LUK di wok we di Izrɛlayt dɛn de du naya. Dɛn de bil di wɔl we de rawnd Jerusɛlɛm. I dɔn pas 152 ia frɔm we Kiŋ Nɛbukanɛza pwɛl Jerusɛlɛm. Ɛn i bin brok di wɔl ɛn bɔn di get dɛn we de na di tɔŋ. We di Izrɛlayt dɛn kɔmɔt na Babilɔn ɛn kam bak na Jerusɛlɛm, dɛn nɔ bil di wɔl.

Di pipul dɛn na Jerusɛlɛm bin de fred we dɛn de na tɔŋ we nɔ gɛt wɔl rawnd dɛn. Dɛn bin de fred bikɔs i go izi fɔ mek bad pipul dɛn kam fɛt dɛn. Bɔt wan man we nem Nɛimaya de kam ɛp di pipul dɛn fɔ bil di wɔl bak. Yu no udat na Nɛimaya?

Nɛimaya na wan Izrɛlayt man we kɔmɔt na Shushan. Na da sem tɔŋ de Mɔdikaya ɛn Ɛsta de. Nɛimaya bin de wok na di kiŋ in os, so i go mɔs bi se in na padi wit Mɔdikaya ɛn Ɛsta. Bɔt di Baybul nɔ tɛl wi se Nɛimaya wok fɔ Ɛsta in man we na Kiŋ Aasirɔs. Nɛimaya bin de wok fɔ di kiŋ we rul afta Kiŋ Aasirɔs, we na Kiŋ Atazaksis.

Yu mɛmba Kiŋ Atazaksis? Na in na di gud kiŋ we bin gi Ɛzra ɔl da mɔni fɔ go mek Jiova in tɛmpul fayn na Jerusɛlɛm. Bɔt Ɛzra nɔ bin bil di wɔl. Lɛ wi si wetin ɛn wetin apin te Nɛimaya kam bil di wɔl.

Na 13 ia dɔn pas frɔm we Kiŋ Atazaksis gi Ɛzra mɔni fɔ go mek di tɛmpul. Naw, Nɛimaya na di edman fɔ di wan dɛn we de gi di Kiŋ tin fɔ drink. Nɛimaya in wok na fɔ mek shɔ se dɛn nɔ pɔyzin di kiŋ. Dis na impɔtant wok.

Wan de, Nɛimaya in brɔda we nem Anani, ɛn ɔda man dɛn we kɔmɔt na Izrɛl, kam fɛn Nɛimaya. Dɛn tɛl Nɛimaya bɔt aw di Izrɛlayt dɛn de sɔfa, ɛn aw di wɔl we de rawnd Jerusɛlɛm stil pwɛl. Dis mek Nɛimaya in at pwɛl. So i pre to Jiova.

Wan de, di kiŋ si se Nɛimaya nɔ gladi. So i aks Nɛimaya se: ‘Wetin mek yu nɔ gladi?’ Nɛimaya tɛl am se i nɔ gladi bikɔs di pipul dɛn na Jerusɛlɛm de sɔfa, ɛn di wɔl stil pwɛl. Na de di kiŋ aks am se: ‘Wetin yu want mek a du fɔ yu?’

Nɛimaya tɛl di kiŋ se: ‘A want go na Jerusɛlɛm fɔ go bil di wɔl bak.’ Kiŋ Atazaksis na gud man. I gri mek Nɛimaya go, ɛn i mek dɛn gi am big big tik dɛn fɔ du di wok. Afta Nɛimaya kam na Jerusɛlɛm, i tɛl di pipul dɛn wetin i want du. Di pipul dɛn gladi, so dɛn tɔk se: ‘Una lɛ wi bigin wok wantɛm.’

We sɔm bad pipul dɛn si di we aw di Izrɛlayt dɛn de wok, dɛn bigin tɛl dɛn kɔmpin dɛn se: ‘Una lɛ wi go kil dɛn, so dat dɛn go lɛf fɔ bil di wɔl.’ Bɔt we Nɛimaya yɛri bɔt dis, i gi di wokman dɛn sɔd ɛn spia dɛn. Ɛn i tɛl dɛn se: ‘Una lɛ wi nɔ fred dɛn bad pipul ya. Una lɛ wi fɛt fɔ wi brɔda dɛn, fɔ wi pikin dɛn, fɔ wi wɛf dɛn ɛn fɔ ɔltin we wi gɛt.’

Dis mek di pipul dɛn gɛt maynd fɔ fɛt. So ol de ɛn nɛt, dɛn bin de ol sɔd ɛn spia, ɛn dɛn kɔntinyu fɔ bil di wɔl. Dɛn tek 52 dez fɔ bil di wɔl. Naw, di Izrɛlayt dɛn nɔ go de fred se bad pipul dɛn go kam insay di tɔŋ izi wan. Nɛimaya ɛn Ɛzra bigin fɔ tich di pipul dɛn bɔt Gɔd in lɔ, ɛn dis mek di pipul dɛn gladi.

Bɔt tin nɔ bin fayn fɔ di Izrɛlayt dɛn lɛk aw dɛn bin de bifo dɛn kɛr dɛn go na Babilɔn. Na di kiŋ fɔ Pashya stil de rul dɛn, ɛn dɛn gɛt fɔ du ɛnitin we i tɛl dɛn. Bɔt Jiova prɔmis dɛn se, i go gi dɛn nyu kiŋ we go mek dɛn gɛt pis. Udat na dis kiŋ? Aw i go mek pis de na di wɔl? Na lɛk 450 ia so go pas bifo ɔl dis bi. Na da tɛm de dɛn go bɔn wan impɔtant pikin. Wi go tɔk bɔt am na ɔda stori.