Cel me Jerucalem
Ododo 83
Cel me Jerucalem
NEN kong tic ducu ma tye ka wot anyim kany. Luicrael gitye ka tic matek me gero cel me Jerucalem. I kare ma Kabaka Nebukadnejar oturo Jerucalem mwaka 152 i ngec, en oreto cel dok owango lwak dog cel me boma woko. Luicrael pe gutugi gero cel woko cut i kare ma gudwogo adwoga ki Babilon.
In itamo ni cwiny joni onongo winyo nining pi lwak mwaka ma gukwo kany labongo cel ma orumo bomagi? Gin gubedo lworo lworo. Lukworgi onongo twero bino ci monyogi woko. Ento kombeddi laco eni, Nekemia, olo dong tye ka konyo dano me gero cel odoco. In ingeyo anga ma Nekemia obedo?
Nekemia obedo Laicrael ma obino ki i boma me Cuca, ka ma Mordekai gin ki Esta gikwo iye. Nekemia tiyo i gang kal pa kabaka, pi meno en gwok onongo obedo larem Mordekai gin ki Daker Esta. Ento Baibul pe waco ni Nekemia onongo tiyo pi cwar Esta, Kabaka Akacwero. En otiyo pi kabaka ma olubo nge Akacwero, Kabaka Aritakcec.
Po ni, Aritakcec aye kabaka ma kite ber ma omiyo ki Ejira cente ducu ma kitero i Jerucalem me yubo ot pa Jehovah. Ento Ejira pe ogero cel boma ma opoto piny. Kong wanenu gin mutimme ma oweko Nekemia dok aye otimo tic man.
Dong odoko mwaka 13 cakke i kare ma Aritakcec omiyo cente bot Ejira me yubo ot pa Lubanga. Nekemia aye dong ladit lamak kikopo kongo vino pa Kabaka Aritakcec. Man tyen lokke ni en aye miyo kongo vino bot kabaka, dok bene neno ni ngat mo pe otemo wolo kabaka. Man tic ma pire tek.
Dong, i nino mo acel Kanani omin Nekemia kacel ki jo mukene ma gua ki i lobo Icrael gubino ka limo Nekemia. Gin gutitte peko ma Luicrael tye kwede, kacel ki kit ma cel me Jerucalem pud tye opoto kwede piny. Man omiyo cwiny Nekemia oton mada, ci en olego Jehovah pire.
Nino mo acel kabaka oneno ni Nekemia cwinye cwer, ci openyo ni: ‘Pingo inen calo cwinyi cwer?’ Nekemia owacce ni pien Jerucalem tye marac dok celle opoto woko piny. Kabaka openyo ni: ‘Man dong imito gin ango?’
Nekemia owaco ni: ‘Wek acit Jerucalem, ka wek aciyub celle.’ Kabaka Aritakcec lakica mada. En owaco ni Nekemia twero cito, dok en okonye me nongo yadi me timo tic mogo me gedo. Cutcut i nge bino pa Nekemia i Jerucalem, en otito tamme bot dano. Gin gumaro tamme, dok guwaco ni: ‘Wacaku gedo.’
I kare ma lukwor pa Luicrael guneno cel tye ka dongo malo, gin guwaco ni: ‘Wan wabicito kunnu ci wanekogi, dok wajuko tic me gedo woko.’ Ento Nekemia owinyo lok man woko, ci en omiyo pala lucwan ki tong bot lutic. Dok en owaco ni: ‘Pe wulwor lukworwu. Lwenyu pi omegiwu, pi lutinowu, pi monwu, ki pi pacowu.’
Dano cwinygi obedo tek adada. Dyeceng ki dyewor giketo jami lwenygi atera, kun nongo gitye ka medde ki gedo. Dong pi nino 52 keken cel otum woko. Kombeddi dong dano pe gibedo lworo lworo i boma. Nekemia gin ki Ejira gupwonyo dano ki cik pa Lubanga, ci dano gubedo ki yomcwiny.
Ento jami pud pe tye kit macon onongo tye kwede ma peya kitero Luicrael Babilon i mabuc. Kabaka me Percia aye ma loyo dano dok omyero gin guti pire. Ento Jehovah ociko ni ebicwalo kabaka manyen, dok ni kabaka manyen-ni bikelo kuc bot dano. Kabaka man aye anga? En bikelo kuc i lobo nining? Cokcok mwaka 450 okato ma peya kingeyo gin mo mukene i kom lok man. Ci nywalo lt in mo ma pire tek obedo tye. Ento meno obedo lok mukene mapat.
