, soni akukulupuka kwa acimmagongo ŵawo.