BONA modiro o mogolo wo o dirwago mo. Baisiraele ba aga merako ya Jerusalema. Ge Kgoši Nebukadinetsara a be a senya Jerusalema nywageng e 152 pele ga mo, o ile a wiša merako ya motse wo gomme a fiša dikgoro tša wona. Baisiraele ga se ba ka ba aga merako ya wona lefsa ge ba be ba sa tšwa go fihla moo ba etšwa Babilona.

O nagana gore nywageng yeo ka moka setšhaba se be se ikwa bjang ka go dula motseng wo o bego o se wa dikologwa ke merako? Se be se ikwa se se sa šireletšega. Manaba a sona a be a ka tsena moo gabonolo gomme a se hlasela. Eupša mafelelong monna yo mongwe yo go thwego ke Nehemia o ile a thuša setšhaba go aga merako ya motse woo lefsa. Na o a tseba gore Nehemia e be e le mang?

E be e le Moisiraele yo a tšwago motseng wa Shushani moo go bego go dula Morodekai le Esitere. O be a šoma ka mošate, ka gona e swanetše go ba e be e le mogwera yo mogolo wa Morodekai le Mohumagadi Esitere. Eupša ga go na mo Beibele e re botšago gore Nehemia o kile a hlankela Kgoši Ahasiwerosi monna wa Esitere. O ile a hlankela kgoši yeo e ilego ya latela, e lego Kgoši Arithasasitha.

Gopola gore Arithasasitha e be e le kgoši ya go loka yeo e ilego ya nea Esera tšhelete gore a e iše Jerusalema go yo lokiša tempele ya Jehofa. Eupša Esera ga se a ka a aga merako ya motse yeo e bego e wele. Anke re bone gore go tlile bjang gore Nehemia a dire modiro wo.

Go be go fetile nywaga e 13 ga e sa le Arithasasitha a neile Esera tšhelete ya go lokiša tempele. Ga bjale Nehemia e be e le motšheladino yo mogolo wa Kgoši Arithasasitha. Se se bolela gore o be a tšhelela kgoši beine gomme a kgonthišetša gore ga go na motho yo a lekago go e tšhelela mpholo ka moo beineng. Wo e be e le mošomo o bohlokwa kudu.

Bjale, ka letšatši le lengwe Hanani ngwanabo Nehemia le banna ba bangwe bao ba tšwago nageng ya Isiraele ba ile ba tla ba etela Nehemia. Ba mmotša mathata ao Baisiraele ba nago le ona le gore merako ya Jerusalema e sa wele. Se se ile sa mo nyamiša kudu gomme a rapela Jehofa ka seo.

Ka letšatši le lengwe kgoši e ile ya lemoga gore Nehemia o nyamile gomme ya mmotšiša ya re: ‘O re’ng o nyamile gakaakaa?’ Nehemia a botša kgoši gore ke ka gobane Jerusalema e senyegile e bile merako ya yona e wele. Kgoši ya re: ‘O nyaka go dira’ng?’

Nehemia a re: ‘Ntumelele ke ye Jerusalema gore ke yo aga merako ya yona lefsa.’ Kgoši Arithasasitha o be a lokile kudu. O ile a re Nehemia a sepele, e bile a mo thuša gore a hwetše dikota tša go aga. Gateetee ka morago ga ge a fihlile Jerusalema, a botša setšhaba ka seo a se nagannego. Setšhaba sa kgahlwa ke seo gomme sa re: ‘A re thomeng go aga.’

Ge manaba a Baisiraele a bona gore merako e a agwa, a re: ‘Re tla rotoga ra ba bolaya gomme ra emiša mošomo wa go aga.’ Eupša Nehemia a kwa ka se gomme a nea bašomi marumo le ditšhoša. Ke moka a re: ‘Le se ke la boifa manaba a rena. Lwelang bana babo lena, bana ba lena, basadi ba lena le magae a lena.’

Setšhaba sa tia matla. Sa dula se itlhamile mosegare le bošego gomme sa tšwela pele se aga. Ka gona merako ya fetšwa go agwa ka matšatši a 52 feela. Ga bjale setšhaba se be se ka ikwa se šireletšegile ka gare ga motse. Nehemia le Esera ba ile ba ruta setšhaba molao wa Modimo gomme sona sa thaba.

Eupša dilo di be di sa dutše di sa swane le mathomong, pele ga ge Baisiraele ba ka išwa Babilona e le bagolegwa. Setšhaba se be se bušwa ke kgoši ya Peresia gomme se be se swanetše go e hlankela. Eupša Jehofa o be a holofeditše gore o tla romela kgoši e mpsha, le gore kgoši yeo e be e tla tlišetša batho khutšo. Kgoši yeo ke mang? E tla tliša khutšo bjang mo lefaseng? Go ile gwa feta nywaga e ka bago e 450 pele ga ge go ka tsebja dilo tše dintši ka yona. Ke moka ngwana yo bohlokwa kudu o ile a belegwa. Eupša ye ke taba yeo re tlago go ithuta ka yona karolong e latelago.

Nehemia dikgaolo 1 go ya go 6.