Maana 83nan

Jerusalɛm kogobaw

BAARA min bɛ ka kɛ yan, e ka o lajɛ. Israɛlkaw bolo degunnen bɛ Jerusalɛm kogobaw jɔli la. A san 152 de filɛ ko Masakɛ Nebukadnezar tun ye Jerusalɛm ci, ka a kogobaw bin, ka dugu dondaw fana jeni. Israɛlkaw bɔra tuma min na Babilonɛ ka na u faso la, u ma Jerusalɛm kogobaw jɔ o yɔrɔnin bɛɛ la.

E fɛ, Israɛlkaw tun bɛ cogo di nin san caman kɔnɔ kogobaw tun tɛ dugu min na? U hakili tun sigilen tɛ. U juguw tun bɛ se ka na u kɛlɛ nɔgɔya la. Nka, i ɲɛ bɛ cɛ min na yan, a tɔgɔ ye ko Nehemi. Ale de nana sisan walisa ka Israɛlkaw dɛmɛ ka Jerusalɛm kogobaw jɔ kokura. I bɛ Nehemi dɔn wa?

 Nehemi ye Israɛlka de ye min bɛ bɔ Suse. Mardose ni Esiteri tun sigilen bɛ o dugu de la. Nehemi tun bɛ baara kɛ masakɛ ka palɛ la. O kosɔn, i b’a sɔrɔ a tun ye Mardose ni masakɛmuso Esiteri teri sɛbɛ ye. Nka Bibulu t’a fɔ ko Nehemi ye baara kɛ masakɛ Asuerus ye, n’o tun ye Esiteri cɛ ye. Nka, a b’a fɔ ko Nehemi ye baara kɛ masakɛ Artakserkses de ye min dara Asuerus kan.

I hakili jigin ko Artakserkses de ye masakɛ ɲuman ye min ye wari ba caman di Esdrasi ma, walisa a ka taa ni o ye Jerusalɛm, ka Jehova batoso cɛɲɛ. Nka, Esdrasi ma dugu kogobaw jɔ. Nehemi de nana o baara kɛ. Nehemi ye o baara kɛ cogo min na, an k’o lajɛ ɲɔgɔn fɛ.

Nin ye a san 13 nan ye ko Artakserkses ye wari di Esdrasi ma walisa a ka batoso cɛɲɛ. Nehemi ye Masakɛ Artakserkses ka minnifɛn dibaga kuntigi ye sisan. A ka baara ye ka duwɛn di masakɛ ma, ani ka a sɛgɛsɛgɛ fana ko mɔgɔ si m’a ɲini ka pɔsɔni don masakɛ kɔnɔ. O tun ye baara ɲɛnamaba ye dɛ!

 Nka don dɔ, Nehemi balimakɛ Hananiya, ani cɛ wɛrɛw bɔra Israɛl ka na Nehemi lajɛ. Israɛlkaw bɛ gɛlɛya minnu na, ani Jerusalɛm kogobaw tun binnen bɛ yen cogo min na halisa, u ye o fɔ Nehemi ye. O ko ye Nehemi dusu kasi kosɛbɛ. A ye Jehova deli o kow la.

Don dɔ la, masakɛ y’a kɔlɔsi ko Nehemi tun ɲɛsisilen bɛ kosɛbɛ. A y’a ɲininka ko: ‘Mun na i ɲɛsisilen bɛ nin cogo la? Nehemi y’a jaabi ko a ɲɛsisilen bɛ bawo Jerusalɛm bɛ cogo min na, o man ɲi hali dɔɔnin. A kogobaw binnen bɛ halisa. Masakɛ y’a ɲininka ko: ‘E bɛ mun fɛ sisan?’

Nehemi ko: ‘A to ne ka taa Jerusalɛm walisa ka a kogobaw jɔ.’ Masakɛ Artakserkses tun ka ɲi kosɛbɛ. A y’a fɔ Nehemi ye ko a ka taa. Artakserkses ye Nehemi dɛmɛ a ka jiriw sɔrɔ, walisa ka kogobaw jɔli baara dɔw kɛ. A ma mɛn o kɔfɛ, Nehemi sera Jerusalɛm. A b’a fɛ ka min kɛ, a ye o fɔ jama ye. O diyara mɔgɔw ye. U ko: ‘An ka wuli ka kogobaw jɔli daminɛ.’

Israɛlkaw juguw y’a ye tuma min na ko kogobaw bɛ ka yɛlɛn, u ko: ‘An ka taa u faga, ka u ka baara jɔ.’ Nka, Nehemi ye o kuma mɛn tuma min na, a ye npanw ni tamaw di baarakɛlaw ma, k’a fɔ u ye ko: ‘Aw kana siran an juguw ɲɛ. Aw ka kɛlɛ kɛ aw balimaw, aw denw, aw musow ni aw ka duw kosɔn.’

Mɔgɔw ye u ja gɛlɛya kosɛbɛ. Ka u ka kɛlɛkɛminɛn labɛnnenw to u bolo kɔrɔ su ni tile, u taara a fɛ kogobaw jɔli baara la. O la sa, kogobaw jɔra ka ban pewu tile 52 kɔnɔ. Israɛlkaw tun lakananen bɛ sisan dugu kɔnɔ. Nehemi ni Esdrasi ye mɔgɔw kalan Ala ka sariya la. Israɛlkaw nisɔndiyara kosɛbɛ.

Nka kow tun tɛ i n’a fɔ u tun bɛ cogo min na sani Israɛlkaw ka minɛ ka taa Babilonɛ. Perse masakɛ de bɛ olu kunna sisan. U ka kan ka baara kɛ a ye. Nka, Jehova ye layidu ta ko ale bɛna masakɛ kura ci ka na min bɛna hɛrɛ lase hadamadenw ma. O masakɛ ye jɔni ye? A bɛna hɛrɛ lase dugukolo ma cogo di? San 450 ɲɔgɔn tɛmɛna k’a sɔrɔ fɛn wɛrɛ ma dɔn o ko la. O kɔfɛ, wololi dɔ kɛra min nafa ka bon haali. Nka o ye maana wɛrɛ ye.

Nehemi tilayɔrɔba 1 ka na 6 la.