Tanojnots 83

Tepamit tein kiyoualouaya Jerusalén

¡XIKITA kemej tel tekititokej nikan! Israelitas kiyoualoltiaj tepamit Jerusalén. Keman Nabucodonosor kiixpolojka altepet 152 xiujmej achtoya, kixitinij tepamit uan kinchichinoj ipuertas. Keman israelitas ajsikej Jerusalén, amo niman kiyekachijchiujkej tepamit.

¿Tikmati keniuj momachiliayaj israelitas, itech nochi nejon xiujmej keman amo kipiayaj tepamit? Mojkanemiaj, ta amo ouij kinteuiskiaj taixnamikinij. Uan axkan itech taixkopin tikitaj nejin takat, Nehemías, kinpaleuijtok israelitas maj oksepa kiyoualoltikan tepamit Jerusalén. ¿Tikmati akoni katka Nehemías?

Nehemías katka se israelita tein nemia itech altepet Susa, kampa nemiaj Mardoqueo uan Ester. Yej tekitia itech iueyichan tekiuaj, uan acha katka itasojikniuan Mardoqueo uan Ester. Sayoj ika Biblia amo kijtoua ika Nehemías kitekitiliaya tekiuaj Asuero, inamik Ester. Kitekitilij Artajerjes, okse tekiuaj tein kitojtokak.

Xikelnamiki, tekiuaj Artajerjes tein katka yolkuali, yejua tein kimakaka Esdras miak tomin maj kiuikani Jerusalén uan maj ika kiyekchiuani itemplo Jiova. Sayoj ika, Esdras amo kiyekachijchiuak tepamit tein kiyoualouaya altepet. Maj tikitakan toni kichiualtij Nehemías nejin.

Panokaya 13 xiujmej ijkuak Artajerjes kimakaka tomin Esdras maj ika kiyekchiuani templo. Ijkuak, Nehemías katka itayilmakakauj tekiuaj. Yej kiyekouaya maj amo pajyoj tayil tein kimakaya tekiuaj. Katka se tekit tein kichiuaya ika miak nejmachkayot.

Se tonal, ikniuj Nehemías, Hananí, uan okseki takamej tein nemiaj Israel, kikalpanotoj Nehemías. Uan kitapouijkej ouijkayomej tein kipanotoyaj israelitas, uan kiiluijkej ika amo akin kiyekachijchiujtoya tepamit tein kiyoualouaya Jerusalén. Nehemías moteltayokoltij, yejika kichiuak netataujtil iuan Jiova.

Se tonal tekiuaj kiitak Nehemías tayokoltik, uan kitajtanij: ‘¿Keyej titayokoya?’ Nehemías kiiluij ika porin Jerusalén kipanotoyaj ouijkayomej, uan tepamit amo akin kiyekachijchiujtoya. Uan tekiuaj kitajtanij: ‘¿Toni tikneki?’

Nehemías kiiluij: ‘Xinechkaua maj niouj Jerusalén, uan maj nikchijchiuati tepamit’. Artajerjes katka tel kualtakat. Yejika kikauak maj yani, uan kipaleuij maj kisentiliani kuouit tein kikuiskiaj itech tekit. Amo uejkauak, Nehemías ajsik Jerusalén, uan kintapouij israelitas tein kinemilijtoya. Yejuan kiuelkakkej uan kijtojkej: ‘Maj tipeuakan titekitikan’.

Keman tein kinixnamikiaj israelitas kiitakej ika uejka kitokakajya tepamit, kijtojkej: ‘Tiyaskej uan tikinimiktiskej, ijkon tiktsakuiltiskej imin tekiuj’. Keman Nehemías kimatik nejin, kinimakak tekitinij espadas uan lanzas uan kiniluij: ‘Amo ximouikan, ta xitateuikan uan xikinpaleuikan namokniuan, namokoneuan, namonamikuan, uan namokaluan’.

Israelitas moyolchikaujkej. Uan kiuikatinemiaj youal uan tonal imin manamik tein ika tateuiskiaj, uan kisentokayaj tekitiaj. Yejika, sayoj 52 tonalmej kiniuikilij matamiskej tepamit. Ijkuak, amo mojkanemiajok israelitas. Nehemías uan Esdras kinimachtiayaj israelitas itanauatiluan Dios uan yejuan yolpakiaj.

Sayoj ika, amo semi katka kemej kipanotoyaj achtopa keman moajsiskiaj temako Babilonia. Israelitas kinixyekanaya tein tekiuajtia Persia uan monekia kitekitiliskej. Sayoj ika Jiova motenkaujka ika kititaniskia se yankuik tekiuaj, uan yejua kiniualkuiliskia yekyetolis Itekitikauan. ¿Akoni eskia? ¿Keniuj kiualkuiskia yekyetolis nikan Taltikpak? Monekia panos kemej 450 xiujmej uan ijkon momatiskia akoni eskia. Uan ijkuak, nemik se konet tein kichiuaskia miak taman tein motelnekia. Sayoj ika nejin tikitaskej itech okseki tanojnotsmej.

Nehemías capítulos 1–6.