HILINGA an mga Israelita digdi. Sibot-sibot sinda sa pagtindog kan mga lanob kan Jerusalem. Kan sakupon ni Hading Nabucodonosor an Jerusalem 152 na taon na an nakaagi, ginaba niya an mga lanob asin sinulo an mga trangkahan kan siyudad. Dai tulos pinatindog kan mga Israelita an mga lanob kan inot sindang magbalik hali sa Babilonya.

Ano daw an namamatian kan mga nakaistar sa siyudad sa laog nin dakul na taon na mayo iyan nin lanob sa palibot? Bako sindang trangkilo. Madalion sindang laugon asin salakayon nin mga kaiwal. Pero ngunyan, pigtatabangan sinda kan lalaking ini, si Nehemias, na patindugon giraray an mga lanob. Bisto mo siya?

Si Nehemias sarong Israelita hali sa Susan. Duman man nakaistar si Mardokeo asin Esther. Nagtatrabaho si Nehemias sa palasyo kan hadi, kaya posibleng amigo siya ni Mardokeo asin Esther. Pero, dai sinasabi sa Bibliya na naglingkod siya ki Ahasuero na agom ni Esther. Naglingkod siya sa suminunod na hadi, si Artajerjes.

Kun natatandaan mo, si Artajerjes su mabuot na hadi na nagtao ki Esdras nin dakul na kuwarta para pakarhayon an templo. Pero dai pinatindog ni Esdras an gabang mga lanob kan siyudad. Aramon ta kun paanong si Nehemias an guminibo kaiyan.

Mga 13 taon na puon kan tawan ni Artajerjes si Esdras nin kuwartang pampahirahay kan templo. Si Nehemias na an tagaserbi nin arak ki Hading Artajerjes. Importanteng trabaho ini ta sinisigurado niyang dai nin mahilo * sa hadi.

Sarong aldaw, nag-abot hali sa Israel an tugang ni Nehemias na si Hanani kaiba an iba pang mga lalaki. Sinabi ninda ki Nehemias na grabe an problema kan mga Israelita asin na gaba pa man giraray an mga lanob kan Jerusalem. Munduon si Nehemias kaya ipinamibi niya ini ki Jehova.

Narisa kan hadi na mamundo si Nehemias kaya naghapot siya: ‘Ta’no ta munduon ka?’ Sinabi ni Nehemias na dahil ini sa makahihirak na kamugtakan kan Jerusalem. ‘Anong gusto mo?’ an hapot kan hadi.

‘Tugutan mo po akong magduman para patindugon giraray an mga lanob,’ an sabi ni Nehemias. Mabuuton an hadi kaya tinugutan niya si Nehemias asin tinawan ini nin mga kahoy para sa pagtugdok. Pag-abot ni Nehemias sa Jerusalem, sinabi niya sa mga Israelita an plano niya. Nagustuhan ninda ini asin nagsabi: ‘Punan ta na an pagtugdok.’

Kan mahiling kan mga kaiwal kan mga Israelita na itinitindog an lanob, sinabi ninda: ‘Salakayon ta sinda asin papunduhon an pagtugdok.’ Pero nabaretaan ini ni Nehemias kaya inarmasan niya nin espada asin budyak an mga trabahador. Sinabi niya: ‘Dai kamo matakot sainda. Ipaglaban nindo an saindong mga tugang, aki, agom, asin istaran.’

Makusog an buot kan banwaan. Kapot an mga armas, aldaw-banggi sindang nagtrabaho. Kaya, natapos an mga lanob sa laog sana nin 52 na aldaw. Trangkilo na ngunyan an pagmati kan mga Israelita. Itinukdo sainda ni Nehemias asin Esdras an mga pagbuot nin Diyos, kaya ugmahon an banwaan.

Pero an kamugtakan bako pa man giraray arog kan dati bago sinda darahon na bihag sa Babilonya. Sakop sinda kan hadi nin Persia asin kaipuhan nindang maglingkod saiya. Pero nangako si Jehova na masugo siya nin bagong hadi na magdadara nin katuninungan sa gabos. Si’say daw an hading ini? Paano siya magdadara nin katuninungan sa kinaban? Mga 450 taon an naglihis bago naaraman an dagdag pang impormasyon manungod digdi. Dangan may importanteng marhay na pangyayari, an pagkamundag nin sarong espesyal na aki. Pero ibang istorya naman iyan.