HETA hna thawh zawng zawng hi en teh. Israel-mite chu Jerusalem kulh siamin an hmanhlel a. A hma kum 152-a Lalber Nebukadnezzaran Jerusalem a tihchhiatin a kulh bangte a chhu chim a, khawpui kawngkate a hal a. Babulon atanga an lo haw hmasakin Israel-miten kulh bangte an siam lo.

Kum chu chen an khawpui vela kulh awm lova heta chen chu miten engtinnge ngaia i rin? Himin an inhre lo. Awlsam takin an hmelmate lo lutin anmahni an bei thei a. Mahse tunah he mi Nehemia hian, a tawpah kulh siam leh turin mipuite a tanpui a. Nehemia chu tunge a nih i hria em?

Nehemia chu Israel-mi, Mordekaia leh Estheri chenna Shushan khawpui atanga lo kal a ni a. Nehemia chuan lalber inah a thawk a, chuvangin Mordekaia leh Lalnu Estheri thian tha a ni mai thei. Mahse Bible-in Nehemia chu Estheri pasal Lal Ahasuera hna thawk a ni tih a sawi lo. A dawta lalber Artazerzia hna a thawk a ni.

Artazerzia chu Jehova biak in sak nana Jerusalem-a kalpui tur tangka zawng zawng petu lai tha kha a ni tih hrereng la. Mahse Ezran khawpui kulh bangte a siam lo va. Nehemian he hna a thawh dan hi i en ang u.

Artazerzian biak in sak that nan tangka Ezra a pek achin kum 13 a ni tawh a. Tunah chuan Nehemia chu Lalber Artazerzia no kengtu lu ber a ni a. Chu chu, lalber chu uain a pe thin a, tumahin tura hrai an tum lo tih a hre chiang tur a ni tihna a ni a. Hna pawimawh em em a ni.

E, ni khat chu Nehemia tlawh turin Nehemia unaupa Hanania leh Israel rama mi dang an lo kal a. Israelten buaina an neih chungchang leh Jerusalem kulhte a la chim reng thu an hrilh a. Chu chuan Nehemia a tilungngai em em a, Jehova hnenah a tawngtai a.

Ni khat chu lalberin Nehemia a lungngai tih a hria a, ‘Engvanginnge lungngai em ema i lan?’ tiin a zawt a. Nehemian Jerusalem chuti khawpa a la that lohzia leh a kulhte an la chim reng vang a ni tih a hrilh a. Lalber chuan: ‘Enge i duh?’ tiin a zawt a.

‘Kulhte ka siam leh theih nan Jerusalem-ah mi kaltir ta che,’ Nehemian a ti a. Lalber Artazerzia chu a ngilnei em em a. Nehemia a kal thei a ti a, tin sak nan thing a hmuh sak bawk a. Jerusalem-a Nehemia thlen hnu lawkah, a remruat chu mipui a hrilh a. Tha an ti a, ‘I sa tan ang u,’ an ti a.

Israel-mite hmelmaten kulh intiang chho chu an hmuhin: ‘Kan kal chho vang a, anmahni tihlumin an in sak hna thawh kan titawp ang,’ an ti a. Mahse Nehemian chu chu a hria a, hnathawktute chu khandaih leh fei a pe a. ‘Kan hmelmate chu hlau suh u. ln unaute, in fate, in nupuite, in inte tan do rawh u,’ a ti a.

Mipuite chu an huai em em a. Chhun leh zanin an hriamhrei peih sain an dah a, an sa zel a. Tichuan ni 52 chauhvah kulh chu zawh a ni ta a. Tunah chuan mipui chuan khawpui chhungah himin an inhre ta a. Nehemia leh Ezran mipuite chu Pathian dan an zirtir a, tin mipui lah an hlim a.

Mahse thilte chu Israel-mite Babulon-a sala an tan hma ang chu a la ni lo. Mipuite chu Persia lai awp an ni a, a rawng an bawl tur a ni. Mahse Jehova chuan lalber thar a tir ang a, chu lalber chuan mipui hnenah remna a thlentir ang tih a tiam a. Chu lalber chu tunge ni? Engtinnge leiah remna a thlentir ang? Chu mi chanchin chu engmah hriat belh a nih hmain kum 450 vel a ral a. Tichuan nausen piang pawimawh ber a awm a. Mahse chu chu thawnthu dang a ni.