Omakuma waJerusalem
EHUNGI 83
Omakuma waJerusalem
TARA koviungura avihe mbi mavi kayenda mba. Ovaisrael mave tungu omakuma yaJerusalem. Indu ombara Nebukadnesar tja yandeka Jerusalem ozombura 152 nḓa kapita, eye wa wisa omakuma nanyosa omivero vyotjihuro. Ovaisrael kave na pu va tungurura omakuma rukwao indu owo tji va kotoka konganda okuza ku Babilon.
Otja tji mo ripura, otjiwaṋa aatji munu ko vi okukara ozombura azehe nḓo nokuhina omakuma? Owo kava ri mondjeverero. Ovanavita vawo atja ve yenene okuhita oupupu nokuvewira. Nungwari omurumendu ngwi Nehemia nambano ma vatere ovandu okutungurura omakuma rukwao. Ove mo tjiwa kutja Nehemia owaṋi?
Nehemia Omuisrael ngwa zire kotjihuro tjaSusa, ku kwa turire Mordekai na Ester. Nehemia aa ungura mondjuwo yombara, okutja eye mape ya kutja wa ri epanga ewa raMordekai nombara oserekaze Ester. Nungwari Ombeibela kai hungire kutja Nehemia aa ungura pomurumendu waEster, ombara Ahasveros (Kerkes). Eye aa ungurire ombara ndja kongorera ko wena Artakerkes.
Zemburuka kutja Artakerkes ya ri ombara ombwa ndja yandjere ovimariva ovingi ku Esra okutwaerera ku Jerusalem nokukaṱuna navyo ondembeli yaJehova. Nungwari Esra kena pa tunga omakuma yotjihuro nga wire. Indjeye tu tare kutja pe ya vi Nehemia ma ungure oviungura mbi.
Pa kapita ozombura 13 kombunda ya indu Artakerkes tja yandja ovimariva ku Esra okukaṱuna navyo ondembeli. Nehemia nambano ongu ri omutye womavinu omunene wombara Artakerkes. Ihi matji heye kutja eye aa yandja omavinu kombara nokutjevera kutja ape ha ningi omundu ngu ma twa owanga momavinu wombara. Imbi vya ri oviungura ovinanḓengu tjinene.
Okutja eyuva rimwe omuangu waNehemia, Hanani, novarumendu varwe mba zire kehi raIsrael ve ya okuryangera Nehemia. Owo ve mu raera ohunga nomauzeu Ovaisrael ngu ve nawo, nokutja omakuma yaJerusalem ngundee ya wa. Ihi tja kurungisire Nehemia tjinene, neye wa kumba ku Jehova ohunga notjiṋa hi.
Eyuva rimwe ombara ya muna Nehemia a yumana, nai mu pura kutja: ‘Okutjavi ove tji wa yumana nai?’ Nehemia we mu raera kutja omena rokutja Jerusalem tji ri mongaro ombi tjinene nomakuma watjo ya wa. Ombara ye mu pura nai tja: ‘Otjikeṋa tji mo vanga?’
Nehemia wa zira ombara na tja: ‘Ndji yandjera mbi yende ku Jerusalem kutja mbi ka tungurure omakuma wotjihuro.’ Ombara Artakerkes wa ri omundu womutima omuwa. Eye wa raera Nehemia kutja nga yende, neye we mu vatera okupaha omiti vyokukatunga navyo. Tjimanga kombunda yaindu Nehemia tja vaza mu Jerusalem, eye wa raera ovandu ohunga nondunge ye. Owo va ri nohange nondunge ye, nave tja: ‘Indjeye tu ute okutunga.’
Ovanavita wOvaisrael tjaave munu omakuma tji maye yeruruka, owo va tjere: ‘Eṱe matu i ngo atu ke ve zepa, natu kayandisa oviungura vyawo vyokutunga.’ Nungwari Nehemia we ve zuva, na yandja omangaruvyo nomanga kovandu mbaave ungura. Okuzambo a tja: ‘Amu tira ovanavita na eṱe. Rwireye ovangu veṋu, ovanatje veṋu, ovakazendu veṋu nozonganda zeṋu.’
Ovandu va ri ozombanḓe tjinene. Owo va rongerisa ovirwe vyawo ouṱuku nomutenya, nu va kayenda komurungu nokutunga. Okutja kombunda yomayuva 52 omakuma ya manuka okutungwa. Okutja ovandu va ri mondjeverero motjihuro. Nehemia na Esra va honga ovandu omatwako waMukuru, novandu va ri nenyando.
Nungwari oviṋa ngunda kavya ri otja tji vya ri rukuru ngunda Ovaisrael ave hi ya huurwa otjovakamburwa ku Babilon. Ovandu aave honaparerwa i ombara yaPersi nu aave sokumukarera. Nungwari Jehova wa kwizika kutja ma hindi ombara ombe, nokutja ombara ndji mai eta ohange kovandu. Ombara ndji owaṋi? Oyo mai eta vi ohange kombanda yehi? Ovandu kaave tjiwa otjiṋa ngandu ozombura ape 450 tji za kapita. Okuzambo pa kwatwa okanatje okananḓengu. Nungwari ihi matu kerihonga momahungi ngu maye kongorereko.
