TRAEM luk ol bigfala wok we ol man Isrel oli stap mekem long pija ya. Oli bisi long wok ya blong bildim bakegen stonwol blong Jerusalem. King Nebukadnesa i bin spolem Jerusalem 152 yia bifo. Long taem ya, hem i brebrekem stonwol ya mo i bonem ol doa blong hem. Taem ol man Isrel oli aot long Babilon oli kambak, oli no hareap blong bildim bakegen stonwol blong taon ya.

?Yu ting se ol man oli haremgud blong stap plante yia long wan taon we i no gat stonwol i goraon long hem? Nogat. Oli harem se oli no stap sef, from we i isi nomo blong ol enemi oli kam insaed long taon ya. Be naoia, man ya Nehemaea i stap givhan long ol man blong bildim stonwol ya bakegen. ?Nehemaea hem i hu?

Nehemaea i wan man Isrel we i blong taon ya Susa. Hemia semfala taon we Modekae mo Esta i stap long hem. Nehemaea i wok long haos blong king, taswe maet hem i gudfren blong Modekae mo Kwin Esta. Be Baebol i no talem stret se Nehemaea i wok blong King Sekses we i man blong Esta. Hem i wok blong nekiswan king, Ataksekses.

Yu tingbaot we Ataksekses nao i gudfala king we i givim mane long Esra blong gobak long Jerusalem mo mekemgud haos blong Jeova bakegen. Be Esra i no bildim bakegen stonwol blong taon ya. Bambae yumi luk from wanem Nehemaea nao i mekem wok ya.

Stat long taem we Ataksekses i givim mane ya long Esra, 13 yia i pas finis. Naoia, Nehemaea i hed blong ol man we oli karem waen i go long King Ataksekses. Wok ya i impoten from we hem i mas meksua se i no gat wan man we i traem blong putum posen long dring blong king.

Wan dei, Hanani we i brata blong Nehemaea, mo sam narafala man Isrel, oli kam luk Nehemaea. Oli tokbaot trabol we ol man Isrel oli fesem, mo stonwol blong Jerusalem we i brobrok nogud. Nius ya i mekem se Nehemaea i harem nogud tumas, ale hem i prea long Jeova.

Wan dei, king i luk we Nehemaea i harem nogud, nao i askem long hem se: ‘?From wanem fes blong yu i nogud olsem?’ Nehemaea i talem long hem se hem i stap tingbaot Jerusalem mo stonwol blong hem we i brobrok nogud. Nao king i askem long hem se: ‘?Bambae mi mi mekem olsem wanem blong givhan long yu?’

Nehemaea i talem se: ‘King, plis yu letem mi mi gobak long Jerusalem blong mi save wokem bakegen bigfala stonwol blong hem.’ King Ataksekses i gat kaen fasin, ale hem i letem Nehemaea i gobak. Mo hem i givhan long Nehemaea blong kasem timba blong mekem wok ya. Taem Nehemaea i kamtru long Jerusalem, hem i talemaot plan blong hem long ol man. Olgeta ya oli glad mo oli talem se: ‘Yes, yumi mas statem wok ya.’

Be ol enemi blong ol man Isrel oli luk we stonwol ya i stap kam antap, nao oli talem se: ‘Bambae yumi kilim olgeta oli ded, mo long fasin ya, bambae yumi save blokem ol wok blong olgeta.’ Be Nehemaea i harem nius blong samting ya, nao hem i givim naef blong faet mo spia long wanwan long ol wokman blong hem. Mo hem i talem long olgeta se: ‘Yufala i no fraet long ol enemi ya blong yumi. Yufala i mas faet blong blokem olgeta, blong oli no kam spolem ol brata blong yumi, wetem ol woman mo ol pikinini blong yumi, mo ol haos blong yumi.’

Ol man oli no fraet. Long dei mo long naet, oli holem ol tul blong faet, mo oli gohed blong bildim stonwol ya. Ale oli finisim wok ya long 52 dei nomo. Naoia ol man oli harem se oli stap sef insaed long taon ya. Nao Nehemaea mo Esra tufala i tijim ol man long loa blong God, mo ol man oli glad tumas.

Be ol samting i no sem mak olsem bifo we ol man Isrel oli go wok slef long Babilon. Naoia king blong Pesia i stap rul mo ol man oli mas obei long hem. Be Jeova i mekem promes se bambae hem i stanemap wan niufala king, mo king ya bambae i mekem se ol man oli stap long pis. ?King ya hem i hu? ?Olsem wanem hem bambae i mekem pis long wol? Samwe long 450 yia i pas nao i gat moa save i kamaot long saed ya. Long taem ya, wan impoten pikinini i bon. Bambae yumi ridim stori blong hem biaen.

Nehemaea japta 1 kasem 6.