¡PIIRAKAA namüin na israeliitakana, aʼyataashii maʼin! Nakumajüin süsepü Jerusalén. Wanaa sümaa naʼajüin Nabucodonosor Jerusalén, nujuttirüin tü süsepükat otta naʼajüin tü soʼukot. Nnojotsü nakumajüin na israeliitakana tü süsepükat naleʼejapa Babiloniajee.

¿Jamüsüche naaʼin süka masepüin Jerusalén? Nnojotsü anain süka eein süpüla nashutuin na naʼünüükana. Mapa nükaaliinjaka Nehemías naya süpüla nakumajüin süsepü Jerusalén. ¿Pütüjaa aaʼu jarai chi wayuu kanüliakai Nehemías?

Kepiashi nia Susa eere kepiain Mardoqueo otta Ester. Aʼyataashi nia nipialuʼu chi aluwataaikai, naʼaleewain nia Mardoqueo otta Ester. Nnojotsü süküjüin tü Wiwüliakat niʼyataain Nehemías nümüin chi suʼwayuusekai Ester. Aʼyataashi nia nümüin Artajerjes chi aluwataakai nüchikumüin.

Soto paaʼin niain Artajerjes chi aapakai wainma nneerü nümüin Esdras süpüla nukumajüin tü aʼwaajüleekat. Nnojotsü nukumajüin Esdras süsepü Jerusalén. Wekirajaa sünain jamüin naainjaka Nehemías tia.

Alatüsü 13 juya süchikijee saapünüin nneerü nümüin Esdras. Nehemías aapajüi nüsüin Artajerjes otta kanainshi naaʼin suulia niiyajünüin. Anasü maʼin tü niʼyataainkat.

Soʼu wanee kaʼi antüshi Hananí namaa wanee wayuuinnua analaainjana nümüin Nehemías chi nuwalakai. Naküjaka nümüin müliain na israeliitakana otta makumajuuin süsepü Jerusalén. Mojuka maʼin naaʼin Nehemías, naashajaaka nümaa Jeʼwaa süchiki tia.

Soʼu wanee kaʼi niʼraka Artajerjes mojuin naaʼin Nehemías, nüsakiraka nia: ‹¿Jamüsü mojuka paaʼin?› Nüküjaka Nehemías müliain na israeliitakana otta masepüin Jerusalén. Nümaka Artajerjes nümüin: ‹¿Kasa keeʼireeka paaʼin?›

Nümaka Nehemías: ‹Puuʼulaa toʼunai Jerusalénmüin süpüla takumajüin tü süsepükat›. Anamia maʼin Artajerjes nüjütaka nia otta naapaka taapüla nümüin. Nüntapa Jerusalénmüin nüküjaka Nehemías namüin na israeliitakana tü naainjüinjatkat. Anaka shia namüin, namaka: ‹Jooʼuya wakumajai tü süsepükat›.

Neʼrapa na naʼünüükana miyoʼuin süsepü Jerusalén, namaka: ‹Jooʼuya woʼutai naaʼin otta wooʼuleʼerai naya suulia aʼyatawaa›. Nütüjaapa saaʼu Nehemías tia naapaka namüin na aʼyataashiikana chajaruuta otta jatü, nümaka: ‹Nnojo mmoluin jia. Jütkaa naaʼu juwalayuu, jüchonnii, juʼwayuuse otta jipia›.

Meimmoluinsalii na israeliitakana. Kaʼapülashii sünain aʼyatawaa soʼukai otta saʼwai. Kettaasü natuma süsepü Jerusalén soʼu 52 kaʼi. Anainnapa otta ekirajünüshii naya sünain nünüiki Maleiwa nutuma Nehemías otta Esdras. Talataka naya.

Nnojotsü anain maʼin nakuwaʼipa na israeliitakana maʼaka sümaiwa. Aluwataashi naaʼu chi aluwataaikai Persia otta aʼyataashii naya nümüin. Akaisaʼa Jeʼwaa nuluwataainjachi wanee jekechi aluwataai, nnojoluinjatü atkawaa nutuma. ¿Jarai chia? ¿Jamüinjatü süpüla nnojoluin atkawaa Mmapaʼa nutuma? Alatüinjatü 450 juya süpülapünaa tia. Mapa jemeika wanee joʼuu. Wekirajaajeerü anain tia mapeena.