Kukwe kira 83

Ki Jerusalén yebiti

¡NITRE tä sribire ja dibiti mike ñärärä! Nitre Israel tä ki Jerusalén sribere. Kä nikani 152 ta känenkri Nabucodonosor Jerusalén ganinte, ye ngwane ki ye juani tibien kwe aune jukwe ye kukwani kwe. Nitre Israel nämene Babilonia nükaninta ye ngwane ñaka ki ye sribebare bengwaire kwetre.

¿Ki ñaka nämene ye ngwane ja namani ruin ño ietre? Ja ñaka namani ruin kriemikani ietre. Namani nuäre rüetre yekrä rükäre ben. Akwa mrä mada Nehemías, nitre dimikani ki Jerusalén ye sribereta. ¿Nehemías ye nire gare mäi?

Nehemías ye ni Israel nünanka juta Susa känti, yete Mardoqueo bätä Ester nämene nüne. Niara nämene sribire ju gobrankrä reikwe yete, yebätä nämene ja kete kwin Mardoqueo bätä Ester ben. Nehemías ñaka sribibare rei Asuero Ester muko yekrä. Sribibare kwe rei mada kä Artajerjes kräke nieta Bibliakwe.

Artajerjes ye rei töi kwin käkwe ngwian biani Esdras ie ngwandre Jerusalén templo Jehovakwe ükatekäre. Akwa, ki nämene tibien ye Esdras ñaka ükaninte. Ñokänti Nehemías ye nuainbare ani mike gare jai.

Artajerjes ngwian biani Esdras ie templo ükatekäre, ye bitikäre kä nikanina 13 ta. Nehemías ye ni ütiäte vino bianka rei ie. Niara nämene vino bien rei Artajerjes ie aune nämene mike ñärärä kwin ne kwe veneno ñaka tädre te. Sribi ye ütiäte krubäte.

Bati Hananí Nehemías eteba bätä nitre umbre mada juta Israel känti nikani Nehemías tuinbiti. Nitre Israel nämene ja tarenike bätä ki Jerusalén nämene tibien ye niebare kwetre ie. Nehemías namani ulire krubäte, aune kukwe yebätä orabare kwe Jehovai.

Bati Nehemías namani ulire ye reikwe gani, aune ngwanintari kwe: ‘¿Ñobätä mätä ulire?’ Nitre Jerusalén tä ja tarenike bätä ki tä tibien yebätä Nehemías niebare ie. Reikwe ngwanintari ie: ‘¿Mä tö drei?’

Nehemías niebare: ‘Ti tuenmetre näin Jerusalén, ne kwe tikwe ki ye ükadreteta.’ Artajerjes töi kwin krubäte. Raba niken niebare kwe ie, aune dimikani kwe kri känene ki ye sribekäre. Nehemías namani Jerusalén ye ngwane, niara tö namani dre nuain ye niebare kwe nitre ie. Namani kwin kräketre aune niebare kwetre: ‘Ani ki ye sribere.’

Ki ye sribe namanina mente kwin aune nitre Israel rüe käkwe niebare: ‘Ni näin ie aune nikwe kämikai bätä nikwe sribi ye ötai.’ Ne namani gare Nehemías ie aune ngitra bätä lanza biani kwe nitre sribikä ye ie, aune niebare kwe: ‘Mun ñan jürä ngwan jabätä. Mun mräkätre, monso munkwe, mun muko, bätä ju munkwe ye dokwäre munkwe rü bentre.’

Nitre yebätä kä jürä ñaka. Dibire aune rare jondron rükrä ye nämene ükaninte kwetre, aune nämene sribire jankunu. Yebätä, köbö 52 te ki ye namani bare ietre. Nitre namani kriemikani juta yete. Nehemías bätä Esdras nämene kukwe Ngöbökwe ye driere, aune kä nämene juto nitre yebätä.

Akwa nitre Israel mika jämi ngite Babilonia känenkri nämene nüne ye erere jämi nünenta jire. Rei Persa tä gobrane aune nitre tä sribire kräke. Akwa Jehovakwe rei mada juain käbämikani kwe, aune ye käkwe nitre mikai nüne jäme. ¿Ni ye abokän nire? ¿Ñokänti nitre mikai nüne jäme kwe Kä tibienbätä? Kukwe ne rabadre gare bäri kwin känenkri kä nikani 450 ta. Ye bitikäre monso iti ütiäte krubäte därebare. Akwa kukwe namani bare ne kukwe mada kira.

Nehemías kapitulo 1-6.