KOʼOX kanik baʼaxoʼob úuch le maʼiliʼ xiʼik Esdras Jerusalenoʼ. Mardoqueo yéetel Estereʼ, israelitaʼob jach kʼaj óolaʼanoʼob tu reinoi Persia. Estereʼ reina, Mardoqueo, u primoeʼ, u kaʼatúul nojoch jalaʼachil le kaajoʼ. Koʼox ilik bix úuchik leloʼ.

Estereʼ jach chichan ka kíim u taataʼob, le beetkeʼ Mardoqueo nojochkíintej. U palacio rey Asueroeʼ tiaʼan tu noj kaajil Susaeʼ, Mardoqueoeʼ utúul tiʼ u j-meyajoʼob. Upʼéel kʼiin túuneʼ Vasti, u yatan le reyoʼ, maʼ tu beetaj baʼax aʼalaʼabtiʼ ku beetiʼ, le oʼolaleʼ le reyoʼ tu yéeyaj u jeel u yatan utiaʼal u beet u reinai. ¿A wojel wa máax tu yéeyaj? Tu yéeyaj Ester utúul x-chʼúupal jach kiʼichpam.

¿Táan wa wilik le máak jach noj baʼal u yuʼubkuba ku chintal le máakoʼob tu táanoʼ? Le máakaʼ Amán, utúul máak jach nojoch baʼal yanil tu kaajil Persia. Le máak ka wilik kulukbaloʼ Mardoqueo, Amaneʼ u kʼáat ka chinlak xan tu táan. Baʼaleʼ Mardoqueoeʼ maʼ chinlajiʼ. Letiʼeʼ u yojel maʼ maʼalob ka chinlak tu táan utúul kʼasaʼan máakiʼ. Lelaʼ tu beetaj u jach kʼuuxil Amán. Koʼox ilik baʼax tu beetaj.

Amaneʼ tiaʼalaj tiʼe rey baʼaloʼob maʼ jaajtak tu yoʼolal le israelitaʼoboʼ, tiaʼalaj: Letiʼobeʼ kʼasaʼan máakoʼob, tsʼoʼoleʼ maʼatech u beetkoʼob baʼax ka waʼalik. Kʼaʼabéet u kíimsaʼaloʼob. Rey Asueroeʼ maʼ u yojel wa x-israelita u yataniʼ. Le beetikeʼ tu yuʼubaj u tʼaan Amán, ka tu beetaj upʼéel ley tuʼux kiaʼalik baʼax kʼiin ken kíimsaʼak tuláakal le israelitaʼoboʼ.

Ka tu yojéeltaj Mardoqueoeʼ jach chiʼichnakchaji. Ka túun tu túuxtaj aʼalbil tiʼ Ester: Tʼaanen yéetel le reyoʼ, aʼaltiʼ ka u salvartoʼon. Baʼaleʼ, u bin máak u yil le rey wa maʼ letiʼ aʼalmij ka xiʼik máakeʼ, upʼéel baʼax jeʼel u beetik u kíimsaʼal máakeʼ. Baʼaleʼ Estereʼ bin kex maʼ aʼalaʼantiʼiʼ. Le rey túunoʼ tu tichʼaj u xóolteʼ beetaʼan yéetel oro tu tojil Ester, leloʼ u kʼáat yaʼaleʼ maʼatan u kíimsaʼal. Ester túuneʼ tiaʼalaj tiʼe rey yéetel tiʼ Amanoʼ ka xiʼikoʼob janal tu yotoch. Teʼ túunoʼ, le reyoʼ tu kʼáataj tiʼ Ester baʼax u kʼáat ka beetaʼak tu yoʼolal. Estereʼ tiaʼalajtiʼ: Sáamal in waʼaliktech wa ka taal tu kaʼatéen yéetel Amán janal wayeʼ.

Le ka bin tu kaʼatéen le rey yéetel Amanoʼ, Estereʼ tiaʼalaj: Yaan in kíimsaʼal yéetel in wéet kaajaloʼob. Le reyoʼ jach kʼuuxilnaji. Ka tu kʼáataj: ¿Máax ku táabal u beete?

Estereʼ tu núukaj: ¡Le máax jach pʼekmiloʼonoʼ, letiʼe kʼasaʼan Amanaʼ!

Le rey túunoʼ maas kʼuuxilnaji. Ka tiaʼalaj ka kíimsaʼak Amán. Ka tsʼoʼokeʼ le reyoʼ tu tsʼáaj Mardoqueo u beetuba u kaʼatúul jalaʼachil le kaajoʼ. Mardoqueo túuneʼ tiaʼalaj ka beetaʼak upʼéel túumben ley tuʼux kiaʼalik le kʼiin ken óotaʼak kíimsbil le israelitaʼoboʼ jeʼel u páajtal u baʼateloʼob utiaʼal u tokikubaʼobeʼ. Beooraaʼ Mardoqueoeʼ jach nojoch baʼal yanil, le beetik yaʼab máax áant le israelitaʼoboʼ yéetel tu tokubaʼob xan tiʼ le máaxoʼob pʼekmiloʼoboʼ.