HIKA i rian an ṭuan mi hi zoh hmanh u. Israel mi hna cu Jerusalem ralhau kha an remh cuahmah lio a si. Siangpahrang Nebukhadenezzar nih hi hlan kum 152 lio i Jerusalem a rak hrawh lio ah khan, a ralhau kha a chimh dih i, khualipi kutka hna cu mei in a khangh dih. Israel mi hna cu Babilon in an hung kir ahkhan ralhau kha an sa ṭhan rih lo.

Ralhau ngei lo in cu caanpi an um tik ahcun mi hna an thinlung chung ah zeitin a um lai tiah dah nan ruah? Kan him tiah an rak ruat kho lo.

An ral hna cu fawi tein an lut lai i an doh khawh ko hna. Asinain atu cu hi mipa Nehemiah nih hin a donghnak ah ralhau sak ṭhan awk ah a bawmh cang hna. Nehemiah cu aho a si nan hngal maw?

Nehemiah cu Mordekai le Esther an umnak Shushan in a ra mi Israel mi pakhat a si. Nehemiah cu siangpahrang inn chung ah rian ṭuan mi a si ve caah Mordekai le Esther he hawikawm ṭha a si ko lai. Sihmanhsehlaw Baibal nihcun Nehemiah hi Esther a vapa Siangpahrang Ahasuerus a rian a ṭuan ti cu a chim lem lo. A hun changtu Siangpahrang Artazaksis a rian ṭuantu a si.

Artazaksis cu Jehovah a biakinn saknak ah Jerusalem lei kalpi awk tangka vialte Ezra a rak petu a ṭha ngai mi siangpahrang a si ti hngal ko u. Asinain Ezra nihcun khualipi ralhau rawk mi cu a rak sa ṭhan lo. Cu rian cu Nehemiah nih zeitindah a rak ṭuan zoh hmanh u sih.

Artazaksis nih biakinn ṭamhnak ah Ezra tangka a pek nak in kum 13 a si cang. Atu ahcun Nehemiah cu Siangpahrang Artazaksis a hrai putu bawi ngan bik a si. Cucu siangpahrang zu petu a si i, ahohmanh nih sivai an thlakpiak nak hnga lo a zohkhenhtu a si tinak a si. Hi cu a biapi ngai mi rian pakhat a si.

Nikhat cu Nehemiah a naupa Hanani le mi dang cheukhat nih Israel ram in Nehemiah tlawn awk ah an ra. Annih nih Israel mi hna an ton mi harnak le Jerusalem khua ralhau atu tiang a rawhnak kong vialte kha Nehemiah cu an chimh. Cucaah Nehemiah cu a ngaih a chia ngaingai i, cu kong he aa tlai in Jehovah sin ah thla a cam.

Nikhat cu siangpahrang nih Nehemiah a ngaihchiatnak kha a hngalh i, ‘Zeicah cutluk in na ngaih a chiat?’ tiah a hal. Cutikah Nehemiah nih Jerusalem khua umtuzia a ṭhatlonak le a ralhau an rawhnak ruang ah ka ngaih a chiatnak cu a si tiah siangpahrang cu a chimh, ‘Zeidah na duh?’ tiah siangpahrang nih amah cu a hal.

‘Ralhau kha remh ṭhan awk ah Jerusalem ah ka kalter tuah,’ tiah Nehemiah nih a ti. Siangpahrang Artazaksis cu mi ṭha ngai a si. ‘Na kal kho,’ tiah Nehemiah kha a ti i, ralhau saknak caah a herh hnga mi thing a hmuh khawh nak hnga a bawmh fawn. Nehemiah cu Jerusalem a phak hnu tlawmpal ah a ruahnak vialte kha mi hna cu a chimh hna. A ruahnak cu an hna a tla ve i, ‘Sa colh ko u sih,’ an ti.

Israel mi an ral hna nih ralhau an sak mi an hmuh tik ah, ‘Kan va kal lai i, ralhau cu sa kho hna hlah seh tiah kan thah dih hna lai,’ an ti. Sihmanhsehlaw an bia cu Nehemiah nih a theih i, rian ṭuantu hna kha vainam le fei a pek cio hna. ‘Kan ral cu ṭih hna hlah u. Nan unau hna, nan fale hna, nan nupi hna, le nan inn caah do ko u,’ a ti.

Mi hna cu an ral a ṭha ngaingai. Chun zan hlan in an hriamnam cu timh cia in an i chuah i, ralhau cu an sak chin lengmang ko. Cucaah ni 52 chung lawng ah ralhau cu an lim colh. Atu ah cun mi hna cu khuapi chung ah lung dai in an um kho cang. Nehemiah le Ezra nih mi hna cu Pathian nawlbia an cawnpiak hna i, mi hna cu an lung aa lawm.

Sihmanhsehlaw Israel mi hna Babilon lei sal ah an kalpi hna hlan bantuk cun thil cu a si kho ti lo. Mi hna cu Persia siangpahrang nih a uk hna i a rian kha an ṭuanpiak. Asinain Jehovah nih siangpahrang thar ka hun thlah lai i, cu siangpahrang thar nihcun mi hna caah daihnak kha a chuahter lai tiah bia a kam. Cu siangpahrang cu ahodah a si? Zeitindah vawlei cung ah daihnak cu a chuahter lai? Hi kong he aa tlai in zeihmanh hngal ti lo in kum 450 chung a luan ṭhan hoi. Cu hnu ah a biapi bik mi ngakchiate a rak chuak. Sihmanhsehlaw cucu tuanbia dang pakhat a si.