TAQSIṬ TIS 83

Leṣwar n Yarucalim

MUQEL ayen akka i xeddmen wat Isṛayil! Atnan bennun leṣwar n Yarucalim. Asm’akken ihudd ugellid Nabuxadnuẓur Yarucalim, 152 iseggasen uqbel, isseɣli leṣwar-​is yerna yesserɣ tiwwura-​ines. Asmi i d-​uɣalen wat Isṛayil si Babil, ur ɛawden ara imiren kan lebni n leṣwar n Yarucalim.

Ɛlaḥsab-​ik, d acu i ţḥussun lɣaci i gzedɣen dinna imi ulac leṣwar? Ur llin ara di lehna axaṭer zemren a d-​ẓedmen fell-​asen yeɛdawen-​nsen s sshala. Lameɛna, tura argaz-​agi Naḥamya iţɛawan-​iten ad ɛiwden lebni n leṣwar n Yarucalim. Teẓriḍ anwa i d Naḥamya?

D yiwen seg wat Isṛayil i d-​yusan si temdint n Cucan, anda i ţɛicin Murdaxay d Istir. Naḥamya yella ixeddem di lbeṛǧ n ugellid. Ahat Murdaxay d Istir llan d imdukkal-​is. Lameɛna ur d-​yenni ara Wedlis Iqedsen belli Naḥamya yeqdec ɣef ugellid Aḥacwiruc, argaz n Istir. Lameɛna yexdem ɣer ugellid i t-​id-​iḍefren imi qqaren Artaḥcasta.

Tecfiḍ ɣef Artaḥcasta? D agellid-​nni yelhan i gefkan iṣurdiyen i Ɛazra akken a ten-​yawi ɣer Yarucalim. Iṣurdiyen-​agi a ten-​issexdem i ucebbeḥ n lemqam n Yahwa. Lameɛna Ɛazra ur iɛawed ara lebni n leṣwar n Yarucalim. A nwali amek i gexdem Naḥamya ccɣel-​agi.

Ɛeddan tura 13 iseggasen segmi i gefka Artaḥcasta iṣurdiyen i Ɛazra akken ad icebbeḥ lemqam. Naḥamya yuɣal tura d lewkil ameqran n tissit n ugellid Artaḥcasta. D neţţa i s-​iţţaken ad isew yerna i geţɛassan akken ur s-​ggaren ara ssem di tissit. Ccɣel-​agi yesɛa azal ameqran.

Yiwen wass, Ḥanani, gma-​s n Naḥamya, d kra n yemdanen i d-​iddan yid-​es si tmurt n Isṛayil rzan-​d ɣef Naḥamya. Ḥkan-​as akk iɣeblan ideg i llan wat Isṛayil. Nnan-​as diɣen belli leṣwar n Yarucalim mazal-​iten hudden. Mi gesla s lexbaṛat-​agi, Naḥamya yeḥzen aṭas, dɣa yedɛa ɣer Yahwa.

Yiwen wass, agellid iwala leḥzen ɣef wudem n Naḥamya, dɣa yesteqsa-​t: ‘Acuɣer akka i tḥezneḍ?’ Naḥamya yerra-​yas: ‘Axaṭer Yarucalim aţţan di yir liḥala, ma d leṣwar-​is mazal-​iten ɣlin.’ Agellid yenna-​yas: ‘D acu i tebɣiḍ a k-​t-​xedmeɣ?’

Naḥamya yerra-​yas: ‘Eǧǧ-​iyi ad ṛuḥeɣ ɣer Yarucalim akken ad ssaliɣ leṣwar-​is.’ Agellid Artaḥcasta yelhan aṭas mačči d cwiṭ, yeǧǧa-​t ad iṛuḥ yerna yefka-​yas ţţesriḥ akken ad yawi yid-​es asɣar ara yessexdem i lebni. M’akken kan yewweḍ ɣer Yarucalim, yenna i wat Isṛayil anta ssebba i t-​id-​yewwin. Ṛṛay-​agi iɛǧeb-​asen, dɣa nnan: ‘Eyyaw a nebdut lebni!’

Mi walan leṣwar n Yarucalim ţţalin rennun, iɛdawen n wat Isṛayil ggullen a ten-​nɣen yerna ad ḥebsen lxedma-​nsen. Lameɛna, Naḥamya yewweḍ-​it-​id lexbaṛ. Dɣa yefka i wid ibennun isekkinen d imeẓragen yerna yenna-​yasen: ‘Ur ţţagadet ara iɛdawen-​nneɣ, dafɛet ɣef watmaten-​nwen, ɣef warraw-​nwen, ɣef tlawin-​nwen d yexxamen-​nwen!’

Wid ibennun ur ugaden ara maḍi. Nutni ţkemmilen lebni, ma d leslaḥ ur bɛiden ara ifassen-​nsen am yiḍ am wass. Ɛeddan kan 52 n wussan, uɣalen fukken lebni n leṣwar-​nni! Tura imezdaɣ n Yarucalim zemren ad ɛicen mebla lxuf zdaxel-​is. Naḥamya d Ɛazra sɣarayen i wegdud lqanun n Ṛebbi. Annect-​a yewwi-​d lfeṛḥ i wegdud.

Lameɛna, liḥala n wat Isṛayil tura tbeddel ɣef zzman-​nni uqbel a ten-​awin d imeḥbas ɣer Babil. Ass-​a agdud yella ddaw n ufus ugellid n Faras yerna ilaq ad ixdem fell-​as. Meɛna Yahwa iɛuhed a d-​iceggeɛ agellid nniḍen ara d-​yawin lehna i yemdanen. Anwa-​t ugellid-​agi? Amek ara d-​yawi lehna i lqaɛa? Ɛeddan wazal n 450 iseggasen d wamek i neẓra akteṛ n leḥwayeǧ ɣef waya. Ssyin, teḍra-​d yiwet n tlalit yesɛan azal nnig akk tiyaḍ. Lameɛna, tagi ţ-​ţaqsiṭ nniḍen.

Naḥamya ixef amezwaru alamma d wis 6.